Выбрать язык
Книги Ветхого Завета
Книги Нового Завета
с русским текстом1Гижӧ Павел, Кристос Исуслӧн раб. Менӧ бӧрйис Еныс. Сія сувтӧтіс менӧ нуӧтны апостоллісь удж ─ юӧртны отирлӧ Ассис Бур Юӧрсӧ.2Сійӧ Юӧрсӧ Еныс одзжык кӧсйӧм вӧлі Аслас юӧртіссез пыр. Нылӧн висьтавлӧммес гижӧмась Вежа Гижӧттэзын*а.3Бур Юӧрыс висьтасьӧ Енлӧн Зон йылісь. Шогмӧмыс сьӧрті Сія вӧлі Давид увтырись.4А Вежа Лов сьӧрті Сія ─ Енлӧн вына Зон, Кристос Исус, миян Дӧсвидзись. Эта быдӧс оссис Сылӧн ловзьӧм пыр.
5Кристос пыр Еныс сетіс миянлӧ бурсетӧмсӧ*б да апостоллісь уджсӧ: мийӧ Кристос нимӧн быд кыв вылын баитісь йӧзсӧ вайӧтам веритӧмӧдз да Енсӧ кывзісьӧмӧдз.6Ӧні и тійӧ пондіт веритны, Кристос Исусыс тіянӧс корис да.7Гижа Римын оліссезлӧ, Енлӧн дона отирлӧ. Тійӧ ─ Сылӧн бӧрйӧм вежа отир. Бурсетӧм да лӧнь олан*в тіянлӧ Ен Айнымсянь да Дӧсвидзись Кристос Исуссянь!
8Медодз висьтала: Кристос Исус нимӧн буркывта*г ассим Енӧс быдӧнныт понда. Кристослӧ веритӧмныт йылісь юӧрыс паськалӧ эд муыс пасьта.9Еныс тӧдӧ, ме пыр видза тіянӧс тӧдвылам. Сылӧ ме кысъяла*д. Быдсӧн лолӧс пукта Сы уджӧ, висьтася Ен Зон йылісь Бур Юӧрсӧ.10Кеймикам пыр кора Еныслісь, медбы ме верми кӧркӧ вовлыны тіян дынӧ, но ась быдӧс лоас, кыдз Енлӧ колӧ.11Ме тіянӧс ӧддьӧн бы адззыла. Ловсянь босьтӧм бурсетӧмись мӧда тіянлӧ мымдакӧ сетыштны да сійӧн тіянӧс вынсьӧтны.12Пантасиканым мийӧ вермам ӧтамӧднымлісь бурмӧтны*е сьӧлӧммезнымӧс Кристослӧ веритӧмнаным.
13Висьтала тіянлӧ: ме унаись лӧсьӧтчывлі локны тіян дынӧ, но ӧнӧдз менӧ пыр мыйкӧ падмӧтлывліс. Ме и тіян дынын мӧда адззыны велӧтӧмсим бур воӧмсӧ*ж мӧдік отирын моз.14Меным колӧ висьтасьны Бур Юӧрсӧ быдӧнныслӧ: греккезлӧ, мӧдік муэзісь йӧзлӧ, мывкыдаэслӧ да етша мый тӧдіссеслӧ.15Сійӧн ме лӧсьӧтчи висьтасьны Бур Юӧрсӧ и тіянлӧ, Римын оліссезлӧ.
16Меным абу рожа кулян висьтасьны Кристосыс йылісь Бур Юӧрсӧ. Бур Юӧрыс эд Енлӧн вын, мездӧ быд веритісь мортсӧ: медодз иудейесӧ, сэсся ─ быд кыв вылын баитісь отирсӧ.17Бур Юӧрыс мыччалӧ, кыдз Еныс керӧ мортсӧ веськыта олісьӧн веритӧмыс понда да веритӧмыс пыр. Вежа Гижӧтас тай шуӧм: «Веськыта олісьыс*з веритӧмнас пондас овны».
18Отирыс бӧбӧтчӧмнаныс Еныслісь быльсӧ пӧдтӧны. Сійӧн Еныслӧн лӧгыс енӧжсянь оссьӧ быд умӧль керӧмлӧ да бӧбӧтчӧмлӧ.19Мый позьӧ тӧдны Еныс йылісь, нія тӧдӧны. Сія эд нылӧ сійӧ мыччаліс.20Отирыслӧ Еныслӧн бырсьывлытӧм выныс мыччалӧм мусӧ керӧмсянь ни. Сія тыдалӧ быдӧс аркмӧтӧмын*и. Отирыслӧ оссьӧ тыдавтӧмыс: Аркмӧтісьыс и эм былись Еныс. Сідзкӧ, отирыс асьнысӧ озӧ вермӧ дорйыны Еныс одзын.
21Нія Енсӧ тӧдікӧ эзӧ ошкӧ Сійӧ кыдз Енӧс, эзӧ буркывтӧ Сійӧ, асланыс юрӧ пыртісӧ, кӧдӧ оз ков. Сійӧн дзугсис-ӧшис нылӧн вежӧрныс.22Ас йывсиныс нія шуисӧ, мийӧ пӧ мывкыдаӧсь. Асьныс тай вежӧрнысӧ ӧштісӧ.23Пырся Енсӧ коліс ошкыны. Нія Сы туйӧ асьныс аслыныс керисӧ еннэсӧ: кулан морт да кай коддезӧ, нёль кокаэз да виклясись коддезӧ. Нылӧ пондісӧ копрасьны.24Сійӧн Еныс колис нійӧ керны сьӧлӧмсиныс петӧмсӧ ─ ӧзйӧтчӧмныс*к сьӧрті сэрпӧсьсӧ. Сысянь асьныс сэрпӧсьтісӧ ассиныс вывтырнысӧ.25Еныслісь быльсӧ нія вежисӧ бӧбӧтчӧм вылӧ. Нія копрасисӧ да уджалісӧ аркмӧтӧмыслӧ. Эзӧ копрасьӧ Аркмӧтісьыслӧ, Кӧдӧ колӧ ошкыны пырся-пыр! Аминь.26Сійӧн Еныс колис нійӧ сьӧлӧмныс ӧзйӧтчӧм сьӧрті рожа кулянсӧ керны. Нылӧн инькаэзныс гозъя коласын лӧсьӧтӧм олансӧ вежисӧ. Керӧны ковтӧмсӧ ─ ӧтамӧдкӧт узьлӧны.27Сідз и ай отир озӧ олӧ колана моз инькаэзныскӧт. Нія ӧтамӧдныс вылӧ асьнысӧ ӧзйӧтӧны. Ай морт ай морткӧт узьлӧ. Ылалӧмныс кузя сэрпсӧ керӧны. Сійӧн сэрпсӧ керӧмныс понда ассяняныс умӧльсӧ босьтӧны.
28Нія эзӧ тӧждісьӧ видзны Енсӧ юраныс. Сійӧн Еныс колис нійӧ керны ковтӧмсӧ тшыксьӧм вежӧрнаныс.29Нія озӧ вермӧ овны умӧльсӧ кертӧг: кыскасьӧны, ылӧтлӧны, горшасьӧны*л, лӧгалӧны, вийӧны, видчӧны, бӧбӧтчӧны, нійӧ завидныс кутӧ, быдлаын лӧгныс вермӧ.30Нія син сайын морт йылісь умӧля баитӧны, морт вылӧ весись висьтавлӧны, Ен йылісь пельӧн бы озӧ кылӧ, отирыс вылын ыждалӧны. Нія асьнысӧ ошкӧны, вылына пуктӧны, ай-мамӧс озӧ кывзісьӧ, умӧльсӧ быдмоза кужӧны керны.31Нія мывкыдтӧмӧсь, чорыт сьӧлӧмаӧсь, сетӧм кывнысӧ озӧ видзӧ, отирлӧ озӧ отсасьӧ, нылӧн абу радейтӧмныс.32Енлӧн веськыта висьталӧм сьӧрті нія тӧдӧны, мый нійӧ видзчисьӧ умӧльсӧ керӧмныс понда. Сэтшӧмсӧ кериссезлӧ кольччӧ дзир кулӧм. Но нія асьныс умӧльсӧ керӧны да и ошкӧны умӧльсӧ кериссесӧ.
*а 1.2 Вежа Гижӧттэз ─ Святые Писания
*б 1.5 бурсетӧм ─ благодать
*в 1.7 лӧнь олан ─ мир
*г 1.8 буркывтны ─ благодарить
*д 1.9 кысъявны ─ служить
*е 1.12 бурмӧтны сьӧлӧм ─ утешить, успокоить сердце
*ж 1.13 воӧм ─ плод
*з 1.17 веськыта олісь ─ праведный
*и 1.20 аркмӧтӧм ─ сотворение
*к 1.24 ӧзйӧтчӧм ─ похоть
*л 1.29 горшасьны ─ жадничать
Глава 1