Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
ОЗНОМАМОРОТ
Глава 55
Стакачисэ Пазонть лангс кемема-нежедема
1Моравтомань ветицянтень. ”Васоло масторсо каштмолиця гулькине” морамолувонть коряс. Давидэнь морозо, зярдо филистиянсетне*а кундызь сонзэ Гефа ошсо.
2Пазом, ульть седеймарицякс монень –
мельган пансить,
лангозон кайсевить эрьва чистэ,
а максыть тень оймамо.
3Вай, Верепаз! Душмантнэ эрьва чистэ нилевлимизь,
ламот стякшныть монь каршо.
4Зярдо мон пелян, Тонь лангс кеман-нежедян.
5Пазонть алтамонзо мон шнан,
Пазонть лангс мон кеман-нежедян ды а пелян.
Мезе теи монень кулыця-ёмиця ломанесь?
6Эрьва чистэ колсить монь валон смустест.
Весе мелест-арсемаст монь коряс – ансяк зыян.
7Сынь пурнавить, кекшнить,
ваныть эрьва эскельксэнь мельга, бажить оймень саеме.
8Арази а пандови сыненст авидечист кисэ?
Пазом, Эсеть кежсэть правтыть-сявордыть раськетнень!
9Тон содасыть кудовтомо монь азгондеман.
Путыть сельведень Тонь кедьгентень!
Арази сынь аволь Тонь книгасонть?
10Зярдо мон Тонь тердян, монь душмантнэ потыть.
Тень кувалма мон содан: Пазось монь кисэ.
11Пазонть алтамонзо мон шнан,
Азоронть валонзо мон шнан.
12Пазонть лангс кеман-нежедян ды а пелян.
Мезе теи монень ломанесь?
13Пазом, мон максынь Тонеть алтамот.
Мон сынст топавтсынь ды кандан Теть аноксокс шнамо.
14Эдь Тон идик-менстик монь оймем куломадо,
[монь сельмень – сельведтнеде]
ды пильгеньгак ванстыть пупордямодо сень кисэ:
якамс монень Пазонть икеле эрямонь валдосо.
*а 55:1 филистиянсетне – Филистиянь масторонь эрицятне
Глава 55
