Выбрать язык
Книги Ветхого Завета
Книги Нового Завета
с русским текстомАллилуя!
1Шнадо Азоронть лемензэ,
шнадо Азоронть, Сонзэ уретне!
2Шнадо тынь, кить сюконить Азоронтень Сонзэ кудосо,
минек Пазонь кудонь пирявтонть потсо.
3Шнадо Азоронть! Азорось паро.
Моравтодо Сонзэ лементь, те вадря.
4Азорось кочкизе Эстензэ Иаковонь.
Сон кочкизе Израиленть Эсензэ уличикс.
5Мон содан: Азорось ине.
Минек Азорось весе пазтнэде покштояк покш.
6Азорось теи весементь, мезе мелезэ,
менельсэ ды модалангсо,
иневедтнесэ ды весе отьматнесэ.
7Сон кепеди пельть моданть чирестэ,
верьгеди ёндолт пиземе шкасто,
нолды варма Эсензэ путома-ванстома таркатнестэ.
8Сон маштынзе Египетэнь васень чачовтнень,
ломаненьгак, ракшаньгак.
9Сон кучнесь дивань тешкст ды тамашат тонеть, Египет,
фараононть ды весе сонзэ урензэ лангс.
10Сон маштынзе ламо раськетнень
ды куловтынзе виев инязортнэнь:
11Сигононь, Амореень инязоронть,
ды Огонь, Васанонь инязоронть,
ды весе Ханаанонь масторонь инязортнэнь.
12Весе сынст модаст Сон максынзе уличикс Израилентень,
уличикс Эсензэ раськентень.
13Азоро! Тонь леметь пингеде пингес.
Азоро! Тонь кармить кирдеме мельсэ буестэ буес.
14Азорось карми аштеме судсо Эсензэ раськензэ кисэ
ды путы седеймарямо Эсензэ уретненень.
15Лия раськетнень пазост – сиясто ды сырнестэ,
теезь ломанень кедьсэ.
16Сынст улить кургост, ансяк сынь а кортыть.
Сынст улить сельмест, ансяк сынь а неить.
17Сынст улить пилест, ансяк сынь а марить.
Сынст арась оймекоштосткак.
18Неть пазтнэнь ёнов кармить молеме теицясткак,
ды эрьвась, кие нежеди лангозост.
19Израилень раське, шнак Азоронть!
Аарононь буе, шнак Азоронть!
20Левинь буе, шнак Азоронть!
Азордонть пелицятне, шнадо Азоронть!
21Пачкодезэ Сионсто шнамось Азоронтень,
Иерусалимсэ эрицянтень!
Аллилуя!
Глава 134