Выбрать язык
Книги Ветхого Завета
Книги Нового Завета
с русским текстом1 Исаак Иаковым шкеж деке ӱжыктен, суапландарен да тудлан тыге сугыньлен ойлен: «Ханаан ӱдырым марлан ит нал.2 Тарване, Месопотамийыш кай да аватын Вафуил ачажын суртышкыжо пуро. Тушто аватын Лаван изаже ила. Тудын ӱдыржӧ кокла гыч иктыжым марлан нал.3 Тек Чылакертше Юмо тыйым суапландара, тукыметым тӱлаҥдарен шукемда, тыйым шуко калыкын ачажым ышта!4 Тек Юмо тыйым да тукыметым Авраам [ачамым] суапландарыме семынак суапландара! Тек ӧрдыжъеҥ семын илыме мландетлан, кудым Юмо Авраамлан пуэн, тый оза лият!»5 Исаак Иаковым колтен, да тудыжо арамей Вафуилын Лаван эргыж деке Месопотамийыш каен. Лаванже Иаков ден Исавын Ревекка аваштын изаже лийын.
6 Исав пален налын: Исаак Иаковым суапландарен да Месопотамийыш ӱдырым налаш колтен, суапландарымыж годым Иаковлан ханаан ӱдырым марлан налаш кӱштен огыл.7 Тыгак Исав пален налын: ачаж ден аважын мутыштым колыштын, Иаков Месопотамийыш каен.8 Исав умылен: ханаан ӱдыр-влак тудын ачажлан, Исааклан, огыт келше.9 Кок ватыже улмо ӱмбачын тудо Измаил деке каен да Авраамын Измаил эргыжын Махалафа ӱдыржым, Наваиофын шӱжаржым, марлан налын.
10 А Иаков Вирсавий гыч лектын да Харраныш каен.11 Ик верыш миен шумекыже, кече шинчынат, тушан малаш шогалын. Тушто кийыше ик кӱм вуй йымакше пыштен да малаш возын.
12 Малымыж годым омым ужын: мландыште тошкалтышым шогалтыме, мучашыже кавашке тӱкнен. Юмын Суксо-влак тудын дене кӱзен-волен коштыт.13 Тошкалтыш деч кӱшнӧ Господь шога да ойла: «Мый Господь, Авраам ачатын Юмыжо, Исаакын Юмыжо улам, [ит лӱд.] Тиде мландым, кушто тый кызыт киет, Мый тыланет да тукымет-влаклан пуэм.14 Тыйын тукымет ошма пырче наре лиеш. Тудо теҥыз деке да эрвелыш, йӱдвелыш да кечывалвелыш шарла. Тӱнямбалысе чыла калык тыйын гоч да тыйын тукымет гоч суапландарыме лиеш.15 Теве Мый тый денет пырля улам. Кеч-кушко кает гынат, Мый тыйым аралаш тӱҥалам да тиде мландышке угыч пӧртылтем. Мый тыйым коден ом кай, тылат мом ойлымем чыла шуктем».
16 Омым ужмыж деч вара помыжалтмеке, Иаков каласен: «Тиде верыште Господь чынжымак уло, а мый пален омыл!»17 Тудо чот лӱдын да тыге пелештен: «Тиде вер могай лӱдмашан! Тиде моло огыл, а Юмын пӧртшӧ, тиде – кавашке капка».
18 Иаков эр кынелын, вуй йымак пыштыме кӱжым налын да тудым шарныктыш семын шогалтен, кӱ ӱмбак олив ӱйым велен.19 Тиде верлан тудо Вефиль*а лӱмым пуэн. Олан ончычсо лӱмжӧ Луз лийын.20 Иаков, сӧрымашым пуэн, тыге ойлен: «[Господь] Юмо мыйын пеленем лиеш да кайыме корныштем арален кода, кочкаш киндым да чияш вургемым пуа гын,21 да мый ачамын пӧртышкыжӧ тыныс дене пӧртыл шуам гын, Господь мыйын Юмем лиеш.22 Тунам шарныктыш семын шогалтыме тиде кӱэм [мыланем] Юмын пӧртшӧ лиеш. Мом Тый мыланем пуэт, тушеч луымшо ужашым мый Тыланет кондем».
*а 28:19 «Вефиль» лӱм ’Юмын пӧрт’ манмым ончыкта.
Глава 28