Выбрать язык
Книги Ветхого Завета
Книги Нового Завета
с русским текстомАллилуя!
1Шнадо Азоронть!
Сон паро. Сонзэ седеймарямозо пингеде пингес!
2Кадык истя мерить Азоронть вийсэ олякстомтозтне,
конатнень Сон менстинзе душмантнэде,
3конатнень Сон пурнынзе вейс ламо масторсто,
чилисемасто ды чивалгомасто,
пелеве ёндо ды обедъёндо.
4Веенстнэ якасть-азгондсть ломантеме чаво модава,
ды эзть муе эстест эрямс ош.
5Сынь кирдсть вачочи ды симемань само,
сынст оймест майсесь.
6Сестэ сынь тердизь Азоронть стака шкастост,
ды Сон менстинзе сынст кажотнеде.
7Сон ветясь сынст виде киява,
истя сынь пачкодсть ошонтень, косо тенст эрямс.
8Кадык сынь шныть Азоронть
Сонзэ седеймарямонть кисэ
ды дивань тевензэ кисэ ломантнень туртов!
9Ченгиця ойменть Сон симдизе
ды вачодо ойменть паросо пештизе.
10Сынь пекстазельть чоподасо,
вельтязельть куломань сулейсэ,
тертязельть ризнэмасо ды кшнисэ сень кисэ,
11мекс эзть кунсоло Пазонть кармавтоманзо
ды мезекскак эзизь лово Верепазонть превс путоманзо.
12Сон лепштизе сынст седеест стака важодемасо.
Сынь пупорькшнесть, ды арасель тенст лездыця.
13Сестэ сынь тердизь Азоронть стака шкастост,
ды Сон идинзе сынст кажотнеде.
14Сон ливтинзе сынст чоподасто ды куломань сулейстэ
ды сезнинзе сынст терттнень.
15Кадык сынь шныть Азоронть
Сонзэ седеймарямонть кисэ
ды дивань тевензэ кисэ ломантнень туртов!
16Сон тапинзе пижень ортатнень
ды яжинзе кшнинь пекстамотнень.
17Превтеметне майсесть эсест пежетев китнень кисэ
ды пиштесть эсест зыянов тевтнень кисэ.
18Вейкеяк ярсамопель эзь вечкеве сынст оймест туртов,
ды сынь пачкодсть куломань ортатненень.
19Сестэ сынь тердизь Азоронть стака шкастост,
ды Сон идинзе сынст кажотнеде.
20Пазось кучизе Эсензэ валонзо
ды шумбралгавтынзе сынст,
ды ванстынзе сынст калмодо.
21Кадык сынь шныть Азоронть
Сонзэ седеймарямонть кисэ
ды дивань тевензэ кисэ ломантнень туртов!
22Кадык сынь кандыть Сонензэ шнамонь анокст
ды кенярдозь ёвтнить Сонзэ тевтнеде!
23Сетне, кить якасть иневедьга покш венчсэ,
покш ведь ланга микшнеме-рамсеме,
24неизь Азоронь дивань тевтнень
ды тамашатнень домка веденть куншкасо.
25Азорось мерсь – ды кепететсь азарсь варма,
ды сэрейдеяк сэрейть ульнесть ведьвелявкстнэ.
26Венчесь кузиль менельс ды валгиль потмаксос.
Уицятнень оймест токасть кочкаряс.
27Иредезь ладсо сынь чарасть ды пракшность,
ды ведьга укшномань ёрокчист ёмась.
28Сестэ сынь тердизь Азоронть стака шкастост,
ды Сон менстинзе сынст кажотнеде.
29Сон сэтьмелгавтызе даволонть,
ды ведьвелявкстнэ оймасть.
30Идезтне эрьгелесть: иневедесь сэтьмелгадсь,
ды Сон пачтинзе сынст лоткамо таркав, ков ульнесь мелест.
31Кадык сынь шныть Азоронть
Сонзэ седеймарямонть кисэ
ды дивань тевензэ кисэ ломантнень туртов!
32Кадык сынь инелгавтыть Сонзэ раськень промкссо
ды шныть Сонзэ сыретнень кужосо!
33Азорось теи лейтнень чаво модакс
ды лисьмапрятнень – коське таркакс,
34чачтыця моданть – саловокс,
те моданть лангсо эрицятнень зыянов тевест кисэ.
35Сон теи чаво моданть эрькекс,
ды коське моданть – лисьмапрякс.
36Тозонь Сон озавты эрямо вачочисэтнень,
ды сынь стявтыть-кепедить эстест ош.
37Сынь видить паксят, озавтыть винаумарьксэнь садпиреть,
конат максыть тенст сюпав норов.
38Азорось чансти-баслави сынст,
ды сынь теевить покш раськекс,
ды ракшасткак ламолгадыть.
39Сынь аламолгадыть ды прыть лепштямодонть,
кажотнеде ды ризнэмадонть.
40Сон покорды чинязтнэнь
ды кады сынст азгондеме чаво модава, косо арасть кить.
41Арасьчисэтнень вана тарги кажостонть
ды раштавты сынст буенть, кода ревень стаданть.
42Виде седейтне неить тень ды кенярдыть,
а вана зыянонь теицятнень кургост пекставить.
43Кие превей, се кадык путсы превс весе тень
ды кирди мельсэнзэ Азоронть седеймарямонь тевензэ.
Шнамо
Глава 106