Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
7 Псалом
1 Горза́н сьыланкы́в. Давидыс сьыліс сійӧ Дӧсвидзисьлӧ Хус йылісь, кӧда вӧлі Вениамин увтырись.2 Дӧсвидзисьӧ, Енӧ менам,
ме Тэ вылӧ надейтча.
Дорйы менӧ, вӧтлісиссез дынісь менӧ мезды.
3 А то ме вылӧ лэбтісьӧмыс лев моз менӧ летас,
лолӧс менчим босьтас,
кӧр абу дорйисьыс [да мездісьыс].
4 Дӧсвидзисьӧ, Енӧ менам!
Кери разь ме мыйкӧ не сідз,
кери разь аслам киэзӧн мыйкӧ умӧльӧ?
5 Вештіси разь ме умӧльнас сылӧ,
кӧда мекӧт оліс лӧся́лӧмӧн?
Ме эд мездывлі нельки сійӧ,
кӧда немись лэбтісис ме вылӧ.
6 Ме кери кӧ умӧльсӧ,
сэк ме вылӧ лэбтісьӧм мортыс ась вӧтчӧ ме сьӧрӧ,
ась вӧтӧ да тальӧ менӧ нятяс,
менчим бур нимӧс бусӧ уськӧтӧ.
7 Дӧсвидзисьӧ, лӧгувьят сувт паныт нылӧ,
кӧдна бӧбись
*а лэбтісисӧ ме вылӧ.
Чеччы суд вылас менӧ дорйыны,
судсӧ чулӧт веськыта,
Аслат висьталӧ́м сьӧрті.
8 Отиррез ӧксясӧ Тэ гӧгӧрӧ,
Тэ ны весьтӧ лэбтісь Аслат вылынінӧ.
9 Дӧсвидзись судитӧ отирресӧ.
Дӧсвидзись, бӧрйись
*б и мекӧт
да видзӧт: ме веськыта ола,
умӧль керӧ́мыс абу ме сайын.
10 Веськыта керись Енӧ,
умӧльсӧ кериссезлісь лӧгалӧ́мнысӧ дугдӧт,
а веськыта оліссезӧс вынсьӧт,
Тэ эд сьӧлӧмнысӧ да пытшкнысӧ
тӧдмалан-видзӧтан
*в быдӧнныслісь.
11 Менам сайӧвтча́нӧ ─ Еныс.
Сӧстӧм сьӧлӧмаэсӧ Сія мездӧ.
12 Еныс ─ веськыта Судитісь,
[Сія вына да ыджыт мылаа
*г.]
Еныс быд лун чорыта мыжйӧ сійӧ,
13 кӧда оз бергӧтчы Сыланьӧ.
Сія кеслӧ Ассис шыпуртсӧ
*д,
зэлӧтӧ Ассис ньӧвсӧ
*е да лӧсьӧтчӧ лыйны.
14 Еныс лӧсьӧтӧ вия́н тышкася́ннэз
*ж,
керӧ сота́н ньӧвьёссез
*з.
15 Ентӧг олісь юрас пыртӧ умӧльсӧ керны,
сія сьӧлӧмас новйӧтӧ лёксӧ керны
да чужтӧ бӧбӧтчӧ́мсӧ.
16 Сія гарйӧ яма, пыдынсьӧтӧ,
сэтчӧ тай ачыс и усьӧ.
17 Сылӧн лёк керӧ́мыс сы вылӧ бертас,
лёка дзескӧтлӧ́мыс аслас юр вылӧ усяс.
18 Ошка Дӧсвидзисьсӧ веськыта керӧ́мыс понда,
Медвылісьлісь, Дӧсвидзисьлісь, нимсӧ сьылӧта.
*а 7:7 бӧбись ─ неистово
*б 7:9 бӧрйисьны ─ разбираться
*в 7:10 тӧдмавны-видзӧтны ─ испытывать
*г 7:12 мыла ─ терпение
*д 7:13 шыпурт ─ меч
*е 7:13 ньӧв ─ лук
*ж 7:14 вия́н тышкася́н ─ смертоносное оружие
*з 7:14 ньӧвьёсь ─ стрела
Глава 7
