Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
67 Псалом
1 Сьыліссезӧн веськӧтлісьлӧ. Давидлӧн сьыла́н псалом.2 Енӧ, лэбтісь, Тэныт паныт муніссесӧ вашӧт!
Ась пышшӧны Тэ одзись быдӧнныс,
кӧдна пельӧн бы озӧ кывзӧ Тэ йылісь!
3 Тэ нійӧ паськӧт!
Aсь тшын моз паськалӧны!
Кыдз масісь сылӧ бисянь,
сідз Ентӧг оліссез Енлӧн чужӧ́м одзись ӧшасӧ.
4 А веськыта оліссез гажмасӧ,
пондасӧ гажӧтчыны
да Енсӧ гажӧн сьылӧтны.
5 Сьылӧ миян Енлӧ,
сьылӧтӧ Сылісь нимсӧ!
Ошкӧ енӧжӧт Ветлӧтісьсӧ!
Сылӧн нимыс ─ Дӧсвидзись.
Сы одзын гажӧтчӧ!
6 Еныс олӧ Аслас вежа оланінын.
Сія айтӧм-мамтӧммезлӧ Ай,
дӧваэзлӧ ─ Дорйись.
7 Ӧтікӧн оліссезлӧ Еныс оланін сетӧ,
дорӧммезӧс чижовкаись
*а мездӧтӧ,
а кывзісьтӧммез кольччӧны овны
шондіӧн сотӧм кушмуын.
8 Енӧ, кӧр Тэ Аслат отир одзын мунiн,
кӧр кушмуӧт оськалін,
9 сэк муыс зэгаліс,
енӧжсянь зэр киссис.
Израильлӧн Ен чужӧ́мсянь Синай керӧс зэгаліс.
10 Енӧ, Ассит мутӧ Тэ уна зэрӧн киськавлін.
Кӧр муыс вынтӧмсявліс, Тэ сійӧ вильмӧтлін.
11 Сэтчин пондіс овны Тэнат отирыт.
Енӧ, Аслат бур сьӧлӧмсянь
Тэ сетлін умӧля олісьлӧ быдӧс коланасӧ.
12 Дӧсвидзись висьталӧ кыв,
а инькаэз унаӧн юӧртӧны Сылісь кывсӧ:
13 «Тышкасиссезлӧн ӧксуэз пышшӧны,
а тышкасьӧ́м коста шедӧм берсясӧ
*б гортын пукалісь инькаэз янсӧтӧны.
14 Асланыт оланіннэзын тійӧ лоит дудіоккез кодьӧсь,
кӧдналӧн борддэзныс вевттьӧмӧсь эзы́сьӧн,
тыввезныс
*в ─ сӧстӧм зарниӧн
*г».
15 Кӧр Дӧсвермисьыс паськӧтіс ӧксуэсӧ му пасьта,
сэк муыс чочкоммис,
кыдз лымсянь чочкоммӧ Селмон керӧсыс.
16 Васан керӧс ─ Енлӧн керӧс,
Васан керӧс ─ вылын керӧс.
17 Вылын керӧссэз,
мый тійӧ видзӧтат да завидуйтат сія керӧслӧ,
кӧдӧ Еныс бӧрйис Аслыс оланінӧн?
Дӧсвидзисьыс сэтӧн пыр пондас овны.
18 Енлӧн колесницаэс унася-уна, лыдтӧмӧсь.
Синай керӧс вывсянь
Дӧсвидзись Аслас вежаинӧ локтіс.
19 Дӧсвидзисьӧ, Тэ вылӧ кайин,
домалӧммесӧ сьӧрат нуӧтін.
Тэ босьтін козиннэз, медбы сетавны отирлӧ,
медбы и паныт муніссез
*д коласісь мукӧдыс
вермисӧ овны Дӧсвидзись Ен дынын.
20 Дӧсвидзисьлӧ ошкӧ́мыс быд лунӧ горалӧ.
Еныс миянлӧ сьӧкыт ноп
*е сетӧ
да Ачыс жӧ и мездӧ.
21 Миян Енным ─ мездӧтісь Ен.
Дӧсвидзисьыс ─ Дӧсвермись,
Сія мездӧ миянӧс кулӧ́мись.
22 Ен вылӧ лэбтісьӧммезлісь
Сія юррезнысӧ поткӧтлас,
юрсиа юр пыдӧссэзнысӧ нылісь,
кӧдналӧн лёк керӧ́ммезныс юр вевдӧрӧдз кайисӧ.
23 Дӧсвидзись висьталіс:
«Ме нійӧ Васанісь вайӧта,
саридз пытшкись петкӧта.
24 Сэк тэ, Менам отирӧ,
тэ вылӧ лэбтісьӧммезлӧн вирӧ коккетӧ вӧтян,
а поннэт нылісь вирсӧ лакасӧ».
25 Енӧ, Тэнат гажӧтча́н отирлісь мунӧ́мсӧ
быдӧнныс адззылісӧ,
Енлӧн, менам Ӧксулӧн, отирлісь
гажӧтчӧмӧн вежаинӧ локтӧ́мсӧ.
26 Одзас мунісӧ сьыліссез,
бӧрас ─ быдкодь орса́ннэз вылын орсіссез,
а шӧрас тимпаннэз
*ж вылын орсісь нывкаэз.
27 «Ӧксьӧм отир, ошкӧ Енсӧ!
Израиль отир, ошкӧ Дӧсвидзисьсӧ!»
28 Быдӧннысӧ нуӧтӧ Вениаминлӧн медучӧт увтырыс.
Сы бӧрын Иуда увтырлӧн веськӧтліссез унаӧн,
Завулон да Неффалим увтыррезлӧн веськӧтліссез.
29 Енным одззасянь ни шуис
миянлӧ лоны вынаэзӧн.
Енным, Тэ и одзлань миянӧс вынсьӧт!
30 Ерусалимас Тэнат Вежа Керку понда
ӧксуэз ваясӧ Тэныт козиннэз.
31 Раммӧт ва дор турунісь вӧрпасӧ,
куканнез коласісь пороз чукӧрсӧ,
кӧдна ошшасьӧны асланыс эзы́сьӧн.
Рознит отирсӧ,
кӧдна пыр бы тышкасьӧны.
32 Египетісь ӧксуэз локтасӧ,
Эфиопияись отир Енланьӧ киэзнысӧ нюжӧтасӧ.
33 Му вылісь ӧксуэз,
асланыт отиркӧт сьылӧ Еныслӧ,
сьылӧтӧ Дӧсвидзисьсӧ,
34 Кӧда пырся енӧжжез вылӧт ветлӧтӧ.
Кывзӧ, Сія Аслас вына шыӧн баитӧ!
35 Ошкӧ Енсӧ!
Сія ─ Израильлӧн ыджыт вына Юралісь,
Сылӧн ыджыт выныс ─ кымӧррезӧдз.
36 Енӧ, Аслат вежаинын Тэ ӧддьӧн полӧтісь Ен.
Тэ ─ Израильлӧн Ен.
Тэ Аслат отирлӧ сетан садь да вын.
Ошкӧ Енсӧ!
Ошкӧ́м.
*а 67:7 чижовка ─ тюрьма
*б 67:13 тышкасьӧ́м коста шедӧм берся ─ военная добыча
*в 67:14 тыв ─ перо
*г 67:14 зарни ─ золото
*д 67:19 паныт мунісь ─ противник
*е 67:20 ноп ─ бремя
*ж 67:26 тимпан ─ бубен кодь орса́н
Глава 67
