Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
117 Псалом
[Аллилуйя!]1 Ошкӧ Дӧсвидзисьсӧ,
Сія эд бур, Сія пыр небыт сьӧлӧма.
2 Израиль отир ась висьталӧ:
«[Сія бур,] Сія пыр небыт сьӧлӧма».
3 Ааронлӧн увтыр ась висьталӧ:
«[Сія бур,] Сія пыр небыт сьӧлӧма».
4 Дӧсвидзисись поліссез ась висьталӧны:
«[Сія бур,] Сія пыр небыт сьӧлӧма».
5 Сьӧкыт кадӧ ме кеймиси Дӧсвидзисьлӧ,
и Сія менӧ кыліс,
умӧльсис петны меным туйсӧ осьтіс.
6 Дӧсвидзисьыс ме дор,
меным нем повны.
Мый вермас керны меным мортыс?
7 Меным Отсасисьыс ─ Дӧсвидзись,
и ме повтӧг понда видзӧтны
менӧ дзескӧтліссез вылӧ.
8 Морт вылӧ надейтчӧ́мся
буржык надейтчыны Дӧсвидзись вылӧ.
9 Буржык надейтчыны Дӧсвидзись вылӧ,
нежели надейтчыны юраліссез вылӧ.
10 Мӧдік муэзісь отир кытшӧвтісӧ менӧ,
но Дӧсвидзись нимӧн ме нiйӧ верми.
11 Нiя быд ладорсянь кытшӧвтісӧ менӧ,
но Дӧсвидзись нимӧн ме нiйӧ верми.
12 Нiя мошшез моз менӧ кытшӧвтісӧ,
но сотча́н жельнӧгись би моз чожа мыйись ӧшисӧ.
Дӧсвидзись нимӧн ме нiйӧ верми.
13 Нiя менӧ быд вынісь тойыштісӧ, медбы ме уси,
но Дӧсвидзисьыс менӧ видзис.
14 Дӧсвидзисьыс ─ менам вынӧ да сьыланкы́лӧ.
Сія менӧ мездiс.
15 Веськыта оліссезлӧн керкуэзын
мезмӧ́мсянь гажӧтча́н шы кылӧ:
«Дӧсвидзисьлӧн веськыт киись
вына керӧ́ммез петӧны!
16 Дӧсвидзись веськыт кисӧ лэбтӧм.
Дӧсвидзисьлӧн веськыт киись
вына керӧ́ммез петӧны!»
17 Ме ог кув, но понда овны
да висьтасьны Дӧсвидзисьлісь керӧ́ммесӧ.
18 Дӧсвидзись менӧ зубыта вачкис,
но эз лэдз меным кувны.
19 Осьтӧ меным Веськыта Олісьлісь ыбӧссэсӧ!
Ме пыра Вежа Керкуӧ да ошка Дӧсвидзисьсӧ.
20 То, Дӧсвидзисьлӧн ыбӧссэз,
сэті пырасӧ веськыта оліссез.
21 Ме ошка Тэнӧ,
Тэ эд менӧ кылін да мездiн.
22 Изыс, кӧдӧ керку лэбтіссез
абутӧм туйӧ пуктісӧ,
лоис пельӧс изӧн
*а.
23 Сійӧ керис Дӧсвидзись.
Миян синнэзлӧ сія диво.
24 Этӧ лунсӧ аркмӧтіс Дӧсвидзись.
Сія лунӧ гажмам да пондам гажӧтчыны.
25 Дӧсвидзисьӧ, мезды миянӧс!
Дӧсвидзисьӧ, отсав миянлӧ быдӧс бура керны!
26 Дӧсвидзись нимӧн Локтісьыс бласлӧви́тӧм!
Дӧсвидзисьлӧн керкусянь мийӧ тіянӧс бласлӧви́там.
27 Дӧсвидзисьыс ─ Ен.
Сія миянӧс югдӧтіс.
Вежалунӧ подасӧ вайӧтӧ,
езъяланiнлӧн сюррез бердӧ геззэзӧн домалӧ.
28 Тэ менам Ен, ме Тэнӧ понда ошкыны!
Тэ менам Ен, ме Тэнӧ понда сьылӧтны!
[Понда ошкыны Тэнӧ,
Тэ эд менӧ кылін да мездiн.]
29 Ошкӧ Дӧсвидзисьсӧ,
Сія эд бур, Сія пыр небыт сьӧлӧма!
Ошкӧ́м.
*а 117:22 пельӧс из ─ краеугольный камень
Глава 117
