Choose Language
Old Testament Books
New Testament Books
2-тӥ книга
1Сава кунлэн кышномурт эксэез Соломонлэн данлыкез сярысь кылӥз но Соломонэз мадёнъёс пыр чакланы-эскерыны Иерусалиме лыктӥз, сьӧраз трос ваньбур вайиз, верблюдъёс вылэ ческыт зыно арбериосты, трос зарни, дуно изъёс тырыса вайизы. Соломон доры вуиз но, мар вал кышномурт эксэйлэн сюлмаз, ваньмыз сярысь вераськыса пукизы.2Эксэй кышномуртлэсь вань кылъёссэ Соломон валэктӥз, солы валэктыны луонтэмез Соломон понна ӧй вал.3Саваысь эксэй кышномурт адӟиз Соломонлэсь визьмо луэмзэ, солэсь пуктэм корказэ но,4ӝӧк сьӧрысьтыз сиён-юонъёссэ но, ляльчиосызлэсь улон интызэс, солы ужась-тыршисьёслэсь йӧно луэмзэс, соослэсь дӥськутсэс, вина омыръясьёссэ но соослэсь дӥськутсэс, солэсь Кузё-Инмарлэн корказ ветлонзэ, – со чылкак абдрамын вал.5Эксэйлы шуиз: «Зэм ик вылэм ас музъемам тынад ужъёсыд сярысь, визьлыкед сярысь кылэмъёсы,6но со кылъёслы мон ӧй оскы вал, татчы лыктыса ас синмыным адӟытозь. Но тынад трос визьлыкед сярысь мыным ӝынызэ но ӧз вералэ: мынам кылэм вань со кылан-веранъёслэсь тон визьмогес вылэмед.7Шудоесь тынад адямиосыд, шудоесь тынад медоосыд – котьку но тон азьын сылӥсьёс, тынэсьтыд визьлыко кылъёстэ кылӥсьёс!8Данлыко мед луоз Инмаред Кузё-Инмар доры Аслаз престол вылаз тонэ эксэе пуктыны ӟеч эриксэ сётӥсь Инмаред Кузё-Инмар. Тынад Инмаредлэн Израилез яратэменыз, сое пумтэм вапумъёс ӵожелы юнматон понна Со тонэ Израильлы эксэе пуктӥз, зэмлыко-шонерлыко мед кивалтод шуыса».
9Эксэй кышномурт эксэйлы сю кызь талант зарни кузьмаз, туж трос ческыт зын поттӥсь арбериос, дуно изъёс кузьмаз; Саваысь эксэй кышномуртлэн Соломон эксэйлы кузьмамъёсыз кадь мукет ческыт зын поттӥсь арбериос нокытын но ӧй вал.10Хирамлэн медоосыз, Соломонлэн Офирысь зарни вайись медоосыз горд пу, дуно изъёс но вайизы.11Та горд пулэсь эксэй Кузё-Инмарлэн корказ но эксэй корка доры мынӥсь тубат лэсьтӥз, кырӟась-чирдӥсьёслы цитраос, псалтирьёс дасяз. Ортчем аръёсы талы укшасьсэ Иудей музъемысь адӟылэмзы ӧй вал.12Нош Соломон эксэй Саваысь эксэй кышномуртлы ваньзэ сётӥз, мар солы кулэ вал, мар гинэ со ӧз куры, аслэсьтыз Соломон эксэйлы ваем арбериоссэ сяна. Собере со берен ас музъемаз вырӟиз, со ачиз но, медоосыз но.
13Одӥг ар куспын куать сю куатьтон куать талант зарни Соломон доры вуэ вал.14Со сяна, мурт кунъёсысь ыстэм муртъёс, вузчиос, Аравияысь вань эксэйёс, улосвылъёсын кивалтӥсьёс Соломонлы зарни но азвесь вайылӥзы.15Соломон эксэй дурем зарнилэсь кык сю бадӟымесь щитъёс лэсьтӥз, – котькуд щитлы куать сю сӥкль дурем зарни мынӥз, –16эшшо куинь сю пичи щитъёс лэсьтӥз дурем зарнилэсь, – куинь сю сӥкль зарни мынӥз котькуд щитлы; Ливан пулэсь пуктэм корка эксэй соосты тыриз.17Слон лылэсь эксэй бадӟым престол лэсьтӥз, сое чылкыт зарниен шобыртӥз.18Престол доры ӝутскыны куать тубат лэсьтӥз, зарнилэсь лёгиськон инты, кудӥз престол борды тупатэмын, пукон вӧзын мыд-мыд палаз гырпумен пыкъяськон, гырпумен пыкъяськыса пукон вӧзын киын лэсьтэм кык левъёс сыло вал;19эшшо куать тубатъёслэн мыд-мыд палазы дас кык левъёс пуктэмын. Таӵе престол одӥг эксэйлыкын но ӧй вал.20Соломон эксэйлэн вань юон сосудъёсыз зарнилэсь лэсьтэмын, Ливан пулэсь пуктэм коркан но вань сосудъёс быръем зарнилэсь лэсьтэмын; Соломон улон нуналъёсы азвесез номыр ӵотэ но ӧз понылэ,21уго эксэйлэн корабльёсыз Хирамлэн медоосыныз ӵош Фарсисэ ветлылӥзы, куинь арлы одӥг пол корабльёс Фарсисысь берен вуылӥзы, бӧрсязы зарни, азвесь, слон лы, маймылъёсты-обезьянъёсты, тутыгышъёсты вайылӥзы.
22Соломон эксэй узырлыкеныз но визьлыкеныз музъем вылысь вань эксэйёсты ортчиз.23Музъем вылысь вань эксэйёс Соломонэз адӟыны, солэн сюлмаз Инмарлэсь понэм визьлыко веранъёссэ кылзыны луонлыкъёс утчаса улӥзы.24Соос пӧлысь котькудӥз азвесь, зарни сосудъёс, дӥськут, ожмаськон тӥрлык, ческыт зын поттӥсь арбериос, валъёс, мулъёс арлы быдэ кузьымлы вайылӥз.25Соломонлэн ньыль сюрс вал пыртон интыез, ожмаськон уробоосыз, дас кык сюрс вал вылын ожмаськисьёсыз вал; соосты со ожмаськон уробоосты возён городъёсы интыяз, эксэй борды Иерусалиме но интыяз.26Ефрат шур дурысен Филистим музъемозь, Египет дорозь улӥсь эксэйёсын кузёяськыса со улӥз.27Иерусалимын [зарниез но] азвесез эксэй огшоры изэн ӵошкатӥз, нош кедырпуосты, трос луэменызы, улыг интыын будӥсь сикомор пуосын ӵошкатӥз.28Соломонлы валъёсты Египетысь но мукет музъемъёсысь вайылӥзы.
29Соломонлэн вань мукет ужъёсыз – нырысетӥосыз но, берпуметӥосыз но – Нафан пророклэн книгаяз гожтэмын, озьы ик Сӥломысь Ахиялэн азьпалэз тодытыса вераназ, Наватлэн Иеровоам пиез сярысь Иоиль азьпалэз адӟисьлэн адӟонъёсаз.30Соломон Иерусалимын эксэй луыса быдэс Израилен ньыльдон ар ӵоже кивалтӥз.31Соломон кулӥз но, сое атайёсыныз огазе Давидлэн, атаезлэн, городаз ватӥзы. Со интые эксэе Ровоам пиез пуксиз.
Глава 9
