Выбрать язык
Книги Ветхого Завета
Книги Нового Завета
с русским текстомДавидэнь шнамоморозо.
1Карман инелгавтомо Тонь,
монь Пазом, Инязором!
Карман шнамо Тонь леметь
свал ды пингеде пингес.
2Эрьва чистэ карман Тонь шнамо,
свал ды пингеде пингес инелгавтомо Тонь леметь!
3Азорось ине! Весеме ёндо Сон шназь!
Сонзэ инексчизэ превс а саеви.
4Буестэ буес*а кармить шнамо Тонь теветь
ды ёвтнеме Тонь покш тевдеть.
5Мон карман арсеме Тонь покштояк покш,
талновтыця инексчиденть
ды Тонь дивань тевтнеде.
6Кармить кортамо Тонь тевтнень тандавтниця вийдест,
ды мон карман ёвтнеме Тонь инексчидеть.
7Кармить ёвтнеме-ледстнеме Тонь ине седеймарямодот
ды кецязь гайгевтеме Тонь видечинть.
8Азорось парочисэ пештязь ды седеймариця,
Сон кувать кирди ды сюпав покш вечкемасо.
9Азорось весенень паро,
ды Сонзэ седеймарямось пачкоди весемес,
мезенть Сон теизе.
10Шнаст Тонь, Азоро, весе Тонь теевксэть,
ды кадык инелгавтыть Тонь
Эсеть кемевикс важотне.
11Пачтяст Тонь инязорксчинть инексчинзэ
ды ёвтнест Тонь ине вийдеть.
12Кадык кармить содамо весе ломантне Тонь ине тевдеть,
Тонь инязорксчинть сияждомадо ды инексчиде!
13Тонь инязорксчить – пингеде пингень инязорксчи,
ды Тонь азорксчить – буестэ буес.
[Кемевикс Азорось весе Эсь алтамосонзо,
ды иневанькс весе Эсь тевсэнзэ.]
14Азорось лезды весе прыцятненень
ды кепеди весе правтозтнень.
15Весень сельмест кемезь ваныть Тонь лангс,
ды Тон шкастонзо максат тенст ярсамопелест.
16Тон максат сюпав кедьсэть
ды андат весе эрийтнень
паро мелеть коряс.
17Азорось виде весе Эсь китнень лангсо
ды седеймариця весе Эсь тевтнесэ.
18Азорось малавикс весенень, кие Сонзэ терди,
весенень, кить тердить Сонзэ весе седейсэст.
19Сон топавты сетнень мелест,
кить пелить Сондензэ.
Сон мари сынст рангомаст ды иди эйсэст.
20Азорось вансты весе Сонзэ вечкицятнень,
а вана весе зыяновтнень маштнесынзе.
21Кадык монь кургом шны Азоронть,
ды кадык эрьва эриесь инелгавтсы
Сонзэ иневанькс лементь пингеде пингес.
Шнамо
*а 144:4 буестэ буес – из рода в род
Глава 144