Выбрать язык
Книги Ветхого Завета
Книги Нового Завета
с русским текстом1 Тугеже, чыла осаллыкым, чыла чояланымым, сайла кояш тӧчымым, кӧранымым да чыла орлымым коден,2 кызыт гына шочшо аза семын ару шомак шӧрым йӧратыза. Тудын дене те кушшаш да утаралтмашке шушаш улыда,3 вет те Господьын поро улмыжым тамленда.4 Тудын деке, илыше кӱ деке, толза, Тудым еҥ-влак кӱлдымыш луктыныт, а Юмын ончылно Тудо ойырен налме да шергакан.5 Шкендам илыше кӱ семын Юмын Шӱлышын пӧртшым чоҥаш пуыза, Иисус Христос гоч Юмылан келшыше надырым Шӱлыш дене пуышо святой иерей-влак лийза.6 Вет Возымаште тыгай шомак уло:
«Теве Мый Сионышто кӱм пыштем,
ойырен налме шергакан негыз пусак кӱм,
Тудлан ӱшаныше намысыш ок пуро».*а
7 Тугеже, тыланда, ӱшаныше-влаклан, тиде кӱ шергакан, а ӱшаныдыме-влаклан тудо – «чоҥышо-влакын йӧрдымыш лукмо, но пусакын негызше лийше кӱ», нунылан тудо – «шӱртньымӧ кӱ, алгаштаралтме кӱ».*б8 Шомакым колыштдымыштлан нуно шӱртнят. Нунылан тыге лияш палемдыме.
9 Но те ойырен налме тукым, Кугыжан иерейже-влак, святой калык, Юмын Шкаланже налме тукым улыда. Тендам пычкемыш гыч ӧрыктарыше волгыдышкыжо Ӱжшын кӱдыратле пашажым те увертарышаш улыда.
10 Ондак те калык лийын огыдал,
ынде Юмын калыкше улыда.
Ондак тендам чаманыме огыл,
а ынде чаманыме улыда.
11 Йӧратымем-влак, илаш толшо ӧрдыжъеҥым сӧрвалыме семын тендам сӧрвалем: чон ваштареш кучедалше капысе сутланымаш деч шкендам кучыза12 да чын Юмым палыдыме калык коклаште порын илыза. Тыгеракын, нуно поро пашадам ужыт да, осалым ыштыше манын, мо верч тендам кызыт вурсат, Юмын толын кайыме кечынже тидын верчак Тудым мокташ тӱҥалыт.
13 Тыгеракын, Господьлан кӧра чыла айдеме вуйлатыше-влакым колыштса: кугыжамат, вет тудо эн кугу кучеман,14 тӧра-влакымат, кугыжа вет нуным осалланыше-влакым мут кучаш шогалташ да порым ыштыше-влакым мокташ колтен.15 Вет Юмын кумылжо тыгай: порым ыштыме дене те тунемдыме еҥ-влакын шотдымо ойлымыштлан мучашым пыштышаш улыда.16 Эрыкан еҥ семын ыштыза, тек тендан эрыкда осаллан леведыш огеш лий, а Юмын кулжо лийза.17 Чылам пагалыза, иза-шольым йӧратыза, Юмо деч лӱдса, кугыжам шотлыза.
18 Тарзе-влак, озада-шамычын мутыштым лӱдын да пагален колыштса: поро да тыматле-влакын веле огыл, но торжа-шамычынат мутыштым колыштшо лийза.19 Юмым эре ушышто кучымыжлан кӧра иктаж-кӧ чын амал деч посна ойгандарен орландарымым чыта гын, тиде – Юмылан келшыше.20 Титакланда кырыме годым чытеда гын, тендам молан мокташ? Но порым ыштымыланда кӧра орлыкым чытеда гын, тиде Юмын ончылно келшыше,21 да тидланак тендам ӱжмӧ, вет Христосат мемнан верч орлыкым чытен да мыланна корным ончыктен: те Тудын кышаж почеш кайышаш улыда.
22 «Языкым Тудо ыштен огыл,
Тудын йылмыж гыч чояланымаш шоктен огыл».*в
23 Тудым вурсеныт гынат, вурсен вашештен огыл, орланымыж годым лӱдыктылын огыл, а чын Судитлышын кидышкыже чыла ӱшанен пуэн.24 Ме, язык деч кораҥын, чын ыштен илен кертшаш улына, сандене Христос шке Капше дене языкнам ырес меҥгыш нӧлталын. Тудын сусыржо дене те паремдыме лийында.25 Те [кӱтӱчӧ деч посна кодшо] йомшо шорык гай лийында, но чондам Кӱтышӧ да Аралыше деке кызыт пӧртылында.
Глава 2