Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
144 Псалом
Давидлӧн ошка́н сьыланкы́в.1 Енӧ менам, Ӧксуӧ [менам],
Тэнӧ сьылӧта,
Тэнчит нимтӧ пырся-пыр ошка.
2 Быд лун Тэнӧ буркы́вта,
Тэнчит нимтӧ пырся-пыр сьылӧта.
3 Дӧсвидзисьыс вына,
Сійӧ пыр колӧ ошкыны.
Сылісь ыджыт юрала́н вынсӧ
и вежӧртны он вермы.
4 Тэнат керӧ́ммет йылісь
айез челядьлӧ пыр пондасӧ висьтасьны,
Тэнчит ыджыт вынтӧ нiя пондасӧ ошкыны.
5 Тэнат юрала́н выныт да югьялӧ́мыт ыджытӧсь!
Тэнат керӧ́ммезсянь диво кутӧ!
Ме сійӧ быдӧс понда юрам бергӧтлыны.
6 Отир пондас баитны
Тэнат вына повзьӧта́н керӧ́ммез йылісь.
А ме понда баитны,
кытшӧм Тэ вына-ыджыт Юралісь.
7 Отир пондас висьтасьны
Тэнат ыджытся-ыджыт бур керӧ́ммез йылісь,
пондас сьылӧтны Тэнчит веськыта керӧ́мметӧ.
8 Дӧсвидзись небыт сьӧлӧма да ёна радейтісь,
ыджыт мылаа да ӧддьӧн жалейтісь.
9 Дӧсвидзисьыс бур быдӧнныскӧт,
Сія небыт сьӧлӧма Аслас быд аркмӧтӧ́м дынӧ.
10 Дӧсвидзисьӧ,
Тэнат быдӧс аркмӧтӧ́ммет Тэ йылісь висьтасясӧ.
Тэнат надейнӧй отирыт Тэнӧ ошкасӧ.
11 Нiя пондасӧ висьтасьны
Тэнат юралӧ́млӧн югьяла́н вын йылісь,
юӧртасӧ Тэнат вына керӧ́ммет йылісь.
12 Сэк отирыс пондасӧ тӧдны
Тэнат вына керӧ́ммет йылісь
да Тэнат юралӧ́млӧн югьяла́н вын йылісь.
13 Тэнат юралӧ́мыт пырся-пыр лоас,
быд кадӧ оліссез Тэнат кипод увтын лоасӧ.
[Дӧсвидзисьыс Ассис висьталӧм кыввесӧ некӧр оз веж.
Сія вежа,
эта йылісь висьталӧны Сылӧн быдӧс керӧ́ммес.]
14 Дӧсвидзисьыс видзӧ усьӧммесӧ,
Сія лэбтӧ уськӧтӧммесӧ.
15 Быдӧнныслӧн синнэзныс Тэ вылӧ видзӧтӧны,
Тэ вылӧ нiя надейтчӧны,
и Тэ аскадӧ нылӧ сёя́н сетан.
16 Тэ Ассит китӧ осьтан
и ловья оліссесӧ быдӧннысӧ
Аслат небыт сьӧлӧмсянь вердан.
17 Дӧсвидзись быдӧс веськыта керӧ.
Сылӧн быдӧс керӧ́ммезісь адззам:
Дӧсвидзисьыс бур.
18 Дӧсвидзись матын быдӧнныс дынӧ,
кӧдна Сійӧ корӧны отсавны,
кӧдна Сійӧ сьӧлӧмсянь корӧны.
19 Сыись поліссезлӧ мый колӧ, Сія сетӧ.
Нылісь герьясьӧ́мсӧ
*а Сія кылӧ да мездӧ.
20 Дӧсвидзись Сійӧ радейтіссесӧ быдӧннысӧ видзӧ,
а Ентӧг оліссезлісь ола́ннысӧ орӧтас.
21 Аслам ӧмӧн ме понда ошкыны Дӧсвидзисьсӧ.
Тэнчит вежа нимтӧ ась ошкӧны
ловья оліссес быдӧнныс пырся-пыр!
Ошкӧ́м.
*а 144:19 герьясьӧ́м ─ вопль
Глава 144
