Выбрать язык
Книги Ветхого Завета
Книги Нового Завета
с русским текстом(Иерусалимень тейтертне:)
1– Велявт одов, Суламита*а, велявт одов!
Велявт одов, велявт одов –
Ужокая, вантадызь тонь!
(Тейтересь:)
– Мезекс тенк ваномс Суламита лангс,
теке Манаимень киштицятнень-морыцятнень лангс?
(Цёрась:)
2– Вай, кодат мазыйдеяк мазыйть
сандалиятнесэ пильгеть, содавикс буень тейтерь!
Пукшот мендявксост, теке кирьгакшт,
кедьчелькев ломанень теевкст.
3Тонь почот-элеть – теке кеверь*б мазый кече,
конасонть тантей винась
кадык зярдояк а прядовкшны.
Пекеть – теке лилиясо карксазь*в
товсюронь оровтке.
4Мештеть – теке кавто ланть,
теке газелень левкст-кавтаськеть.
5Кирьгат – слононь ловажасто теезь-вачказь пирявтконякс.
Сельметь – потмакстомо эрькетне
Есевон ошонь Батраббимень ортатнень вакссо.*г
Судот – виде, теке Дамаск ёнов ваныця
Ливанонь пирявтконяксось.
6Прят кандат каштансто – теке Кармил пандось,*д
тонь сурксонь суркс кувака менчевезь прячереть
кувтёлдыть чопода-якстере питней коцтокс.
Селяка черьсэть саимик полонс монь,
эсеть инязоронть.
7Вай, кодамо тон мазыят, кодамо мельстуицят,
монь вечкемам, кенярдовтыця чачосот-обуцясот!
8Тонь рунгот – виде-ёлганя, теке пальма,
мештеть – теке винаумарень цюцёвт.
9Мон арсезевинь: кода кузевлинь те пальманть лангс,
кода саевлинь кедезэнь касовксонзо марто тарадтнэнь!
Тонь мештеть кадык улить монень винаумарень цюцёвокс,
лексемат – умарень тантей чинекс,
10турват – пародояк паро винакс…
(Тейтересь:)
– Те винась чуди видьстэ вечкевикснэнь,
васькавтозь таньшкавты удыцятнень турваст.
11Мон – вечкевиксэнь,
мелезэ-бажамозо – монень.
12– Сак, монь вечкевиксэм!
Лисстяно паксяв, ютавтсынек венть велетнесэ.*е
13Валскень зорят мольтяно винаумарь пиретнес,
вансынек, пижелгадсть-эзть винаумарьксэнь тарадтнэ,
панжовсть-эзть пургондавксост,
улить-арасть панжовкст гранатонь чувтотнэнь лангсо.
Тосо мон вечкезь казьса теть эсь прям.
14Мандрагоратне*ж уш тантейстэ качадыть,
ды минек кудокенкш икеле
эрьва кодат пародояк паро умарть –
одт ды икеленсетне.
Мон сынст ванстынь-таштынь
тонь туртов, монь вечкевиксэм!
*а 7.1 Суламита – шуламмитянка – тейтерьава, конань арасть кодаткак асатыксэнзэ.
*б 7.3 кеверь – кругловой.
*в 7.3 лилиясо карксазь – тесэ, паряк, мазый каркссо.
*г 7.5 Батраббим – ортань лем. Валонть смустезэ: "инетнень тейтерь". Нать, тесэ валсо налксема валрисьменть марто: "содавикс буень тейтерь", вант 7,2.
*д 7.6 Кармил – вирьсэ вельтязь пандоконя, кона валги Модакуншкань иневедьс.
*е 7.12 Эли: киперэнь (хнань) куракштнень ютксо.
*ж 7.14 Мандрагора – касовкс, конань умарензэ лововсть "вечкемань умарекс". Кемсть, сынь кастыть цёранть ды тейтерьаванть раштамонь виест.
Глава 7