Выбрать язык
Книги Ветхого Завета
Книги Нового Завета
с русским текстом1 Чыла тидын деч вара Юмо Авраамым тергаш шонен да тудлан каласен: «Авраам!» Тудыжо вашештен: «Мый тыште улам».2 Юмо каласен: «Йӧратыме ик шкет эргычым, Исаакым, пеленет нал да Мориа мландышке кае. Тушто тудым Мыйын ончыктымо ик курыкеш йӱлалтен пуымо надырлан кондо».
3 Авраам эрдене эрак кынелын, йӱлалтен пуымо надырым кондаш пум ямдылен, осёлжым ӧртньӧрлен. Вара кок тарзыж ден Исаак эргыжым налын да Юмын каласыме верыш тарванен.4 Кумшо кечын тудо вуйжым нӧлталын да тора гычак тиде верым ужын.5 Авраам тарзе-влаклан каласен: «Те тышан осёл дене кодса, а ме эргым дене тушко каена да Юмылан кумалына, вара тендан деке пӧртылына».6 Авраам йӱлалтен пуымо надырлан ямдылыме пум Исаак эргыжлан тупышкыжо сакалтен, а шкеже тулым, кӱзым налын, да эргыж дене коктын ошкылыныт.7 Исаак ачажлан каласен: «Ачай!» Тудыжо вашештен: «Колыштам, эргым». Исаак йодын: «Тул ден пужо уло, а Юмылан йӱлалтен пуымо надырлык пачаже кушто?»8 Авраам каласен: «Эргым, Юмо Шкаланже надырлык пачам Шке ойырен налеш». Нуно ончыко ошкылыныт.
9 Юмын каласыме верыш миен шумеке, Авраам жертвенникым ыштен, тушан пум орален оптен. Вара Исаак эргыжым пидын да пу ӱмбаке пыштен.10 Авраам кидшым шуялтен да, эргыжым шӱшкылаш манын, кӱзым луктын.11 Но ты жапыште Господьын Суксыжо кавапомыш гыч ӱжын кычкыралын: «Авраам! Авраам!» «Мый тыште улам», – Авраам манын.12 Суксо каласен: «Рвезе ӱмбак кидетым ит нӧлтал, тудын дене нимомат ит ыште. Мый ынде палем: тый Юмо деч лӱдат, вет Мыланем тый ик шкет эргычымат пуаш чаманен отыл».13 Авраам йыр ончалын да ужын: вондер коклаште тӱкыж дене тага пижын шогалын. Авраам тага деке миен, тудым кучен да [Исаак] эргыж олмеш Юмылан йӱлалтен пуэн.14 Авраам тиде верлан Иегова-ире*а лӱмым пуэн. Сандене кызыт мартеат ойлат: тиде курыкышто Господь ужеш.
15 Кавапомыш гыч Господьын Суксыжо Авраамым кокымшо гана ӱжын кычкыралын:16 «Господь тыге ойла: ”[Мыланем] тый ик шкет эргычымат чаманен отыл. Тидым ыштыметлан Шкем дене товатлем:17 Мый тыйым суапландаренак суапландарем, тукыметым кавасе шӱдыр да теҥыз серысе ошма пырче наре шукемдем. Нуно тушманышт-влакын олаштлан оза лийыт.18 Мыйын мутемым колыштметлан тыйын тукымет гоч мландысе чыла калык суапландарыме лиеш”».
19 Авраам тарзыж-влак деке пӧртылын, вара нуно чыланат Вирсавийыш каеныт. Тидын деч вара Авраам икмыняр жап Вирсавийыштак илен.
20 Чыла тидын деч вара Авраамлан увертареныт: тудын Нахор шольыжлан Милка эрге-влакым ыштен:21 кугуракше – Уц, тудын Вуз шольыжо, Кемуил – Арамын ачаже,22 Кесед, Хазо, Пилдаш, Идлаф да Вафуил.23 Вафуил деч Ревекка шочын. Милка Нахорлан, Авраамын шольыжлан, кандаш эргым ыштен.24 Нахорын тыгак Реума лӱман кулватыж деч Тевах, Гахам, Тахаш да Мааха эргыже-влак лийыныт.
* а22:14 «Иегова-ире» (але «Яхве-ире») лӱм еврей йылмыште ’Господь ужеш’ манмым ончыкта.
Глава 22