Choose Language
Old Testament Books
New Testament Books
1Иудеяын Иосафат дас тямысэтӥ арзэ эксэйын пукыку, Ахавлэн Иорам пиез Самарияын Израильлы эксэе пуксиз, со дас кык ар ӵоже эксэй луыса кузёяськыса улӥз но2Кузё-Инмарлэн син азяз ярантэм ужъёс лэсьтыса улӥз, атаез мында, анаез мында ик ӧз ке но сьӧлыка: атаезлэсь Вааллы сӥзьыса пуктэм сульдэр юбозэ быдтыса куштӥз.3Наватлэн Иеровоам пиезлэсь сьӧлыкъёссэ, кудӥныз со Израилез сьӧлыке пыртӥз, Иорам но лэсьтылӥз, соос бордысь ӧз куштӥськы.
4Меса, Моавлэн эксэез, пудоен узыр вал, со Израильлэн эксэезлы сю сюрс ыж, сю сюрс ӵышкымтэ такаосты ыстылӥз.5Ахав кулэм бере Моавлэн эксэез Израиль эксэйлы тэрытскемысь дугдӥз.6Со вакытэ Иорам эксэй Самарияысь потӥз но вань израиль ожгарчиосты учкиз-чаклаз.7Собере Иудеялэн Иосафат эксэез доры адямиосты тазьы вераны ыстӥз: «Моавлэн эксэез мыным тэрытскемысь дугдӥз, монэн ӵош Моавлы пумит ожмаськыны мынод-а?» Со шуиз: «Мыно; кызьы тон, мон но озьы ик, кызьы тынад калыкед, мынамез но озьы ик, кызьы тынад валъёсыд, мынамъёсыз но валъёсы озьы ик».8Иосафат эксэй юаз: «Кудтӥз сюрестӥ асьмелы мыноно?» Нош Иорам шуиз: «Едом луоё кыр дуннелэн сюрес вылтӥз».9Вырӟизы Израильлэн эксэез, Иудеялэн эксэез, Едомлэн эксэез, котыр сюрес кузя соос сизьым нунал ӵоже мынӥзы, ожгарчиослы юыны ву ӧй вал, соослэн бӧрсязы мынӥсь пудолы но.10Соку Израильлэн эксэез шуиз: «Ах! Кузё-Инмар куинь эксэйёсты люказ соосты Моавлэн киулаз сётон понна».
11Иосафат шуиз: «Татын Кузё-Инмарлэн пророкез ӧвӧл-а, со пыр Кузё-Инмарлэсь юаны мед луысал?» Израиль эксэйлэн медоосыз пӧлысь одӥгез ответ сётыса шуиз: «Татын Илиялэн кияз ву сётъясь Сафатлэн Елисей пиез вань».12Иосафат шуиз: «Елисей дорын Кузё-Инмарлэн верам кылыз вань». Со доры Израильлэн эксэез Иосафат эксэен, Едомлэн эксэеныз ӵош мынӥзы.13Израильлэн эксэезлы Елисей шуиз: «Тыныд но, мыным но маиз? Мын атаедлэн пророкъёсыз доры, анаедлэн пророкъёсыз доры». Израильлэн эксэез солы шуиз: «Уг, малы ке шуоно Кузё-Инмар татчы куинь эксэйёсты люказ соосты Моавлэн киулаз сётон понна».14Соку Елисей шуиз: «Улэп Саваоф Кузё-Инмар, Кин азьын мон сылӥсько! Иудеялэсь Иосафат эксэйзэ мон сӥлы ӧй ке карысал, соку мон тон шоры ӧй учкысал, тонэ ӧй но адӟысал.15Нош али крезьчиез ӧте». Крезьчи крезьзэ шудыку, Кузё-Инмарлэн киыз Елисей борды йӧтӥськиз но,16Елисей шуиз: «Тазьы шуэ Кузё-Инмар: та нёжалэ гопъёс вӧзы гопъёс гудэ,17уго тазьы шуэ Кузё-Инмар: тӧлэз уд адӟе, зорез уд адӟе, нош та нёжал вуэн пачылмоз, сое тӥ юоды, векчиез но, тазаез но пудоосты юозы.18Но Кузё-Инмарлэн син азяз та ӧжыт; Со Моавез но тӥляд киулады сётоз.19Вань юнматэм каръёсты, йыр каръёсты погыртоды, ваньзэ умойёссэ писпуосты коралоды, вань бызись вуосты быземысь дугдытоды, бусыосысь ваньзэ устооссэ анаосты изъёсын сӧрылоды».20Ӵукна пал, нянез курбонлы вылэ ӝутыку, малпамтэ шорысь Едомысь лыктон сюрес вылысь ву бызьыны кутскиз, музъем вылэ пачылаз ву люкаськиз.
21Эксэйёс соосын ожмаськыны лыкто шуыса, моав калык кылӥз но, соку ик вань калык е нуллыны кутскисьёс – быдэ вуэм адямиос – огазе люкамын вал, ваньзы кунгож дуре султӥзы.22Ӵукна соос вазь ик султӥзы, ву вылтӥ шунды чиляны кутскем бере моав калыклы кыдёкысен со ву горд, вир кадь, адӟиськиз.23Соос шуизы: «Со вир, эксэйёс куспазы жугиськизы, огзэс огзы виизы, нош табере, Моав, ваньбур люканы пот!»
24Соос израиль ожгарчиослэн сылон интыязы лыктӥзы. Израиль ожгарчиос султӥзы но моав ожгарчиосты жугыны ӧдъязы, соос бызьыса кошкыны кутскизы, нош израиль ожгарчиос соосты уйыса мынӥзы, моав ожгарчиосты тышказы.25Городъёссэ куашкатӥзы, бусыысь умойгесаз ана вылэ котькудӥз быдэн из зӥртӥз, пачылаз из люкаськиз, ву бызён интыосты ӵоксаллязы, ваньзэ умоесьсэ писпуосты коразы, озьы Кир-Харешетэ гинэ одӥг из борддор гинэ кылиз. Из зӥръясьёс лыктӥзы но сое куашкатӥзы.
26Моавлэн эксэез адӟиз, ожмаськонэз со келя ни шуыса, соку со бордаз мечен ожмаськыны быгатӥсь сизьым сю ожгарчиосты кутӥз, Едом эксэй доры ожен потыны мед быгатоз шуыса, но ӧз пӧрмы.27Соку со ас интыяз эксэе пуксёно нырысь вордскем пизэ кутыса кар борддор йылэ ӝутӥз но, тылын сутыса, курбон сётӥз. Та ужрад израиль калыклэсь сюлэмзэ бугыртӥз, соос со дорысь палэнскизы но ас музъемазы берытскизы.
Глава 3
