Choose Language
Книги Ветхого Завета
New Testament Books
view with a second Bible
1 Сэсся ме видзӧдлі енэжас да аддзи сэтысь восьса ӧдзӧс. Сэсянь ме кылі гӧлӧс шы, сійӧ вӧлі труба шы кодь. Тайӧ гӧлӧс шысӧ ме водзынджык кывлі нин. Сійӧ шуис меным: «Кыпӧдчы татчӧ! Ме петкӧдла тэныд, мый лоӧ та бӧрти».
2 Дзик пыр ме тыри Лолӧн да аддзи енэжсьыс пуклӧс да сы вылын Пукалысьӧс. 3 Сылӧн чужӧмыс дзирдаліс дона изъяс моз, яшма да сердолик моз. Пуклӧс весьтас югъяліс изумруд рӧма ӧшкамӧшка. 4 Пуклӧс гӧгӧрыс вӧлі нӧшта на кызь нёль пуклӧс. Сэні пукалісны кызь нёль юрнуӧдысь. Найӧ вӧліны еджыд паськӧмаӧсь да зарни юркытшаӧсь. 5 Пуклӧссянь петісны чардби да гым шы. Пуклӧс водзас ӧзйис сизим би, Енлӧн сизим лолыс. 6 Сэні вӧлі стеклӧысь саридз, мый югъяліс крусталь моз.
Пуклӧс водзас да сы гӧгӧрыс вӧлі нёль ловъя олысь. Найӧ водзладорсяньыс и бӧрладорсяньыс вӧлі тырӧмаӧсь синъясӧн.
7 Ӧтиыс на пиысь вӧлі лев кодь, мӧдыс – ӧш кодь, коймӧдыслӧн чужӧмыс вӧлі мортлӧн кодь, а нёльӧдыс вӧлі лэбысь кутш кодь.
8 Быдӧн на пиысь вӧлі квайт бордъя, а налӧн борд ортсыыс да пытшкӧсладорыс вӧлі тырӧма синъясӧн. Лун и вой найӧ дугдывтӧг шуалӧны:
– Вежа, вежа, вежа
Господь Ен, Ставсӧвермысь,
коді вӧлі, эм и локтас.
9 Кор ловъя олысьяс ошкӧны-нимӧдӧны да аттьӧалӧны юралан пуклӧсын Пукалысьӧс, помтӧг Олысьӧс,
10 сэки кызь нёль юрнуӧдысьыс уськӧдчӧны юралан пуклӧсын Пукалысь водзӧ да копыртчылӧны помтӧг Олысьлы. Ассьыныс юркытшсӧ пуклӧс водзӧ пуктӧмӧн найӧ шуалӧны:
11 – Господьӧй, Тэ шогман сибӧдны
ошкӧм-нимӧдӧмсӧ да вынсӧ,
ӧд Тэ вӧчин ставсӧ.
Тэнад кӧсйӧм серти вӧчӧма ставсӧ,
Тэнад кӧсйӧм серти ставыс олӧ.
Глава 4