Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 12
Быльсӧ баитісь Дӧсвидзисьлӧ сьӧлӧмви
1 Кин радейтӧ велӧтӧ́мсӧ,
сія радейтӧ уна тӧдӧ́мсӧ.
А кин ӧмалӧ́мсӧ
*а пӧв пельӧн оз кывзы,
сія нем оз тӧд.
2 Рам морт Дӧсвидзисьлӧ сьӧлӧмви,
а гусьӧн умӧльсӧ керисьӧс Сія судитас.
3 Умӧльсӧ керӧ́мнас мортыс асьсӧ оз вынсьӧт,
а веськыта олісьлӧн вуджыс оз вӧрзьы.
4 Бур инь ─ аслас жӧниклӧ юркытш,
рожа кулись инь жӧниклісь лыэз
*б сісьтӧ.
5 Веськыта олісь лӧсьӧтчӧ веськыта керны,
Ентӧг олісь ─ гусьӧн умӧльсӧ керны.
6 Лёк керись аслас кылӧн вийны вермӧ,
веськыта олісьлӧн кылыс умӧлись мездӧ.
7 Ентӧг олісь вылӧ умӧльыс локтас кӧ,
сыись нем оз кольччы.
А веськыта олісьлӧн керкуыс сулалӧ.
8 Мортыс бур мывкыда кӧ, сійӧ ошкӧны.
А лэдзчисьӧм кӧ, сійӧ мортӧ озӧ пуктӧ.
9 Абутӧм туйӧ пуктӧм морт, кӧда сёян вылӧ шедтӧ,
буржык сы сьӧрті,
кӧда асьсӧ пуктӧ ыджыт мортӧ, но тшыгьялӧ.
10 Веськыта олісь и аслас пода понда тӧждісьӧ,
а Ентӧг олісь чорыт сьӧлӧма.
11 Кин аслас му вылын гӧрӧ-кӧдзӧ,
сія няньсӧ пӧттӧдз сёйӧ.
Кин весь олӧ, сія мортыс ылӧстӧм.
Кин сьӧлӧмсӧ бурмӧтӧ вина юӧ́мӧн да кадсӧ ӧштӧ́мӧн,
сія гортіссесӧ рожа куля́нӧдз вайӧтӧ.
12 Ентӧг олісь отирсӧ умӧльсӧ керны кыскӧ,
но веськыта олісьлӧн вуджыс бура видзсьӧ.
13 Лёк керисьӧс ӧмсис петӧм лёк кылыс кыйӧ,
а веськыта олісь умӧльсис петӧ.
[Рама видзӧтiсь дынӧ лоасӧ небыт сьӧлӧмаӧсь.
А кин мӧдікӧс суд вылӧ кыскӧ,
сія отирсӧ дзескӧтлӧ.]
14 Аслас бур кыввезсянь мортлӧ бурыс локтӧ,
мортлӧн керӧ́ммес сылӧ козинӧн бертасӧ.
15 Мывкыдтӧм морт ассис туйсӧ веськытӧн шуӧ,
а мывкыда морт туйдӧтӧ́мсӧ кывзӧ.
16 Мывкыдтӧм морт ассис лӧгсӧ сэтӧн жӧ мыччалас,
вежӧра мортӧс умӧльтасӧ кӧ, сія видзсьӧ.
17 Кин тӧдӧмӧн веськыта баитӧ, сія быльсӧ висьталӧ,
а бӧбӧтчись морт вӧвлытӧмсӧ висьталӧ.
18 Думайттӧг висьталӧ́мыс шыпурт
*в моз дойдӧ,
а мывкыда мортлӧн висьталӧ́мыс веськӧтӧ.
19 Быль кыввез пыр олӧны,
а бӧбӧта́н кыввез ─ недырик.
20 Умӧльсӧ керны лӧсьӧтчисьлӧн сьӧлӧмас ылӧтлӧ́м,
а отирӧс бурӧтісьлӧн ─ гаж.
21 Веськыта оліськӧт умӧльыс оз пет,
а лёк керисьлӧн ола́ныс умӧльнас тырӧм.
22 Бӧбӧтчисьыс Дӧсвидзисьлӧ сэрпӧсь морт,
а быльсӧ баитісьыс Сылӧ сьӧлӧмви.
23 Вежӧра морт тӧдӧ́мнас оз ошшась,
а вежӧрттӧм морт абутӧмсӧ баитӧ.
24 Бура уджалісь морт пондас юравны,
а дыш мортӧс пондасӧ сьӧкыта уджӧтны.
25 Тӧждісьӧ́мыс сьӧлӧм шог вайӧ,
а бур кывсянь мортыс гажмӧ.
26 Веськыта олісь ассис матісьсӧ туйдӧтӧ,
а Ентӧг олісьлӧн туйыс ӧштӧтӧ.
27 Дыш морт пӧтка
*г яйсӧ оз сёй,
а бура уджалісьлӧн пажытьыс ӧддьӧн уна.
28 Веськыта олӧ́млӧн туйыс вайӧтӧ ола́нӧ,
сія туй вылын кулӧ́мыс абу.
*а 12:1 ӧмалӧ́м ─ укор, упрёк
*б 12:4 лы ─ кость
*в 12:18 шыпурт ─ меч
*г 12:27 пӧтка ─ птица
Глава 12
