Выбрать язык
Книги Ветхого Завета
Книги Нового Завета
с русским текстом1 Иосиф шке пӧрт вуйлатышыжлан тыге кӱштен каласен: «Нине еҥ-влакын мешакыштым нумал кертмышт наре шурно дене теме да мешак аҥышкышт шийыштымат пыште.2 А изирак шольыштын мешак аҥышкыже киндылан кондымо шийже дене пырля эше мыйын ший коркам пыште». Тудыжо Иосифын кӱштымыж семынак ыштен.
3 Эрдене, волгыжмеке, нине еҥ-влакым осёлышт дене пырля мӧҥгышкышт колтеныт.4 Кунам нуно ола деч изиш веле торленыт, Иосиф пӧрт вуйлатышыжлан кӱштен: «Нине еҥ-влак почеш кай, нуным поктен шу, поктен шумекет, нунылан тыге ман: ”Молан те порылыклан осал дене пӧртылтенда? [Молан те мыйын ший коркам шолыштында?]5 Тиде озамын йӱмӧ да мужедме коркаже огыл мо? Те пеш удан ыштен улыда”».
6 Тудыжо нуным поктен шуын да нине мутым каласен.7 Нунышт тудлан вашештеныт: «Молан мемнан озана тыге ойла? Уке, тыйын тарзе-влакет тыге огыт ыште.8 Теве мешак аҥыштына мумо шийымат ме Ханаан мланде гыч тыланет конден улына. Кузе ме озатын пӧртшӧ гыч шийым але шӧртньым шолыштына?9 Тыйын тарзет кокла гыч кӧ дене коркам муыт, тудо тек кола, а молышт мемнан озанан кулжо лийына».10 Пӧрт вуйлатыше каласен: «Йӧра, ойлымыда семынак лийже. Но кӧ дене корка лектеш, тудо мыйын кулем лиеш, а молышт титакдыме лийыт».11 Кажныже юватылде шке мешакшым мландышке волтен шынден да мешак кылым руден.12 Тудо кугурак гыч тӱҥалын изирак марте кажныжын мешакшым терген лектын, коркам Вениаминын мешакыштыже верештын.13 Изак-шоляк-влак ӱмбалысе вургемыштым кушкедыныт. Вара мешакыштым осёл тупышко пыштен, олашке пӧртылыныт.
14 Иуда ден иза-шольышт Иосифын суртышкыжо толыныт. Тудыжо эше мӧҥгыштыжак лийын. Тудын ончылно нуно мландыш кумык возыныт.15 Иосиф нунылан каласен: «Мом те ыштенда? Те огыда шинче мо – мыйын гай айдеме шолып пашам садак пален налеш».16 Иуда каласен: «Мемнан озаланна мом каласаш? Мом ойлаш? Титакдыме улмынам кузе умылтараш? Юмо мемнам титаканеш ужын. Ынде ме озанан кулжо улына – ме чылан, да тудат, кӧн дене коркам мумо».17 Иосиф вашештен: «Уке, тиде мыланем ок келше. Кӧн дене коркам мумо, тудо мыйын кулем лиеш, а те шке ачада деке тыныс дене кайыза».
18 Тудын деке Иуда лишемын да каласен: «Мыйын озам, мылам шомакым пелешташ пу да шке кулетлан ит сыре, вет тый фараон дене тӧр улат.19 Тый йодынат ыле: ”Тендан ачада але шольыда уло мо?”20 Ме, тыйын кулет-влак, каласенна ыле: ”Мемнан шоҥго ачана да тудын межнеч эргыже уло, шоҥгылыкеш шочшо эргыже. Тудын изаже колен, ынде тудо аважын эргыж-влак кокла гыч шкет кодын. Ачана тудым чот йӧрата”.21 Тыйже мыланна тунам ойленат ыле: ”Мый декем тудым кондыза, тудым шке шинчам дене ончалнем”.22 Тыланет ме каласенна ыле: ”Рвезе ачажым коден каен ок керт. Ачажым коден кая гын, тудыжо ойгырен кола”.23 Но тый тунам каласышыч: ”Изирак шольыда тендан дене пырля ок тол гын, те мыйын шинчамлан ида кончо”.
24 Кунам ме ачана деке, тыйын кулет дек, мийышна, тудлан тыйын мутетым каласкалышна.25 Мемнан ачана каласыш: ”Адакат кайыза да мыланна кочкышым изишак налза”.26 Ме вашештышна: ”Мыланна каяш ок лий. Пеленна изирак шольына лиеш гын, ме каена. Вет шольына пырля ок лий гын, тудо еҥым мыланна ужаш ок лий”.27 Тыйын кулет, мемнан ачана, тунам каласен: ”Те шинчеда, ватем мыланем кок эргым ыштен.28 Иктыже мый дечем каен, да мый каласенам: очыни, тудым янлык кӱрыштын. Мый тудым тидын деч вара ужын омыл.29 Тидыжымат мый дечем наҥгаеда да тудо эҥгекыш логалеш гын, ойгемлан кӧра те мыйын чал вуем вес тӱняшке колтеда”.
30 Мемнан ачана изирак эргыж деке пеш чот шӱмаҥын. Ачана дек, тыйын кулет дек, мый рвезе деч посна пӧртылам31 да тудо эргыже укем ужеш гын, кола. Тыге тыйын кулет-влак ачаштын чал вуйжым ойгырымыж дене шӱгарыш шуктат.32 Мыйже, тыйын кулет, рвезе верч ачам ончылно мутым кучаш сӧренам да тудлан каласенам: шольым тыйын ончыкет мӧҥгеш конден ом шогалте гын, ачам ончылно ӱмырешлан титакан кодам.33 Лиеш мо, мыйын озам, рвезе олмеш тыйын кулетлан мый кодам, а рвезе изаже-влак дене пырля тек мӧҥгыжӧ пӧртылеш.34 Рвезе пеленем ок лий гын, кузе мый ачам деке каем? Ачам дене ойго лиймым мый ынем уж».
Глава 44