Choose Language
New Testament Books
view with a second Bible
1Унаись да быднёж миян айезлӧ важынсянь ни Еныс баитлӧм Аслас юӧртіссез пыр.2Эна медбӧрья луннэзӧ Еныс баитіс миянлӧ Зоныс пыр. Сы пыр Еныс аркмӧтіс*а и быдӧс енӧжисьсӧ да му вылісьсӧ, быдӧс сетіс Зоныс кипод увтӧ.3Зоныс ─ Айыслӧн ошкӧм-югьялӧмыс. Сія быдӧсын Айыс кодь, быдӧс видзӧ Аслас вына кылӧн. Сія сӧстӧмтіс миянӧс умӧль керӧммезсиным да пуксис енӧжас вына Еныскӧт ордчӧн веськыт ладорас.
4Зоныс ангеллэзся вылынжыка сувтӧтӧм. Сылӧн и нимыс ны ниммезся вылынжыка пуктӧм.5Кӧр кытшӧм ангеллӧ Еныс висьталіс:
─ Тэ Менам Зон,
Талун Ме лои Тэнат Айӧн?
Некытшӧм ангеллӧ Еныс эз висьтав:
─ Ме сылӧ лоа Айӧн.
Сія Меным лоас Зонӧн.
6Олан муас Медодз Чужӧмсӧ петкӧтікӧ Еныс висьталӧм:
─ Сылӧ ась копыртчӧны Енлӧн ангеллэс быдӧнныс.
7Ангеллэс йылісь висьталӧм:
─ Тэ керан Ассит ангеллэтӧ тӧввезӧн,
Ассит уджаліссетӧ ─ ӧгралан биӧн.
8Зоныс йылісь висьталӧм:
─ Енӧ, Тэнат юралан пукӧсыт*б ─ пырся.
Тэнат веськӧтлан бедьыт*в ─ веськыта*г юралӧм.
9Тэ радейтан веськыта керӧмсӧ.
Синӧн он вермы видзӧтны лёк керӧм вылӧ.
Сійӧн Тэнат Еныт гаж елейнас мавтіс Тэнӧ, Енӧ,
мӧдіккезся буржыка.
10Шуӧ и сідз:
─ Дӧсвидзисьӧ, медодз Тэ аркмӧтін мусӧ,
да и енӧжыс аркмӧтӧм Тэнат киӧн.
11Нія ӧшасӧ, а Тэ пыр лоан.
Паськӧм моз быдӧс важмас, бырас.
12Мусӧ енӧжнас паськӧм моз каттьыштан.
Нія вежсясӧ,
а Тэ пыр ӧткодь.
Тэнат оланыт некӧр оз ор.
13Кӧр кытшӧм ангеллӧ Еныс висьталіс:
─ Пукав Мекӧт веськыт ладорам,
кытчӧдз ог уськӧт кок увтат
Тэ вылӧ лэбтісиссесӧ*д.
14Ангеллэз быдӧнныс кысъялісь*е ловвез. Нійӧ Еныс ыстӧ отсавны отирлӧ, кӧдналӧ дӧнзяс мезмӧмыс.
*а 1.2 аркмӧтны ─ сотворить
*б 1.8 юралан пукӧс ─ престол, трон
*в 1.8 веськӧтлан бедь ─ жезл
*г 1.8 веськыта ─ праведно
*д 1.13 кинкӧ вылӧ лэбтісись ─ враг
*е 1.14 кысъявны ─ служить
Глава 1
