Choose Language
Old Testament Books
New Testament Books
2-тӥ книга
1Аса интые эксэе Иосафат пиез пуксиз; Израильын улӥсьёслы пумит малпанэз юнмаз.2Иудеяысь юнматэм городъёсы со ожгарчиоссэ интыяз, быдэс Иудей музъеме возьмаськись ожгарчиоссэ пуктылӥз, атаезлэн, Асалэн, киултэм Ефрем выжылэн городъёсаз но.3Кузё-Инмар Иосафатэн вал, малы ке шуоно со Давид атаезлэн нырысетӥ сюресъёсыз кузя ветлӥз, Ваал выллем инмаръёсыз утчаса ӧз улы,4со утчаз атаезлэсь Инмарзэ, Солэн курон-косонъёсызъя улӥз, Израильлэн ужъёсызъя ӧз улы.5Солэн киулысьтыз эксэйлыкез Кузё-Инмар юнматӥз, вань иудей калык Иосафатлы салам-кузьым сётъяз, солэн трос вал узырлыкез но, данлыкез но.6Кузё-Инмарлэн сюресъёсыз вылын солэн сюлмыз юнмаз; Иудеяысь гурезь йылъёсысь, тыпы сурдъёсысь вӧсьёсыз ворсаз.
7Эксэйлыкен куинетӥ арзэ кивалтыкуз, со ас дорысьтыз кузёйыръёсты Бенхаилэз, Овадияез, Захарияез, Нафанаилэз, Михеез Иудей городъёсы калыкез дышетыны ыстӥз,8соосын ик ӵош ыстӥз левитъёсты Шемаияез, Нефанияез, Зевадияез, Азаилэз, Шемирамофез, Ионафанэз, Адонияез, Товияез, Тов-Адонияез, соосын ӵош Елишама но Иорам священникъёсты ыстӥз.9Сьӧразы Кузё-Инмарлэн законэныз книгазы вал, соя соос Иудеятӥ дышетыса ветлӥзы, Иудеяысь вань городъёстӥ ветлӥзы но калыкез дышетӥзы.10Иудеялэн котыраз вань эксэйлыкъёс вылын Кузё-Инмарлэсь кышкан улӥз, Иосафатэн нокин но ӧз ожмаськы.11Нош филистим калык дорысь Иосафатлы саламъёс-кузьымъёс вайылӥзы; нош Аравияын улӥсьёс сюро векчи пудо вайылӥзы, азвесен выт тырылӥзы: сизьым сюрс сизьым сю ыж но сизьым сюрс сизьым сю кеч.
12Иосафат ялан ӝутскиз но ӝутскиз, Иудеяе изкаръёс, запаслы городъёс пуктылӥз.13Иудей городъёсын трос вал солэн запасъёсыз, нош Иерусалимын трос вал ожгарчиос, кышкасьтэм муртъёс.14Тани соослэн выжыоссыя списоксы: Иудалэн сюрс муртэн кивалтӥсьёсыз: Адна кивалтӥсь, солэн куинь сю сюрс туж усто ожгарчиосыз;15со бӧрсьы Иоханан кивалтӥсь, солэн кык сю тямыстон сюрс ожгарчиосыз;16со бӧрсьы мынэ Кузё-Инмар дорын ужаса-тыршыса улӥсь Амасия, Зӥхрилэн пиез, солэн кык сю сюрс устоесь ожгарчиосыз.17Вениаминлэн: туж усто ожгарчиез Елиада, солэн пукыӵен, щитэн сылӥсь кык сю сюрс ожгарчиосыз;18со бӧрсьын мынэ Иегозавад, солэн сю тямыстон сюрс ож тӥрлыкен сылӥсь ожгарчиосыз.19Тани таос, Иудеяысь юнматэм городъёсы эксэйлэн интыямъёсыз сяна, эксэйлы ужаса-тыршыса улӥсьёс луо.
Глава 17
