Выбрать язык
Книги Ветхого Завета
Книги Нового Завета
с русским текстом1Соломононь Мазыйдеяк мазый Моронь книгась.
(Тейтересь:)*а
– Вай, палсемак монь, палсемак эсеть турвасот!
Эдь тонь палсемат-кутморямот вадря винадояк тантейть!
2Тон ваднезят тантейстэ качадыця ойсэ,
леметь коряс паро ёндо содавиксат
кода Турах ёнксонь вадря мирось.*б
Секс од тейтертне вечктядызьгак тонь.
3Саемак мартот – седе курок тестэ чиезь тутано!
Вай, инязором совавтымим кудонзо потмо нупальс.
(Лиятне:)
– Карматано аштеме мельспаросо ды кеняркшномо корязот,
винадо пек инелгавтнеме вечкемат
– алкукс ули мезень кисэ вечкемс тонь!
(Тейтересь:)
4– Иерусалимень тейтерть!
Кадык мон раужан,
кода Кедаронь буень коцткудотне,*в –
ялатеке вельть мазыян,
теке Соломононь шаршавтне.
5Илядо вано тюжа чачом лангс:
чипаесь истя палсимим монь.
Лелян кежиявтсть лангозон,
кармавтымизь винаумарень пиретнень ванстомо.
А вана эсень винаумарь пирем-мазычим монень эзь ванстово.
(Тейтересь:)
6– Ёвтак монень тон, кинь вечксы монь оймесь:
косо ванат эсеть ракшат,
косо эйсэст оймсевтят чинь куншкат?
Мезекс монень улемс теке вельтявкс ало кекшницякс,
ялгат ракшань куротнень*г юткова чарыцякс-вешницякс?
(Цёрась:)
7– Мазый тейтертнестэ сехте мазыесь!
А содындерят теде, ютак реветнень чалгавкстнэва,
сеялевксэть вант ваныцятнень кошост малава.
8Монь седейпелькскем! Тон монень неяват
фараононь ушмокрандазос кильдезь мазый эльдекс.
9Вельть мазыйнеть чамаумареть
кувалмоваст нурьгиця рисьметнень экшсэ,
вельть мазыйне кирьгат,
кирьгашасо-эрьгесэ тапардазь кирьгат.
10Тейтяно теть сырнень рисьметь
цивтёрдыця сиянь байгине марто.
(Тейтересь:)
11– Зярдо инязором симсь-ярсась морга экшсэ*д,
нардом*е пертьпельксэнть пештясь тантей чинесэ.
12Вечкевиксэм монь туртов –
тантей мирра*ж марто кескавне –
мештень ютксо уды-оймси веньперть.
13Вечкевиксэм монь туртов –
киперэнь*з панжовксонь пусмо
Енгединь*и винаумарь пиретнесэ.
(Цёрась:)
14– Вай, тон мазыйдеяк мазыят,
монь седейпелькскем,
вай, кодамо тон мазыят!
Тонь сельметь – теке вечкениця гулькинеть!
(Тейтересь:)
15– Вай, тонгак мазыйдеяк мазыят,
монь вечкевиксэм,
видьстэ оймезэнь педить!
Мадема тарканок – пиже парсеень луганарось,
16кудолангонок – кедрань тарадтнэ,
латонок – кипаристнэ.
*а 1.1 Евреень текстсэнть кортыцятне невтевить глаголтнэнь ды местоимениятнень петнесэ. Секс, чарькодеманть туртов, минек ютавтовкссонть совавтозь валт "Тейтересь", "Цёрась", "Лиятне".
*б 1.2 Синод. ютавтовкссонть: паро леметь – теке валозь-чудевтезь миро.
*в 1.4 Кедаронь коцткудотне – арабтнень-кочевниктнэнь (бедуинтнэнь) сынь, кода нейгак, теезельть раужо сеянь понасто.
*г 1.6 ракшань куро – стада.
*д 1.11 Эли: ульнесь мадезь аштема таркасонзо.
*е 1.11 Нард – касовксонь ундокссто саевиця ой, нолдтневсь тевс тантей качадомапелень теемс.
*ж 1.12 Мирра – тантей чинень чувтоой (смола).
*з 1.13 Кипер – тантейстэ качадыця панжовкс марто куракш. Эйстэнзэ течияк теить хна артомапеленть.
*и 1.13 Енгеди – Иудань чаво модасо мазый, сюпав тарка (оазис).
Глава 1