Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
101 Псалом
1 Пессись-мырсись мортлӧн тӧждісикӧ кеймӧ́м, кӧр сія Дӧсвидзисьлӧ висьталӧ ассис сьӧлӧм шогсӧ.2 Дӧсвидзисьӧ, кыв менчим кеймӧ́мӧс.
Менам герьясьӧ́мӧ ась локтӧ Тэнат пеллезӧдз.
3 Ме шогья чужӧ́мтӧ эн сайӧвт.
Тӧждіся́н лунӧ пельтӧ меланьӧ бергӧт.
Кӧр кора Тэнӧ, чожажык кыв менӧ.
4 Менам ола́н луннэзӧ тшын моз ӧшӧны,
зубытсяняс лыэзӧ сотчӧны.
5 Сьӧлӧмӧ турун моз нюкыртчис,
ме нельки няньсӧ сёйны вунӧтла.
6 Горӧн ойзӧ́мсянь ме быдсӧн косьми,
дзир кучикӧ да лыэзӧ кольччисӧ.
7 Ме лои кушмуын олісь пеликан кодь,
разьсьӧм керкуэзын олісь сюзь кодь.
8 Ме ог вермы узьны,
ойбыт ӧтнам пукала
керку юр вылын пукалісь кай моз.
9 Ме вылӧ лэбтісьӧммес быд лун менӧ умӧльтӧны,
мекӧт лӧгаліссес менӧ ёрдӧны.
10-11 Тэнат лӧгасьӧ́мсянь да лёксялӧ́мсянь
няньыс туйӧ ме пӧим
*а сёя,
юанӧс синванам сорлала.
Тэ менӧ лэбтін да шентін.
12 Менам ола́н луннэзӧ вуджӧ́р моз ӧшӧны,
ме турун моз косьми.
13 Но Тэ, Дӧсвидзисьӧ, пыр олан.
Отирыс Тэнӧ тӧдвыланыс видзӧны,
айез челядьлӧ Тэ йылісь висьтасьӧны.
14 Тэ лэбтісян да жалейтан Сион карсӧ.
Локтіс кад сы дынӧ лоны небыт сьӧлӧмаӧн,
локтіс сія кадыс.
15 Тэнат раббет Сион карлісь
нельки иззэсӧ радейтӧны,
сылісь буссӧ жалейтӧны.
16 Отиррез пондасӧ повны Дӧсвидзисьлӧн нимись,
му вылісь ӧксуэз ─ Сылӧн югьялӧ́мись.
17 Дӧсвидзисьыс эд Сионсӧ вились лэбтас
да Аслас югьялӧ́мӧн локтас.
18 Вынтӧммезлісь кеймӧ́мсӧ Сія кылас,
нылісь кеймисьӧ́мсӧ оз пукты абутӧм туйӧ.
19 Эта йылісь гижасӧ одзланься отирлӧ,
одзланься оліссез пондасӧ ошкыны Дӧсвидзисьсӧ.
20 Дӧсвидзись видзӧтӧ вылісянь, Аслас вежаинсянь,
Сія енӧжсянь нёджжалӧ мусӧ,
21 медбы кывны домӧттэзын мырсиссезлісь ойзӧ́мсӧ
да мездыны нiйӧ, кӧднӧ мӧдӧны вийны.
22 Сион вылын висьталасӧ Дӧсвидзисьлісь нимсӧ,
Сійӧ пондасӧ ошкыны Ерусалимын,
23 кӧр сэтчӧ отиррез ӧксясӧ,
быд муын оліссез Сылӧ кысъявны локтасӧ.
24 Сія менӧ одз садьтӧмсьӧтіс,
ола́н луннэзӧс менчим джендӧтіс.
25 Ме висьталі:
«Менам Енӧ, эн на босьт менӧ,
ме эд мортлісь дзир джын ола́нсӧ олі.
Тэ эд пырся-пыр олан.
26 Дӧсвидзисьӧ, медодз Тэ керин мусӧ,
и енӧжыс керӧм Тэнат киӧн.
27 Нiя ӧшасӧ, а Тэ пыр олан.
Сія быдӧс паськӧм моз бырас.
Тэ нiйӧ паськӧм моз вежан,
и нiя вежсясӧ.
28 Но Тэ пыр ӧткодь,
Тэнат ола́н луннэт озӧ орӧ.
29 Тэнат раббезлӧн челядьыс пондасӧ лӧня овны,
нысянь чу́жӧм отирыс пыр лоасӧ Тэнат син одзын».
*а 101:10-11 сёйны пӧим ─ Библияын «пӧим» кыв висьталӧ тӧждісьӧ́м да умӧль керӧ́м понда жалитӧ́м йылісь.
Глава 101
