Выбрать язык
Книги Ветхого Завета
Книги Нового Завета
с русским текстом1 Тылеч вара мый пылпомыш гыч шуко калык тӱшкан гай виян йӱкым колынам. Нуно ойленыт:
«Аллилуия! Утарымаш, чап, пагалымаш да куат мемнан Юмынан:
2 Тудын судитлымыже чын да поро,
яжарланымыж дене мландым локтылшо
кугу яжарым Тудо судитлен
да шке тарзыж-влакын вӱрыштым йоктарыме верч
тудлан ӱчым шуктен».
3 Вара угычын кычкыралыныт:
«Аллилуия! Тудын йӱлымӧ шикшыже
курым-курымеш нӧлталтеш!»
4 Коло ныл старец да ныл илыше кумык возыныт да престолышто шинчыше Юмылан вуйым савен ойленыт:
«Аминь! Аллилуия!»
5 Престол деч йӱк лектын:
«Мемнан Юмынан тарзыже-влак,
Тудлан лӱдын кумалше-влак,
изиже-кугужо чылан Тудым моктыза!»
6 Вара мый моткоч кугу тӱшкан гай, кугу вӱд лӱшкымӧ гай, кӱдырчӧ виян кӱдыртымӧ гай йӱкым колынам. Тудо ойлен:
«Аллилуия! Чылакучышо Господь Юмо
кугыжаланаш тӱҥалын.
7 Куанышаш да йывыртышаш, Тудым чапландарышаш улына,
вет Пачан сӱанже шуын,
да Тудын налшаш ӱдыржӧ шкенжым ямдылен.
8 Тудлан чияш ару волгалтше виссон*а вургемым пуымо».
Виссонжо святой-влакын чын пашашт лиеш.9 Суксо мылам каласен: «Возо: Пачан сӱан сийышкыже ӱжмӧ-влак поро пиалан улыт». Вара ешарен: «Ниныже Юмын чын шомакше улыт».10 Тунам мый, вуйым саваш манын, тудын йолжо деке кумык возынам, а тудо мылам ойлен: «Ончо, тыге ит ыште! Мый тый денет да Иисусын таныклымыжым кучышо иза-шольыч-влак дене пырля служитлыше улам. Юмылан вуетым саве». А Иисусын таныклымыже пророклен ойлымын шӱлышыжӧ улеш.
11 Мый почылтшо пылпомышым ужынам: теве ош имне, а ӱмбалныже шинчышым Ӱшанле да Чын манын лӱмдымӧ. Тудо чын почеш судитла да кредалеш.12 Тудын шинчаже – тулйылме гай, вуйыштыжо шуко диадим. Тудын возымо лӱмжӧ уло, тиде лӱмым Шкеж деч весе нигӧ ок пале.13 Тудо вӱр дене йошкаргыше вургеман лийын, да Тудын лӱмжӧ – Юмын Шомакше.14 Ош ару виссон вургеман пылпомышысо сарзе-влак, ош имньым кушкыжын, почешыже каеныт.15 Умшаж гыч пӱсӧ керде лектын, тудын дене калык-влакым пытарышаш улмаш. Нуным Тудо кӱртньӧ тоя дене кӱташ тӱҥалеш, виноградым темден лукмо верыште Чылакучышо Юмын шыдыжын да чот сырымыжын аракажым Шке тошкен ышта.16 Тудын вургемешыже да эрдешыже «Кугыжа-влакын Кугыжашт, господь-влакын Господьышт» манын возымо лӱм уло.
17 Мый кечыште шогышо ик Суксым ужынам. Кӱшнӧ каваште чоҥештылше кайык-влаклан тудо кугу йӱк дене кычкыралын: «Толза, Юмын кугу кас кочкышышкыжо погыныза!18 Кугыжа-влакын капыштым, сарзывуй ден виян-влакын капыштым, имне ден имнешке-влакын капыштым, чыла эрыкан ден кулын, изи ден кугу еҥын капыштым кочса!»19 Вара мый янлыкын, мландысе кугыжа-влакын да нунын сарзе-влакыштын погынымыштым ужынам. Нуно имне ӱмбалне Шинчыше дене да Тудын сарзыже-влак дене кредалаш ямдылалтыныт.20 Но янлыкым руалтен кученыт, тудын ончылно палдарыше палым ончыктышо шояк пророкымат пырля кученыт. Шке чудыжо-влак дене тудо янлыкын палыжым налше да янлыкын тӱсшылан вуйым савен кумалше-влакым ондален улмаш. Нуным когыньыштымат илышынек чӱкчыгиш дене йӱлышӧ тулан ерыш шуымо.21 А молыштым имне ӱмбалне Шинчышын умшаж гыч лекше керде дене пуштмо, да кайык-влак, нунын колышо капыштым кочкын, чылан темыныт.
*а 19:8 Виссон – йытын мушын эн вичкыж да эн чапле ярымже (ужашыже).
Глава 19