Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИСУСÖС ТУВЪЯЛÖМ
Исусöс нуöдiсны Голгопа нима керöсö. Сэнi Сiйöс тувъялiсны крестö. Крестын öшалiгас Исус кевмис: «Батьöй, прöстит тайö йöзсö, öд найö оз тöдны, мый вöчöны». Йöзыс сулалiсны да видзöдiсны. А юралысьяс сералöмöн шуалiсны: «Мукöдöс мездiс – мед Асьсö öнi мездас, Сiйö кö Кристос, Енлöн бöрйöмаыс». Сералiсны-лёкöдiсны Исусöс тшöтш шыпуртаяс. Найö шуалiсны: «Тэ кö юдейяслöн Öксы, мезды Асьтö».
Исускöд орччöн öшалiсны крестын кык лёк вöчысь. Öтиыс Исусöс омöльтiгмоз шуалiс: «Тэ кö Кристос, мезды Асьтö да миянöс!» Мöдыс öлöдiс сiйöс: «Тэ öмöй Енсьыс он пов? Тэнö öд Сы моз жö тувъялöма. Миянöс веськыда мыждöма, асланым лёк вöчöмъясысь, а тайö Мортыс лёксö эз вöчлы». Сэсся шуис Исуслы: «Господьöй, казьтышт менö, кор воан Аслад Юраланiнö!» Исус шуис: «Веськыда висьтала тэныд: талун лоан Мекöд райын».
Лун шöр кадö пемдiс став му пасьталаыс, пемыдыс сулалiс куим часöдз. Куим час гöгöрын Исус ыджыд шыöн горöдiс: «Эли, Эли, лама сабактани? Енмöй, Енмöй, мыйла Тэ колин Менö?» Сэнi сулалысьясысь кодсюрö шуисны, Илляöс пö корö. А Исус шуис: «Ставсö вöчöма!» Сэсся Сiйö ыджыд шыöн горöдiс: «Батьöй, Тэнад киö сета Ассьым лолöс!» Тайöс шуöм бöрын лолыс петiс. Сэки крамын öшалысь дöраыс вывсяньыс улöдзыс кык пельö косяссис. Муыс вöрзис, из керöсъяс потiсны. Исусöс видзысьяс веськöдлысьныскöд ёна повзисны да шуисны: «Тайö Мортыс збыльысь Ен Пи вöлöма».
Матвей 27:33-54, Лука 23:32-46, Иоан 19:30
424 
