Choose Language
Old Testament Books
New Testament Books
1Со нуналъёсы Езекия кулоно кадь висьыны кутскиз. Со доры Амослэн пиез Исаия пророк лыктӥз но солы тазьы шуиз: «Тазьы шуэ Кузё-Инмар: семьяосыдлы сӥзён гожтэт гожтыса кельты, тон кулод уго, уд ни бурмы».2[Езекия] ымнырыныз борддор пала берытскиз но Кузё-Инмарлы вӧсяськыса шуиз:3«Э, Кузё-Инмаре, тодад вай, кызьы мон Тон азьын шонер улӥ, оскиськымон сюлмын улӥ, Тынад азяд ярамон ужъёс лэсьтӥ». Соку Езекия туж зол бӧрдыны кутскиз.
4Исаия городысь эшшо потэ гинэ вал, кызьы солы Кузё-Инмар дорысь верамын вал:5«Берытскы но Езекиялы, Мынам калыкелэн кивалтӥсезлы, вера: ”Тынад атаедлэн, Давидлэн, Инмарез Кузё-Инмар тазьы шуэ: тынэсьтыд вӧсяськемдэ кылӥ, синвуостэ адӟи. Тани, Мон тонэ бурмыто; куинетӥ нуналэ Кузё-Инмарлэн корказ мынод;6улоно нуналъёсыд вӧзы дас вить ар ватсало, Ассириялэн эксэезлэн киызлэсь тонэ утё, та городэз но, Ачим понна, Давид ляльчие понна та городэз утё”».7Соку Исаия шуиз: «Нелькем смокваез кияды кутэ». Кутӥзы но потос вылэ понӥзы: со бурмиз.
8Езекия Исаиялы шуиз: «Кыӵе паймымон тодмет луоз, Кузё-Инмар монэ бурмытоз но куинетӥ нуналэ мон Кузё-Инмарлэн корказ мыно?»9Исаия шуиз: «Тани Кузё-Инмар дорысь тыныд тодмет, кудӥз возьматэ Кузё-Инмар Аслэсьтыз верамзэ быдэстоз шуыса: вужерлы дас тубатлы азьлане мыноно-а яке дас тубатлы берлане мыноно-а?»10Езекия шуиз: «Вужерлы капчи дас тубатлы азьлане мыныны; ӧвӧл, вужер дас тубатлы берлане мед берытскоз».11Исаия пророк Кузё-Инмарлы вазиськиз но вужерез Ахазлэн тубатъёсыз кузя, кытӥ со васькиз, дас тубатлы берлане берыктӥз.
12Со виын Вавилонлэн эксэез, Баладанлэн пиез Беродах Баладан, Езекиялы гожтэт но кузьым ыстӥз, со кылэм уго, Езекия висе шуыса.13Езекия ыстэм муртъёслэсь верамзэс кылзӥз но аслэсьтыз кеносъёссэ возьматӥз, азвесьсэ, зарнизэ, ческыт зыно арбериоссэ, дуно зыран макеоссэ, ожмаськон тӥрлык возён корказэ, ваньзэ, мар возиське вал шыкысъёсаз; аслаз корказ, юртъераз мар возиське вал, одӥг арберизэ но возьматытэк ӧз кельты.
14Исаия пророк Езекия эксэй доры лыктыса шуиз: «Мар веразы тыныд та адямиос, кытысь соос тон доры вуизы?» Езекия шуиз: «Кыдёкысь музъемысь соос вуылӥзы, Вавилонысь».15Соку Исаия шуиз: «Тынад коркасьтыд мар соос адӟизы?» Езекия шуиз: «Мар вань мынам коркам, ваньзэ адӟизы, дуно арбериос возён шыкысъёсысьтым одӥг арбериме но возьматытэк ӧй кельты».16Исаия Езекиялы шуиз: «Кузё-Инмарлэсь верамзэ кылзы:17Тани, вуозы нуналъёс, тынад коркад маид вань, ваньмыз басьтэмын луоз, атайёсыд та нуналозь мар люказы, сое но Вавилонэ нуозы; номыр но уз кыльы, – шуэ Кузё-Инмар.18Тон бордысь потоно пиостэ, тынэсьтыд вордӥськоно пиостэ кутозы но Вавилон эксэйлэн юртаз ужась карозы».19Езекия Исаиялы шуиз: «Кузё-Инмарлэн кылыз, кудзэ тон верад, ӟечлыко». Собере азьланьтӥз: «Мынам улон нуналъёсам каньыллыкоесь, ӟечлыкоесь дыръёс мед луозы!»
20Мукетыз сярысь, Езекиялэн вань батырлыко ужъёсыз сярысь, ӵыпет лэсьтэмез, ву бызён гумы кыскемез, городэ ву пыртэмез Иудей эксэйёслэн книгаязы гожтэмын.21Езекия кулӥз, атайёсыз пӧлы кошкиз; со интые Манассия пиез эксэе пуксиз.
Глава 20
