Choose Language
Old Testament Books
New Testament Books
2-тӥ книга
1Соку Одедлэн Азария пиез вылэ Инмарлэн Духез васькиз но2со, Асалэн пумитаз потыса, солы шуиз: «Асаен ӵош вань Иуда выжы, Вениамин выжы, кылзэ монэ: Кузё-Инмар тӥледын, тӥ ке Соин; тӥ Сое утчады ке, тӥ Сое шедьтоды; нош тӥ Со дорысь палэнскиды ке, Со но тӥ дорысь палэнскоз.3Трос нуналъёс ӵоже Израиль зэм Инмартэк улоз, дышетӥсь священниктэк, законтэк улоз;4нош ёрмыса-ӝикаса улыкуз, Израильлэн Инмарезлы Кузё-Инмарлы вазиськизы ке, Сое утчазы ке, Со Ассэ шедьтыны соослы луонлык сётоз.5Со вакытъёсы пырисьёслы но, потӥсьёслы но каньыллык уз луы, музъем вылын вань улӥсьёс пӧлын туж бадӟымесь бугыръяськон-куашетонъёс луозы уго;6калык калыкен, город городэн ваче жугиськыса улозы, малы ке шуоно Инмар пӧртэм шугадӟонъёс пыр соосты куалекъян калэ вуттоз.7Нош тӥ юнматске, киосты медаз лябӟе, тӥляд ужъёсты понна пунэм берыктон вань уго».
8Та кылъёсты, Одед пророклэн пиезлэсь [Азариялэсь] азьпалзэ тодытыса верамзэ Аса кылӥз но йыг-йыг кариськиз, быдэс Иудей, Вениамин музъемъёсысь, Ефрем гурезьёсысь киултэм городъёсысьтыз вань юрӟым языческой сульдэръёсты-идолъёсты быдтӥз, Кузё-Инмар корка пырон бӧльмы азьысь Кузё-Инмарлы сӥзем курбон сётон ӝӧкез выльдӥз.9Быдэссэ Иуда но Вениамин выжыез, соос пӧлы улыны лыктэм Ефрем, Манассия, Симеон выжыысь адямиосты со огазе люказ; израиль калык пӧлысь тросэз со доры лыктӥзы, куке соос адӟизы, солэн Инмарез Кузё-Инмар со бордын улэ шуыса.10Аса дас витетӥ арзэ эксэй пуконын пукыку, куинетӥ толэзе Иерусалиме люкаськизы;11ожысь ваем ваньбур пӧлысь сизьым сю таза сюро пудоосты, сизьым сюрс векчи сюро пудоосты со нуналэ Кузё-Инмарлы курбон сётыны вайизы;12вань сюлмынызы, вань лулынызы атайёссылэсь Инмарзэс Кузё-Инмарез утчаны сӥзиськонэ пыриськизы;13нош кин Израильлэсь Инмарзэ Кузё-Инмарез ӧз ке утча, со кулыны кулэ – пичи-а, бадӟым-а со, пиосмурт-а, кышномурт-а со.14Бадӟым куараен, черектӥськыса, гумыен, сюръёсын шудэм улсын Кузё-Инмарлы кыл сётылӥзы.15Та кыл сётэмлы вань иудей калык шумпотӥз, уго вань сюлмысьтызы кыл сётылӥзы, туж тыршыса Сое утчазы, Ассэ шедьтыны Со соослы луонлык сётӥз. Кузё-Инмар соослы котыр ласянь каньыллык сётӥз.16Нош Аса эксэй аслэсьтыз анайзэ, Маахаез, тыпы сурдлы сульдэр-идол лэсьтэм понназ эксэй кышно луон данлыктэк кельтӥз. Анаезлэсь сульдэрзэ-идолзэ Аса погыртӥз но юдэсэн-юдэсэн кораз, Кедрон нёжалын сое сутӥз.17Израильын гурезь йылъёсын вӧсяськонъёс быдтэмын ӧй ке но вал, Асалэн сюлмыз вань улон нуналъёсыз ӵоже Кузё-Инмар понна оскиськымон вал.18Ас атаезлэсь сӥземзэ, аслэсьтыз сӥземзэ Инмар корка пыртӥз, – азвесь, зарни, сосудъёс.19Аса куамын витетӥ арзэ эксэйын пукытозь ожмаськонъёс ӧй вал.
Глава 15
