Выбрать язык
Книги Ветхого Завета
Книги Нового Завета
с русским текстом1Моравтомань ветицянтень, Идифумнень. Асафонь псалмась.
2Мон тердян Пазонть,
мон верьга вайгельть сеерян Пазонтень,
ды Сон марясамам монь.
3Стака чистэ мон вешнян Азоронть.
Венстнян Тензэ кедень вень перть апак нолдтне.
Монь оймем а соды оймамо.
4Ансяк ледстяса Пазонть – ды ушодан риксэ авардеме,
арсезеван – ды лавшоми оймем.
5Тон а максат тень сельмень конямояк.
Мон истя пек талнан, натой арась вием кортамскак.
6Арсян кезэрень читнеде,
ютазь пингетнень иетнеде.
7Ледстнян вень пачк морон, кортнян седеем марто,
ды ризныця оймем вешни каршо вал.
8Арази свалшкас кадымизь Азорось
ды седе тов а карми явомо тенек мель?
9Арази свалшкас лепамсь-мадсь Сонзэ седеймарямось,
ды зярдояк а топавтовить Сонзэ алтамотне?
10Арази Пазось стувтызе паронь тееманть?
Арази, кежсэ улезь, пекстызе миненек седеензэ?
11Ды мон меринь: «Вана мезесь монь пиштевти –
ёмась минек туртов Верепазонть вить кедензэ виесь».
12Карман ледстнеме Азоронть тевтнеде.
Карман ледстнеме Тонь седикелень тамашатнеде.
13Карман арсеме весе Тонь теветь ланга,
домкасто арсевтеме Тонь ине теевкстнэнь.
14Пазом! Иневанькс Тонь кить.
Кодамо паз Тондеть седе ине, минек Пазонок!
15Тон – Паз, тамашань теиця.
Тон невтик Эсеть покш виеть раськетнень ютксо.
16Тон идик кедьвийсэть Эсь раськеть,
Иаковонь ды Иосифень цёратнень.
17Ведтне неидизь Тонь, Пазом,
ведтне неидизь Тонь ды соракадсть,
ды отьматне кумболдозевсть.
18Пельтне валсть ведь,
верде зэрнесь пурьгине,
ды Тонь налот ливтнесть эрьва ёнов.
19Тонь пурьгиненть зэрнемась кеверсь менеленть келес.
Ёндолтнэ валдомтсть весе пертьпельксэнть.
Модась сорнось ды чатась.
20Тонь кись ютась иневедень трокс
ды янот – домка ведень пачк.
Тонь пильге челькетне эзть неяво киненьгак.
21Стада ладсо ветить Тон Эсеть раськеть
Моисеень ды Аарононь вельде.
Шнамо
Глава 76