Выбрать язык
Книги Ветхого Завета
Книги Нового Завета
с русским текстом1Ӣсус синагоган ōс та ёхтыс. Тот кāтэ тōслым хум ōлыс.2Тав нупылэ фарисейт суссыт: сабат-хōталт Ӣсус āгмыӈ хум пусмалтаӈкве патытэ мāн āти. Тōнт тāн Таве лю̄камтаӈкве вēрмияныл.3Ань кāтэ тōслым хум нупыл Ӣсус лāвыс:
— Нōх-лю̄лен, мāхумн сусылтахтэн.
4Тувыл Ӣсус тāнаныл китыгласанэ:
— Сабат-хōтал ёмас вāрмаль манос лю̄ль вāрмаль вāруӈкве рōви? Ань э̄лумхōлас лылытэ нэ̄гылттаӈкве манос порслаӈкве э̄ри?5Ӣсус тāн нупыланыл кантыӈысь āӈкватāлыс. Тав кāстал патыс. Тāн такем-та лю̄ль сымпа мāхмыг та ōлнэ̄ныл. Ӣсус та э̄лумхōлас нупыл лāвыс:
— Кāтын э̄лаль тактэ̄лын!
Тав кāтэ тактыстэ, кāтэ аквтысёс пусмыс.
6Фарисейт кон-квāлсыт ос Ирод-хōн мāхум ёт потыртахтаӈкве патсыт: Ӣсус хумус алуӈкве вēрмияныл.
7Ӣсус ханисьтахтын хумиянэ ёт ся̄рысь вāтан ё̄мантасыт. Тав юи-пāлэ̄т Галилея мāныл ос Юдея мāныл сака сāв мир минмыгтасыт.8Иерусалимныл, Идумеяныл, Иордан я̄ та-пāлныл, Тир ос Сидон ӯсыг мӯвлахи ōлнэ мир пуссын Тав палтэ йисыт. Тāн ань хӯлсаныл Ӣсус мāныр вāрыглāлыс.9Тав ханисьтахтын юртанэ̄н лāвыс: Тав мāгсылэ хāп вос сё̄питэ̄гыт. Сāв мир атхаты-ке, Таве ул вос марылтаве.10Тав сāв хōтпа пусмалтас, таимāгыс āгмыӈ мāхум пуссын Тав палтэ лайхатыгласыт Таве карссатаптуӈкве вос вēрминувыт.11Кулил вуим мāхум Таве кāсаламанылт Тав э̄лы-палэ̄нёл-вуськасахтасыт ос рōхсыт:
— Наӈ Тōрум Пы̄г!
12Ӣсус Тав ōвылтытэ потыртаӈкве тāнаныл ат тāртсанэ. Тāн ань вāсаныл, Тав хотъютыг ōлы.
13Ӣсус ханисьтахтын хумиянэ ёт ур алан нōххāхсыт.14Тав ётэ ōлуӈкве Ӣсус тāнанылныл китхуйплув хум пēрияс. Тав тāнаныл Ёмас Ля̄ххал потыртаӈкве кēтсанэ.15Тав тāнанылн āгмыӈ мāхум пусмалтан ос кулит кон-ня̄влын ё̄р мис.16Тав китхуйплув хōтпат пēрияс: Симон — Ӣсусын тав Пēтырыг намаявес, 17Зеведей-ōйка пыгаге Иоан ос Яков — Ӣсусын сяхыл кургын пыгы̄г намаявесы̄г.18Мōт хумиянэ намыл Андрей, Филипп, Варфоломей, Матфей, Фома, Алфей-ōйка пыге Яков, Фаддей, Симон Кананит19ос Искариот ӯсныл ōлнэ Иуда. Иуда тувыл Ӣсус тыналытэ.
20Хунь Ӣсус юв-ёхтыс, тув ос сāв мир атхатас. Таимāгыс Тав ханисьтахтын юртанэ тэ̄ӈкве ат вēр-мысыт.21Ӣсус рӯтанэ та урыл хӯлманылт тāн Таве пōхан вōвнэ мāгыс ёхтысыт, лāвсыт:
— Ӣсус пентым патыс.
22Иерусалим ӯсныл ёхтум сāккон тотнэ хумыт ōс лāвыглāлсыт:
— Ӣсус кӣвырт веельзевул ōлы. Тав веелзевул ё̄рыл кулит кон-ня̄влыянэ.
23Тувыл Ӣсус тāнаныл ляпан вōвсанэ, ос ханисьтан потрыл потыртаӈкве патыс:
— Сатана таквинāтэ кон-ня̄влуӈкве хумус вēрмитэ?24Хōн-мā киттыг ке паты, тамле хōн-мā э̄лаль ӯнлын нотэ холы.25Ос хоты сēмьят ворасьлахтуӈкве-ке патэ̄гыт, тамле кол тāгыл лāкква-паты.26Ос сатана такви ётэ воритотуӈкве-ке паты, тōнт тав э̄лаль ōлуӈкве ат вēрми. Тав нотэ та холы.27Алам, ё̄р кӯсяй ōсьнэ колныл пормас тӯлмантаӈкве нэ̄мхотъют ат вēрми. Тав кол кӯсяй ōвлэт ёл-нэ̄гсалытэ. Тōнт тӯп тав кол пормасанэ тӯлманты.28Нāнан мāк лāвēгум: э̄лумхōласыт пуссын кареканыл ос Тōрум нупыл пуссын сāвсыр лю̄ль вāрмалит хот-ёрувлаӈкве вēрмавет.29Туп Ялпыӈ Лылы лю̄камтан хōтпа кареканэ Тōрумын нэ̄мхуньт ат ёрувлавэт. Та э̄лумхōлас кареканэ тавēн āкваг та хультэ̄гыт.
30Тāн тох та нōмсахтасыт: Ӣсус кулил вуим ōлы, таимāгыс Тав тох потыртас.
31Ӣсус ся̄нэ ос āпсиянэ ёхтысыт. Тāн лāвсыт:
— Ӣсус тыг вōвелы̄н.
32Ӣсус мӯвлахи сāв мāхум ӯнлысыт ос Тавēн лāвсыт:
— Наӈ ся̄нын ос āпсияны̄н китыглавен.
33Ӣсус тāнанылн ювле-ля̄галас:
— Ам ся̄нюм ос āпсиянум хотъютыт?
34Тав мӯвлахитэ ӯнлум мир нупыл āӈкваталыс ос лāвыс:
— Ам ся̄нюм ос āпсиянум тит-ты-я!35Тōрум лāвум сирыл ōлнэ хōтпат, тāн Ам āпсиянум, э̄сянум ос Ам ся̄нюм.
*а 3:13 апостол — Тōрумн лусытаӈкве, Ӣсусын вōвим э̄лумхōлас
*б 3:20 веельзевул — кулит пуӈкхуманыл
Глава 3