Выбрать язык
Книги Ветхого Завета
Книги Нового Завета
с русским текстом1Моравтомань ветицянтень. «Иля маштне» морамолувонть коряс Давидэнь морозо, зярдо Саул кучсь кудонзо ваксс ванстыцят, кинень эрявсь кундамс ды чавомс Давидэнь.*а
2Идемак душмандон, Пазом!
Ванстомак каршон стякшныцятнеде.
3Идемак зыянонь теицятнеде,
ванстомак верень валыцятнеде.
4Сынь салава ванстыть монь.
Азоро! Кежейтне анокт каявомс монь лангс,
аволь монь зыянонь кисэ
ды аволь монь пежетень кисэ.
5Монь арась чумом,
ялатеке сынь капшить ды пурныть каявомс монь лангс.
Варштак лангозон ды сак тень лездамо.
6Тон, Азоро, менелень вийтнень Паз, Израилень Паз,
сыргозть ды пандык лия раськетнень чумост,
киньгак иля вансто
неть нулгодькс зыянонь теицятнень эйстэ.
7Чокшне велявтыть сынь мекев,
урныть, теке пинеть,
ды якить ошонть перька.
8Вана сынст кургосто лисить сёвнома валт.
Ёвтазь валтнэ теке торот.
Сынь арсить: кие марясынзе?
9Тон, Азоро, пеедькшнесыть сынст.
Тон згилясыть весе лия раськетнень.
10Монь Вием, учан Тонь,
эдь Тон, Пазом, – монь ванстыцям.
11Пазом, кона вечксамам, моли монь икеле
ды максы монень неемс душманон прамост.
12Азоро, минек ванстыцянок, илить куловто сынст:
кадык а стувтсы монь раськесь сынст уцяскаст.
Сравтнить сынст Эсеть вийсэ
ды правтыть сынст.
13Сынст келест ды весе сынст валост
пештязь пежетте.
Кадык сынь понгить эсест каштанчисэст пистеньс,
весе сюдомаст ды манчемаст марто.
14Маштыть-чавить сынст эсеть кежсэть,
чавить – кадык сынь допрок ёмить.
Сестэ кармить содамо:
Пазось кирди азорксчи Иаковонь лангсо,
Сон азор мода чиретнес.
15Кадык чокшне велявтыть сынь мекев,
урныть, теке пинеть,
ды якить ошонть перька.
16Кадык азгондить*б, ярсамопелень вешнезь,
ды вачодо печтить веть.
17Мон жо карман шнамо Тонь виеть
ды пиже зорява кецязь яволявтнеме Тонь седеймарямодот.
Эдь Тон ульнить монень ванстома ды кекшема таркакс
монь стака чистэнть.
18Монь Вием! Тондеть карман морамо.
Пазось – ванстыцям.
Пазом вечксамам монь.
*а 58:1 Вант: 1.Иняз.19:11
*б 58:16 азгондемс – бродить
Глава 58