Choose Language
Old Testament Books
New Testament Books
1Ниневия сярысь азьпалзэ тодытыса веран; Елкосейысь Наумлэн адӟонъёсыныз книга.
2Кузё-Инмар кылэз юн юась, пунэм берыктӥсь Инмар;
пунэм берыктӥсь Кузё-Инмар вожез потон дыръя кышкыт:
Аслаз тушмонъёсызлы Кузё-Инмар пунэмзэ берыктэ,
пумитъяськисьёссэ Со уз жаля.
3Кузё-Инмар – кема чидась, быдӟым Со Аслаз кужыменыз,
вӧсь карытэк уг кельты;
сильтӧлэн, бугрес тӧлын лыктэ Кузё-Инмар,
пилем Солэн пыд улысьтыз ӝутскем тузон.
4Со зарезьлы косоз но, зарезь куасьмоз, вань шуръёс бырозы;
шуяло Васан но Кармил, бездэ Ливанлэн буёлэз.
5Со азьын гурезьёс куалекъяло, мувыръёс ышо-быро,
музъем зурка Солэн азяз,
быдэс дунневыл но отын улӥсьёс куалекъяло.
6Со вожзэ поттыку, Со азьын сылыны кин быгатоз?
Солэн вожпотонэзлэсь тылзэ кин чидалоз?
Солэн вожпотонэз тыл кадь гомаса мынэ;
изгурезьёс Со азьын куашкало.
7Ӟечлыко Кузё-Инмар, шугадӟон нуналэ пегӟон инты Со;
Со вылэ оскиськыса улӥсьёсты Со тодэ.
8Нош Ниневияез, бадӟым ву лэзьыса, выжыозяз куашкатоз,
тушмонъёсыз вылэ пеймытлык лэзиськоз.
9Кузё-Инмарлы пумит мар лэсьтыны малпаськоды?
Со тӥледыз быдтоз, шугадӟон вылысен уз ни луы.
10Уго бышкись будос кадь ог-огеныз герӟаськыса,
юисьёс кадь кудӟемын луыса,
соос кӧс куро кадь тылын чылкак ньылэмын луозы.
11Тон пушкысь Кузё-Инмарлы пумит уж лэсьтыны малпась,
мыдланес визь-кенешъёс сётъясь, потӥз.
12Тазьы шуэ Кузё-Инмар: соос кышкасьтэмесь, трос ке но,
но соос корамын луозы, ышозы-бырозы;
нош тонэ секытлыкъёсын курадӟытылӥ ке но,
азьланяз уг ни курадӟытылы.
13Табере солэсь тон вылын кыллись сиессэ пыргыто,
жильыетъёстэ чигтыло.
14Нош тон пумысен, Ассур, Кузё-Инмар таӵе пуктон сётӥз: тынэсьтыд нимдэ нуллӥсь выжы уз ни луы; тынад инмаредлэн коркасьтыз вӧлыса лэсьтэм сульдэръёссэ, йыбыртъяно макеоссэ быдто, отчы тыныд шайгу дасяло, уго тонэ синазькыль карозы.
15Тани, гурезьёсын тупаса улон ивортӥсьлэн, ӟеч ивор верасьлэн пыдъёсыз: праздникъёсты шулдыр ортчыты, Иудея, сётэм кылъёстэ быдэсъя, уго тон вылтӥ сьӧлыклэсь кышкасьтэм уз ни ортчы: со чылкак быдтэмын ни.
Глава 1
