Выбрать язык
Книги Ветхого Завета
Книги Нового Завета
с русским текстом1Раббес, йӧз кипод увтын уджаліссес, ассиныс кӧзяиннэзнысӧ ась бурӧ пуктӧны, медбы отирыс эзӧ вермӧ умӧля баитны Еныс йылісь да миян велӧтӧм йылісь.2Кинлӧн кӧзяиныс веритісь морт, сійӧ оз ков абутӧм туйӧ пуктыны, сія эд вон. Веритісь кӧзяиныслӧ колӧ ӧддьӧн бура уджавны, сія эд дона да надейнӧй морт да и ачыс сія бурсӧ керӧ. Этаӧ велӧт, сідз туйдӧт.
3Кин оз велӧт миян Дӧсвидзись Кристос Исуслӧн веськыта висьталӧм кыввезӧ да Енлӧ юрбитӧмӧ, сылӧн велӧтӧмыс нуӧтӧ мӧдӧрӧ.4Сія асьсӧ вылына лэбтӧ, нем оз вежӧрт. Сія кутчисьӧ етшасьны да кывнас вермасьны. А сысянь петӧ завидуйтӧм, видчӧм, умӧльтӧм, морт йылісь умӧльӧ юрӧ пыртӧм5да тшыксьӧм вeжӧра отир коласын дугдывтӧг пинясьӧм. Нія эд вунӧтісӧ быльсӧ. Енлӧ юрбитӧмыссянь нія мӧдӧны богатсявны. Сэтшӧм отир дынісь ылынжыка видзсьы.
6Мортыс юрбитӧ кӧ Енлӧ да долыта олӧ сійӧн, мый эм, ─ эта сылӧ дона тор.7Му вылас эд мийӧ нем эгӧ вайӧ и сьӧраным босьтны нем огӧ вермӧ.8Эм кӧ миян сёян да паськӧм, сійӧн пондам долыта овны.9Кӧдна мӧдӧны богатсявны, нія шедӧны быдкодь ылалӧмас, мывкыдтӧм да ковтӧм умӧль ӧзйӧтчӧмас, кыдз налькӧ. Нія мортсӧ тшыкӧтӧны да вайӧтӧны кулӧмӧдз.10Быд умӧльыслӧн вуджыс ─ сьӧм радейтӧм. Мукӧдыс сьӧм ӧктӧмас ловнысӧ пуктӧм кузя веритӧмсис ылалісӧ мӧдӧрӧ. Нія асьнысӧ воштісӧ быдкодь мырсьӧм-тӧждісьӧмӧдз.
11Тэ Енлӧн морт, этаись пышшы. Тэ вынсяв Ен сьӧрті веськыта олӧмат*а, Енлӧ юрбитӧмат, веритӧмат, радейтӧмат, ыджыт мылаӧн да рама видзсьӧмат.12Кутчы пессьыны Кристослӧ веритӧм понда, видзсьы пырся оланыс бердӧ, кытчӧ тэнӧ Еныс корис. Уна отир одзын тэ эд бура висьтасин веритӧмыт йылісь.13Мийӧ сулалам быдӧслӧ олан сетісь Ен одзын да Кристос Исус одзын, Кӧда Ачыс висьтасис быльсӧ Понтий Пилатлӧ. Ны одзын ме и кора, и тшӧкта тэнӧ:14Дӧсвидзись Кристос Исусным локтытӧдз быдӧс кер менам велӧтӧм сьӧрті сӧстӧма да бура.15Кристослӧн локтӧмыс аскадӧ лоас.
Сійӧ аркмӧтас дзир ӧтік ошкӧм Еныс,
Сія ӧксуэзлӧн Ӧксу,
юраліссезлӧн Юралісь.
16Сія эд ӧтнас Пырсяыс.
Сылӧн югыт оланін дынӧ оз позь сибӧтчыны.
Сійӧ отирыс коласісь некин эз адззыв,
да и адззывны оз вермы.
Сылӧ вылына лэбтӧмыс,
Сылӧн юралӧмыс пырся-пыр. Аминь.
17Ӧння кадӧ бура оліссесӧ велӧт, ась нія асьнысӧ вылына озӧ лэбтӧ. Ась надейтчӧны Еныс вылӧ, озӧ сьӧмныс вылӧ. Сія эд быдӧс сетӧ тырмӧмви, медбы миянлӧ долыта овны.18Велӧт нійӧ бурсӧ керны. Нія ась богатсялӧны бура отсасьӧмнаныс, озӧ лоӧ надзӧсь*б, а отсасьӧны отирлӧ.19Сідз нія ӧктасӧ донася-донасӧ. Сія лоас одзланься кад кежас пуктӧм ён увтыс*в, медбы сюрны пырся оланас.
20Тимофей! Видз тэныт сетӧмсӧ. Эн кутчы ковтӧмсӧ баитны да етшасьны уна тӧдіссезкӧт, кӧдналӧн тӧдӧмныс абутӧм туйӧ.21Мукӧдыс сэтшӧм ылӧтан тӧдӧмныс кузя дугдісӧ веритны. Енлӧн бурсетӧмыс тэкӧт! Аминь.
*а 6.11 Ен сьӧрті веськыта олӧм ─ праведность
*б 6.18 надз ─ скупой
*в 6.19 ён увт ─ крепкое основание
Глава 6