Буръюöртны мöдысь ветлiгöн Павелкöд вöлi Сила. Антиокияысь найö бара мунiсны Дервия да Листра каръясö. Буретш Листраын некымын во сайын Павелöс муртса эз вины изъясöн. Танi Павел паныдасис Тимофей нима том морткöд, кодi лои сылöн бур отсасьысьöн. Буръюöртiгöн найö воисны саридздорса Троада карö. Сэнi лоöмтор йылысь Лука гижö тадзи: «Войнас Павел аддзылас Енсянь петкöдчылöм: македонияса морт сулалö сы водзын да корö, лок пö Македонияö да отсав миянлы. Тайö петкöдчылöм бöрас ми дзик пыр шуим мунны сэтчö. Ми гöгöрвоим: Господьным корö миянöс висьтавны сэнi Бур Юöр».
Павел аслас ёртъяскöд вуджис саридз, тадзи найö воисны Азияысь Европаö. Сэсся найö мунiсны Филип карö. Филип вöлi Европаын медводдза кар, кöнi йöзыс кутiсны эскыны Кристослы. Сэнi Павелöс да Силаöс пуксьöдiсны дзескыдiнö, та йылысь ми лыддям локтан висьтысь.
Филип карысь Павел да Сила мунiсны Фессалоникаö, саридздорса ыджыд карö. Танi грекъяс*а кутiсны эскыны Кристослы, тшöтш кодсюрö юдейяс пиысь. А мукöд юдейяс тырины лöглунöн. Найö чукöртiсны уна йöзöс да пондiсны шызьöдны карсö. Павеллы да Силалы ковмис пышйыны Верия карö, сэтысь водзö Афинö, Грециялöн юркарö. Сэнi Павел висьталiс Енлысь Кывсö философъяслы, ыджыд вежöра йöзлы, но тшöтш и велöдчытöм йöзлы. Та йылысь ми кутам на лыддьыны.
Афинысь Павел мунiс Коринфö, Римса империялöн тöдчана карö. Коринфын Павел олiс во да джын. Тайö кадас сэнi чужис ыджыд вичко. Коринфысь Павел бергöдчис саридз вывтi Ичöт Азияö да локтiс Ефес карö. Сэтысь сiйö мунiс Ерусалимö да аддзысьлiс сэнi эскысьяскöд, а сэсся бöр локтiс Антиокияö.
470 