Выбрать язык
Книги Ветхого Завета
Книги Нового Завета
с русским текстом1Миян Дӧсвидзись Кристос Исусным суд вылас пондас бӧрйисьны кулӧммескӧт да ловьяэскӧт. Сылісь локтӧмсӧ да Юралӧмсӧ тӧдвылам видзӧмӧн ме Кристос одзын да Ен одзын кора тэнӧ:2юӧрт Енлісь Кывсӧ, висьтась сійӧ быд кадӧ. Позьӧ я висьтасьны, оз я позь, тэ пыр висьтась. Быдӧс кер мыла быртӧг: отирсӧ туйдӧт, веськыта висьтавлы умӧль керӧмныс йылісь, ӧмав*а да велӧтӧмӧн вынсьӧт.3Лоас кад, кӧр отирыс бур велӧтӧмсӧ кывзыны озӧ пондӧ. Велӧтіссесӧ нія пондасӧ бӧрйыны ас сьӧртӧттяныс, медбы баитісӧ ны сьӧрті.4Быльсӧ кывзыны нія пеллезнысӧ тупкасӧ, кежасӧ абутӧмыс йылісь баитӧмсӧ кывзыны.5Тэ пыр ов садь вежӧрӧн, пессьӧм-мырсьӧм коста куж видзсьыны, висьтась Бур Юӧрсӧ, кер сетӧм уджсӧ.
6Локтіс кад меным мунны му вывсис, ме ─ езъяланін*б вылӧ пуктыны лӧсьӧтӧм козин кодь.7Ме бура песси, ассим олан туйӧс муні, веритӧмӧс эг ӧшты.8Ӧні меным лӧсьӧтӧм веськыта олӧмлӧн*в юркытш. Сійӧ юркытшсӧ меным сетас Дӧсвидзисьыс, Сія эд веськыта Судитісьыс. Аслас локтан Лунӧ Сія сетас юркытшсӧ меным да и быдӧнныслӧ, кӧдна радейтӧмӧн видзчисьӧны Сылісь локтӧмсӧ.
9Тэрмась чожажык локны ме дынӧ.10Димас тай сьӧлӧмнас лякасис му вылас олӧм бердӧ. Сія менӧ колис, муніс Фессалоникаӧ. Крискент муніс Галатияӧ, Тит ─ Далматияӧ. Мекӧт дзир Лукаыс.
11Марксӧ вайӧт сьӧрат. Меным уджам колӧ сылӧн отсӧтыс.12Тихиксӧ ме ысті Ефесӧ.13Локтікат вай менчим вевдӧрись паськӧмӧс. Ме сійӧ коли Карп ордын Троадаас. Вай небӧггесӧ*д, ӧддьӧнжык колӧны кучикись керӧммес.14Ыргӧннас*е уджалісь Александр меным уна керис умӧльсӧ. Дӧсвидзисьыс ась вештӧ сылӧ уджыс сьӧрті.15Сія ёна паныт сувтӧ миян кыввезлӧ. Сыкӧт и тэ видзсьы видзӧтчӧмӧн.
16Медодзза суд вылас, кӧр ме дорйи ачымӧс, мекӧт некин эз вӧв. Менӧ быдӧнныс колисӧ. Ась озӧ пуктӧ сійӧ нылӧ умӧль керӧмӧ.17Ачыс Дӧсвидзисьыс вовліс да отсаліс меным. Сія менӧ вынсьӧтіс, медбы ме верми быдсӧн висьтасьны Бур Юӧрсӧ. Сійӧ ась кылӧны быдпӧлӧс отирыс. Дӧсвидзисьыс мездіс менӧ левыс аннэзісь.18Сія и одзлань пондас мездыны менӧ быд умӧльсис да вайӧтас менӧ Аслас Енӧжись Юраланінӧ. Сылӧ пырся-пыр ошкӧм! Аминь.
19Месянь пым юӧр висьтав Прискиллалӧ Акилыскӧт да Онисифорыс гортын оліссезлӧ.20Ераст кольччис Коринфын. Трофимсӧ ме коли Милитын, сія пондіс шогавны да.21Тэрмась локны тӧлӧдззас. Юӧр тэныт ыстӧны Еввул, Пуд, Лин, Клавдия да воннэзным быдӧнныс.22Дӧсвидзись Кристос Исусыс ась лоас тэнат ловкӧт. Енлӧн бурсетӧмыс тіянкӧт! Аминь.
*а 4.2 ӧмавны ─ упрекать
*б 4.6 езъяланін ─ жертвенник
*в 4.8 веськыта олӧм ─ праведность
*г 4.9 тшӧктӧм ─ заповедь, повеление
*д 4.13 небӧг ─ книга
*е 4.14 ыргӧн ─ медь
Глава 4