Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
ОЗНОМАМОРОТ
Глава 85
Азоро, марить монь пиштеман!
Давидэнь озномазо.
1Азоро, чиремтик пилеть ды марямак монь.
Мон покш нужачисэ ды пек пиштян.
2Ванстык оймем, эдь мон Тонь кемевикс важот.
Монь Пазом, идик Эсь уреть, кона кеми-нежеди Тонь лангс.
3Азоро, ульть седеймарицякс монень.
Тонеть мон пшкалян-сеерян чинь перть.
4Эрьгедстик-кенярдовтык Тонь уреть.
Весе оймесэнь бажан Тонеть, Азоро.
5Тон, Азоро, вадрят ды лембе седеят,
Тонь ламо седеймарямот весенень, кить тердить Тонь.
6Марик, Азоро, монь озномам,
явт мель монь энялдомантень.
7Мон стака чистэнь тердян Тонь,
ды Тон марясамак монь.
8Азоро, арась пазтнэнь ютксо Тонь кондямо,
ды арасть Тонь теветь кондят.
9Весе раськетне, Тонь теевтне,
сыть ды сюконить Тонеть, Азоро,
ды инелгавтсызь-шнасызь Тонь леметь.
10Тон ине ды теят дивань тевть.
Ансяк Тон – Паз.
11Аравтомак, Азоро, Тонь кить лангс,
ды мон карман якамо Тонь алкуксчисэть.
Кемекстык монь седеем,
ды мон карман пелеме Тондеть.
12Азоро, монь Пазом, карман шнамо Тонь весе седейсэнь
ды инелгавтомо Тонь леметь пингеде пингес.
13Ине Тонь седеймарямот монь туртов.
Тон менстик оймем тоначинь отьманть эйстэ.
14Пазом! Каштантнэ стясть монь каршо,
зыянонь сыргавтыцятне вешнить монь оймем.
Сынь мельсэст а кирдить Тонь.
15Азоро, Пазом, Тон паронь теиця ды седеймариця,
кувать коронь кирдиця,
пештязят ине вечкемасо ды алкуксчисэ.
16Варштак монь лангс
ды нолдык чумом.
Казик Эсеть вийсэ уреть
ды идик Тонь уреаванть цёранзо.
17Макст монень тешкс парот невтемга.
Кадык несызь тень монь авечкицятне
ды совить визьксчамас.
Тон, Азоро, лездыть монень ды оймавтымик.
Глава 85
