Библия
Выбрать язык
Книги Ветхого Завета
Книги Нового Завета
с русским текстом
ЕКЛЕСИАСТЛОН НЕБОГ
Глава 5
1 Ӧмтӧ осьтны эн тэрмась,
Ен одзын висьтавтӧдз юрат бергӧтлы,
мый мӧдан висьтавны да вӧлись баит.
Тэ му вылын, а Еныс эд енӧжын.
Сійӧн унасӧ эн баит.
2 Вӧттэз адззӧны уна тӧждісьӧ́мсянь,
а мывкыдтӧмсӧ тӧдан уна баитӧ́м сьӧрті.
3 Ен одзын кывтӧ сетiн кӧ, тэрмась керны.
Мывкыдтӧм морт эд абу Сылӧ сьӧлӧмви.
Сідзкӧ, мый кӧсйисин, сійӧ кер.
4 Кӧсйисин кӧ да эн кер, сія умӧль.
Буржык, он кӧ кӧсйись.
5 Кылытлӧ эн лэдз пыртны тэнӧ умӧляс.
[Енлӧн] вежауджалісь
*а одзын эн шу,
ме пӧ сораси.
Мыйлӧ тэныт Енсӧ кывнат лӧгӧтны,
медбы сія разис быдӧс, мый тэ керин?
6 Уна вӧтыс да уна баитӧ́мыс ─ быдӧс весись.
А тэ Енiсь пов!
Быд юралісь сьӧрын видзӧтӧ мӧдік юралісь
7 Кытӧнкӧ верман казявны: дзескӧтлӧны пажытьтӧмӧс, судитӧны туйдӧт вылӧ видзӧттӧг, озӧ керӧ, кыдз колӧ. Сысянь тэнӧ диво ась оз кут.
Юралісь вылын эм мӧдік юралісь,
кӧда видзӧтӧ сы сьӧрын,
а ны вылын эм ыджытжык юралісь.
8 Буржык сія муын,
кытӧн ӧксу тӧждiсьӧ аслас му понда.
Уна пажыть шудсӧ оз вай
9 Кин радейтӧ сьӧм
*б,
сылӧ сія пыр оз тырмы.
Кин радейтӧ уна пажыть,
сія некӧр оз пӧтлы.
И сія весись педзӧ́м.
10 Содӧ пажыть, содӧны и сійӧ видзиссез.
Мый сэтiсь бурыс пажытьсӧ ӧктiсьлӧ?
Кольччӧ дзир видзӧтны сы вылӧ!
11 Уджалісь пӧт я, тшыг я,
чӧскыт онӧн узьӧ.
Уна пажытя морт пӧттӧдз сёйӧ,
а онмӧссьыны оз вермы.
12 Шонді увтас ме адззылі этӧ ӧддьӧн умӧльсӧ: сьӧм-пажыть ӧктӧ́м, кӧда ӧктiсьыслӧ бурсӧ оз вай.13 Кытшӧмкӧ умӧль лоӧ́мсянь сія быдӧс ӧктӧмсӧ ӧштӧ и сылӧ нем кольны шогмӧм зонлӧ.14 Мортыс мам кынӧмись куш петӧ, сідз кушӧн и му вылісь мунӧ. Сія мырсьӧмӧн уджаліс, но мунтӧнняс и киӧ нем оз босьт.15 Кытшӧм сія локтiс, сэтшӧм и мунӧ. Мортлӧ мый бурыс мырсьӧмӧн уджалӧ́мсянь? Дзир весь вын песӧ́м.16 А сылӧн быдсӧн ола́ныс муніс пемытын: сія лӧгаліс, пессис-мырсис, тӧждiсис.
17 Ме казялі: шонді увтын олӧ́м коста мортлӧ медбурыс ─ Ен сетӧм дженытик ола́нын сёйны-юны да аслас уджӧн бурмӧтны сьӧлӧмсӧ. Мортлӧн эд сэтшӧм ола́н пайыс.18 Кинлӧ Ен сетiс сьӧм, уна пажыть, морт вермӧ сійӧ видзны ас вылӧ, вермӧ босьтны ассис пайсӧ да сьӧлӧмсӧ бурмӧтны керӧм уджӧн. Мортлӧ сія ─ Енсянь козин.19 Еныс сетӧ мортлӧ удж да сылісь сьӧлӧмсӧ тыртӧ гажӧн. Сэк мортлӧн абу кадыс тӧждісьны аслас ола́н луннэз понда.
*а 5:5 Еврейскӧй кыв позьӧ вуджӧтны и кыдз «ангел».
*б 5:9 сьӧм ─ деньги
Глава 5
