Выбрать язык
Книги Ветхого Завета
Книги Нового Завета
с русским текстом1Вана Агуронь, Иакеень цёранзо, валтнэ. Тензэ максозь кулясь,*а конань ёвтызе те ломанесь Ифиилнэнь, Ифиилнэнь ды Укалнэнь:*б2Алкукс истя: лиянь коряс монь превень пек седе ношкат,
ды эйсэнь арась ломанентень эрявикс чарькодьксчи.
3Мон эзинь тонадо покш превейчинтень
ды мезеяк а содан Иневанькс Паздонть.
4Кие кузсь менельс ды валгсь одов?
Кие кундызе варманть эсензэ кедьс-коморс?
Кие сюлмизе веденть оршамопелензэ потс?
Кие аравтынзе модань весе петнень?
Кода сонзэ лемезэ? Кода цёранзо лемезэ?
Паряк, тон содат истямо ломань? Сестэ ёвтык монень!
5Пазонть эрьва валозо ванькс ды асатыкстэме.
Пазось – ваксар Сонзэ лангс нежедицятнень туртов.
6Сонзэ валтнэнень мезеяк лия иля поладо,
лиякс тень кисэ Сон кедьстэть кевксти,
ды тон лисят кенгелицякс.
7Азоро! Кавто тевть мон вешан Тонь пельде –
илямак карда эйстэст, зярс мон эрян:
8Саик эйстэнь чаво ды кенгелема валтнэнь ёвтамонть,
иля максо монень а кажовчи, а сюпавчи –
макст монень кши ансяк эрявиксэнть туро.
9Лиякс, пешкедемазон ярсавозь,
илязан карма прянь кайсеме Тондеть
ды илязан мере: «Кие те – Инешкипазось?».
Эли – кажовгадозь илязан карма саламо
ды рудазкавтомо монь Пазонть лемензэ.
10Иля сялдо важонть азоронзо икеле –
илязо пра важонть сюдомась тонь лангс,
эдь сестэ тон тень кисэ кармат пандомо.
11Улить истят, сюдыть тетяст
ды а чанстить-баславить тиринь аваст.
12Улить истят, ловить эсь пряст ваньксэкс,
куш сынсь апак ванськавто рудаздост-вацедест.
13Улить истят, вай, кода верьга кандыть пряст,
вай, кода верьга кайсить вановтост!
14Улить истят, пеест теке торот,
пейсалазкест теке пшти пеельть:
ансяк бу сэвемс модалангонь кажовтнень
ды нилемс пайстомо ломантнень!
15А пештевеманть*в кавто тейтерензэ:
Макст! ды Макст!
Вана колмотне, конатне зярдояк а пештявить,
мик нилетне, конатне зярдояк «Саты!» а мерить.
16Неть – тоначинь отьмась, а чачтниця потмось,
модась, конанень зярдояк а сатни ведесь,
ды толось, кона зярдояк а опами.
17Тетянзо лангсо згилицянть-пеедькшницянть
ды аванзо мезекскак а ловицянть
сельметнень таргасызь лаймень кренчтне
ды сэвсызь куцьканонь левкстнэ.
18Колмо тамашань тевть превезэнь а саевить,
мик нилетне тень а чарькодевить:
19куцьканонь менельга ливтнема китне,
гуень кевпандо ланга ёзмолдома китне,
покш венчень иневедь куншкава уйнема китне
ды тейтерень седейс цёранть ветиця китне.
20Ускурявиця нинть истямо коезэ:
ярсы-сти, нардасынзе турванзо
ды мери: «Мезеяк берянь мон эзинь тее».
21Колмо тевтнеде модась сорны,
мик нилетне тензэ а кирдевить:
22уресь, кона тееви инязорокс,
аптюкось, кона ярсы уксновомазонзо;
23авечкевикс тейтерьавась, кона лиси мирденень,
ды важавась, кона ары азораванзо таркас.
24Мода лангсо улить ниле вишкинеде вишкинеть,
ансяк сынь пек превейдеяк превейть:
25Коткудавтнень виест аламо,
а вана кизна анокстыть сатышка ярсамопель.
26Пандонь чеертне*г лавшот,
а вана пизэст теить кевпандова.
27Тастатнень арась ветицяст,
ялатеке сынь каявить вейсэ, велувсо.
28Шанжавось*д пильгинесэнзэ поволеви*е,
ансяк эри инязоронь кудосояк.
29Колмотнень пек мазый молевксэст,
мик нилетнень вельть каштан чалгавксост:
30левенть – идем ракшатнень ютксо сехте виевенть, –
сон киненьгак а максы кинть,
31прянзо шныця атякшонть,*к
атяка сеянть [стадань ветицянть,]
ды ушмонзо икеле эскелиця инязоронть.
32Бути тон прят верьга кандомадонть
теевить превтемекс ды арсить зыян –
пекстык кургот кедьсэть.
33Эдь вельксэнть пивтемстэ тееви ой,
судо ланга вачкодемстэ чуди верь,
кежень кирвазтемстэ лиси тюрема.
*а 30.1 Тензэ максозь кулясь – те тарканть евреень кельсэ ули лия чарькодемазояк: массаит – те лемесь максозь тензэ эрямо тарканзо эли буензэ (Масса) коряс.
*б 30.1 Ифиилнэнь, Ифиилнэнь ды Укалнэнь – эли: Паз! Кода мон сизинь! Паз! Кода мон сизинь – алем маштомс!
*в 30.15 Эли: верьботий, педлий.
*г 30.26 Евреень текстсэнть: дамантнэ. Даман – паксянь нумолошка, пандо потмарсо эриця ракшине.
*д 30.28 Евреень текстсэнть: метьказ, ящерица.
*е 30.28 Эли: кедьсэ кундавиця.
*к 30.31 Синод. ютавтовкссонть: айгоронть.
Глава 30