Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИОСИФ ПЯКСТАМКУДСА
Пякстамкудсовок Шкайсь Иосифонь мархтоль, лездсь тейнза. Шкайсь ладязе пякстамкудонь оцюнять седиенц Иосифонь ширес, и ся путозе цёрать пякстафнень лангса тевонь вятикс. Сонць оцюнясь мезень мельгавок ни ашезь вана, сембоса кемась Иосифонди.
Пякстамкудса Иосифонь мархта ащесть оцязоронь кафта покодихть. Фкясь ульсь оцязоронь моркшть видеса оцязоронь кечес винань кайсикс. Сон лемнезь винань амолдайкс. Омбоцесь каннесь оцязоронь моркш лангс ярхцамбяль, сонь лемнезь кшинь максыкс. Синь кати-мезьса оцязорть инголе ульсть муворуфт, сяс пякстазь.
Весть винань амолдайсь и кшинь максысь няйсть отт, аньцек мезень мяль эсост кяшфоль, тейст ашезь содав. Иосиф корхтай тейст: «Афоли Шкайть эзда шарьхкодемасна? Азондость тейне ононтень». Винань амолдайсь васенцекс азондозе ононц. Онцтонза няйсь виноградонь почке, конаста явожкшнесть колма таратт. Меле лангсонза эвондасть панчфт, кассть и кенерсть имошть. Сон кочказень имошнень, люпштазе таньфведьснон фараонть кечес и максозе тейнза.
Иосиф эстокиге панжезе сонь ононц: «Колма таратт – колма шит. Колма шида меле фараонць мрдафттанза эсь вастозт, макссак кядезонза кечеть, улят станяк винань амоляйкс».
Сяльде кшинь максысь азондозе эсь ононц. Онцтонза няйсь: сон прянц лангса кирди колма кептернят. Вярденнесь пяшксель оцязоронь ярхцамбяльда, эздонза пупстыесть нармотть.
Кулхцондозе Иосиф, корхтай: «Колма кептернят – нят колма шит. Колма шида меле фараонць серьгяттянза и пондатанза шуфта пряс, нармоттне кармайхть пупстыемонза ронгцень».
Колма шида меле мархтост лиссь эхярь стане, кода азозе тейст Иосиф.
ШАЧЕМА 39:21-23; 40:1-22
68 
