Choose Language
New Testament Books
view with a second Bible
1Воннэзӧ, асьныт тӧдатӧ: тіян дынӧ вовлӧмным эз вӧв весись.2Тіян дынӧ локтытӧдз Филип карас уна сьӧкытыс усис миян вылӧ: миянӧс вартлісӧ, умӧльтісӧ. Но мийӧ эгӧ повзьӧ отир лэбтісьӧмись. Еныс отсӧтӧн мийӧ повтӧг висьтасим тіянлӧ Сылісь Бур Юӧрсӧ.3Миян велӧтӧмын эз вӧв бӧбӧтлӧмыс да ылӧтлӧмыс. Сэрпӧсьсӧ юрын нем эгӧ видзӧ.4Еныс тӧдмаліс-видзӧтіс*а миянлісь сьӧлӧммезнымӧс. Сія миянӧс шуис туяна*б отирӧн висьтасьны Сылісь Бур Юӧрсӧ. Мийӧ эд вынсьӧтчам керны Ен сьӧрті, а огӧ морт сьӧрті.
5Тійӧ тӧдат: мийӧ некӧр эгӧ баитӧ виа бордӧн мавтӧмӧн моз. Мийӧ нем эгӧ керӧ аслыным мыйкӧ босьтӧм могись, Еныс тӧдӧ.6Мийӧ огӧ видзчисьӧ мортсянь ошкӧмсӧ, не тіянсянь, не мӧдіккезсянь.7Кыдз Кристослӧн апостоллэз мийӧ вермим локны тіян дынӧ юррезнымӧс чатыртӧмӧн. Но тіян коласын мийӧ асьнымӧс видзим небытика, ассис челядьсӧ вердісь мам моз.8Миянӧс сьӧлӧмным кыскӧ тіян дынӧ. Мийӧ тіянлӧ висьтасим Бур Юӧрсӧ и ассиным ловнымӧс пуктім тіян понда. Тійӧ сэтшӧм донаӧсь лоит миянлӧ.9Воннэзӧ, миян уджным тӧдвыланыт. Енлісь Бур Юӧрсӧ висьтасьӧмным коста мийӧ вовлім садь быртӧдз. Мийӧ уджалім ой и лун, медбы миянсянь некинлӧ тіян коласісь эз вӧв сьӧкыт. Асланым киэзӧн шедтім оланын коланасӧ.10Тійӧ асьныт тӧдат, да и Еныс тӧдӧ, кытшӧмӧсь мийӧ вӧлім тіян дынын. Быдӧс керим сӧстӧм сьӧлӧмсянь да веськыта. Миян йылісь умӧльсӧ некин нем оз вермы висьтавны.11Тійӧ эд тӧдатӧ: мийӧ тіянкӧт асьнымӧс видзим, кыдз ай челядькӧт.12Мийӧ тіянӧс туйдӧтім, ӧзйӧтім, кеймисьӧмӧн корим овны сідз, кыдз колӧ Енлӧ. Сія тіянӧс корӧ эд Аслас Юраланінӧ да югьяланінӧ.
13Енлісь Кывсӧ тійӧ кыліт миянсянь. Сійӧ Кывсӧ тійӧ эдӧ босьтӧ кыдз мортлісь, босьтіт кыдз Енлісь Кывсӧ. Сія и былись Енлӧн Кыв, кӧда керӧ ассис уджсӧ тіян сьӧлӧммезын, веритісь отирын. Эта понда мийӧ дугдывтӧг буркывтам Енсӧ.14Воннэзӧ, тіянкӧт лоис сія жӧ, мый вӧлі Иудеяись Енлӧн вичкуэзкӧт, Кристос Исуслӧ веритіссезкӧт. Нылӧ иудейес уна умӧльсӧ керисӧ, а тіянлӧ ─ асланыт отирыс.15Иудейес вийисӧ Дӧсвидзись Исуссӧ да Сылісь юӧртіссесӧ, а миянӧс вашӧтісӧ. Нія Енсӧ лӧгӧтлӧны да и быд мортлӧ паныт лэбтісьӧны.16Нія озӧ лэдзӧ миянлӧ висьтасьны мӧдік отирлӧ мездан Бур Юӧрсӧ. Сійӧн содтӧны ассиныс умӧль керӧммезнысӧ. Но Енлӧн лӧгыс нійӧ вӧтіс ни.
17Воннэзӧ, мийӧ тіянкӧт янсалім кытшӧмкӧ кадӧдз. Сьӧлӧммезным эд миян пыр ӧтлаын. Мийӧ ӧддьӧн гажтӧмтчим, сійӧн бы адззылам тіянӧс.18Мийӧ мӧдім вовлыны тіян дынӧ. Ме, Павел, ӧтпыр и мӧдпыр лӧсьӧдчылі локны тіян дынӧ, да сотанаыс падмӧтіс.19Кин миян гажыс, надеяыс да ошкан юркытшыс? Этӧ тійӧ. Мийӧ пондам ошшасьны тіянӧн Дӧсвидзись Кристос Исусным одзын Сылӧн локтӧм коста.20Тійӧ эд миян ошшасьӧмыс да гажыс!
*а 2.4 тӧдмавны-видзӧтны ─ испытать
*б 2.4 туяна ─ достойный
Глава 2
