Выбрать язык
Книги Ветхого Завета
Книги Нового Завета
без русского текстаПРОРОК ДАНИИЛЫН КНИГАЖЕ | КНИГА ПРОРОКА ДАНИИЛА |
14 Глава | Глава 14 |
| 1 Астиаг кугыжа колен да шке ача-кочаж-влак деке каен, перс кугыжа Кир тудын кугыжанышыжым шке кидше йымак налын. | 1 |
| 2 Даниил тунам кугыжа дене пырля илен да тудын каҥашпуышыж-влак коклаште эн пагалыме еҥ лийын. | 2 |
| 3 Вавилон калыкын Вил лӱман юмыжо лийын. Тудлан кочкашыже кажне кечын коло кугу виса эн сай шыдаҥ ложашым, нылле шорыкым да куд виса йошкар аракам конденыт. | 3 |
| 4 Кугыжа тиде юмым шотлен илен да кажне кечын тудлан вуйым саваш коштын. А Даниил шке Юмыжлан кумалын. Кугыжа тудын деч йодын: «Молан тый Виллан вуетым от саве?» | 4 |
| 5 Даниил вашештен: «Мый кид дене ыштыме юмо-влаклан огыл, а илыше Юмылан, кава ден мландым ыштыше, чыла чонан-влак дене озаланыше Юмылан, кумалам». | 5 |
| 6 Кугыжа каласен: «Тый Вилым илыше юмылан от шотло мо? Кажне кечын тудо мыняр кочкеш да йӱэш, от уж мо?» | 6 |
| 7 Даниил шыргыжалын вашештен: «Кугыжа, ит ондалалт. Вет тудо кӧргӧ гыч шун, а тӱжвачын той, тудо нигунам кочкынат, йӱынат огыл». | 7 |
| 8 Тунам кугыжа шыдешкен, онаеҥже-влакым ӱжын да нунылан каласен: «Кӧ чыла тидым кочкеш – огыда каласе гын, те коледа. | 8 |
| 9 А тидым чынжымак Вил кочмым мылам ончыктен кертыда гын, Даниил кола, вет тудо Вилым шӱктарен ойлен». Даниил кугыжалан каласен: «Тек каласымет семын лиеш». | 9 |
| 10 Вилын онаеҥже-влак, нунын ватышт ден йочаштым шотлаш огыл гын, чылаже шымлын лийыныт. | 10 |
| 11 Кугыжа Даниил дене пырля Вилын храмышкыже толын. Тудын онаеҥже-влак каласеныт: «Ме тышеч лектына. А тый, кугыжа, кочкышым шынде да йошкар аракам теме, вара омсам петыре да шергашет дене печатьым шынде. | 11 |
| 12 Эрла тый толат да Вилын чыла тидым кочмыжым от уж гын, ме колена, а уке гын – мемнан нерген шоякым ойлышо Даниил». | 12 |
| 13 Нуно тургыжланен огытыл, вет ӱстел йымалне шолып пурымо верым ыштеныт, тушеч пуреныт да чыла тидым кочкыныт улмаш. | 13 |
| 14 Нунын лекмекышт, кугыжа Вил ончылно кочкышым шынден. А Даниил шке тарзыж-влаклан ломыжым кондаш кӱштен. Кугыжа гына кодмеке, нуно храм мучко ломыжым шавеныт. Вара лектыныт, омсам петыреныт, кугыжан шергашыж дене печатьым шынденыт да тушеч каеныт. | 14 |
| 15 Онаеҥ-влак, молгунамсе семынак, йӱдым шке вате да йочашт дене толыныт да чыла тидым кочкын-йӱыныт. | 15 |
| 16 Вес кечын кугыжа ондакак кынелын, тудын дене пырля – Даниил. | 16 |
| 17 Кугыжа йодын: «Даниил, печать-влак тичмаш улыт мо?» Тудыжо вашештен: «Тичмаш улыт, кугыжа». | 17 |
| 18 Омсам почмеке, кугыжа ӱстел ӱмбаке ончалын да кугу йӱкын кычкыралын: «Кугу улат тый, Вил, да тый денет нимогай шояк уке!» | 18 |
| 19 Даниил воштылалын, кугыжа храм кӧргыш ынже пуро манын, тудым кучен шогалтен да каласен: «Кӱвар ӱмбаке ончал, кӧн тиде кышаже?» | 19 |
| 20 Кугыжа вашештен: «Пӧръеҥ, ӱдырамаш да йоча-влакын кышаштым ужам». | 20 |
| 21 Тунам тудо пеш чот шыдешкен да онаеҥ-влакым, нунын вате ден йочаштым пӱтырен кучаш кӱштен. Нунышт шылтыме омсам ончыктеныт – нуно тудын гоч пурат да ӱстембалне мо улмым кочкыт улмаш. | 21 |
| 22 Тунам кугыжа нуным пушташ кӱштен, а Вилым Данииллан пуэн. Даниил Вилым да тудын храмжым шалатен. | 22 |
| 23 Тудо верыште кугу кишке лийын, Вавилонышто илыше-влак тудым шотлен иленыт. | 23 |
| 24 Кугыжа Данииллан каласен: «Тидын нергенат тудо той гына манын каласет мо? Тудо илыше, кочкеш да йӱэш. Тудо илыше юмо огыл манын каласен от керт, сандене тудлан вуетым саве». | 24 |
| 25 Даниил каласен: «Мый шке Господь Юмемлан вуем савем, вет Тудо – илыше Юмо. | 25 |
| 26 Но тый, кугыжа, мылам эрыкым пу: кугу кишкым мый керде да тоя деч посна пуштам». Кугыжа вашештен: «Тылат эрыкым пуэм». | 26 |
| 27 Тунам Даниил мланде кишым, коям да ӱпым налын, чыла тидым пырля шолтен. Вара вартыш гыч ӱяча-влак гайым ыштен да тудын умшашкыже шуэн – кугу кишке шаланен. Даниил каласен: «Теве тендан святой юмыда!» | 27 |
| 28 Кунам Вавилонышто илыше-влак тидын нерген колыныт, нуно чот сыреныт да кугыжа ваштареш шогалыныт. Нуно каласеныт: «Кугыжа иудей лийын, тудо Вилым шалатен, кугу кишкым пытарен да онаеҥ-влакым пуштын». | 28 |
| 29 Нуно кугыжа деке толыныт да каласеныт: «Пу мыланна Даниилым, уке гын ме тыйым да ешетым пуштына». | 29 |
| 30 Чот шогымыштым ужмеке, кугыжалан Даниилым нунын кидышкышт пуашыже логалын. | 30 |
| 31 Нунышт Даниилым лев-влакым петырыме вынемыш кудалтеныт. Тушто Даниил куд кече шинчен. | 31 |
| 32 Вынемыште шым лев лийын, нунылан кажне кечын кок кап да кок шорык дене пуэныт. А тиде кечылаште, нуно Даниилым кочкышт манын, нимом пуэн огытыл. | 32 |
| 33 Иудейыште пророк Аввакум лийын. Шӱрым шолтымеке да кӱмыжыш киндым падыштымеке, тидым тӱредше-влаклан наҥгаяш манын, тудо пасуш кая улмаш. | 33 |
| 34 Но Господьын Суксыжо Аввакумлан каласен: «Тиде кочкышетым Вавилоныш Даниил деке, лев-влакым петырыме вынемыш, наҥгай». | 34 |
| 35 Аввакум вашештен: «Озам, Вавилоным мый ужынат омыл да вынемымат ом пале». | 35 |
| 36 Тунам Господьын Суксыжо тудым вуйысо ӱпшӧ гыч нӧлталын да шке шӱлышыж дене пророкым ик татыште Вавилонышто улшо вынем воктеке конден шогалтен. | 36 |
| 37 Аввакум ӱжын кычкыралын: «Даниил, Даниил! Нал кочкышым, тудым тыланет Юмо колтен». | 37 |
| 38 Даниил каласен: «О Юмем, Тый мыйын нерген шарналтенат! Тыйым йӧратыше-влакым Тый коден каен отыл». | 38 |
| 39 Даниил кынел шогалын да кочкын. А Юмын Суксыжо ик татыштак Аввакумым ондак лийме верышкыже намиен шогалтен. | 39 |
| 40 Шымше кечын, Даниил шотышто шортмо йӱлам эртараш манын, кугыжа вынем деке толын. Тудо тушко ончалын – вынемыште Даниил шинчен. | 40 |
| 41 Тунам кугыжа кугу йӱкын кычкыралын: «Кӱдыратле улат Тый, Даниилын Господь Юмыжо, да Тый дечет моло вес Юмо уке!» | 41 |
| 42 Тудо Даниилым лукташ, а тудым пушташ тӧчышӧ-влакым вынемыш кудалташ кӱштен. Лев-влак нуным кугыжан шинчаж ончылнак кочкыныт.] | 42 |
Глава 14