Choose Language
Old Testament Books
New Testament Books
1Со мыным Кузё-Инмарлэн Кылчинэз азьын сылӥсь быдӟым иереез, Иисусэз, но солы пумитъяськон понна бурпалаз сылӥсь шайтанэз возьматӥз.2Кузё-Инмар шайтанлы шуиз: «Кузё-Инмар тонэ, шайтан, медаз лэзьы, медаз лэзьы тонэ Иерусалимез бырйись Кузё-Инмар. Тыл пӧлысь поттэм сэрегпум ӧвӧл-а со?»3Нош Иисус дӥсяськемын вал саптаськем дӥськутэн, Кылчин азьын со сылӥз.4Кылчин, ответ сётыса, солэн азяз сылӥсьёслы тазьы шуиз: «Со вылысь саптаськем дӥсянзэ кыле». Нош солы аслыз шуиз: «Учкы. Тынэсьтыд янгыштэ Мон куштӥ, чылкыт-чебер дӥськут тон вылэ дӥсясько».5Собере шуиз: «Солэн йыр вылаз чылкыт кидар изьы понэ». Солэн йыр вылаз чылкыт кидар изьы понӥзы, дӥськут дӥсязы; нош Кузё-Инмарлэн Кылчинэз сылӥз.6Кузё-Инмарлэн Кылчинэз, веранзэ юнматыса, Иисуслы шуиз:
7«Тазьы шуэ Саваоф Кузё-Инмар:
Мынам сюресъёсы кузя ветлӥд ке,
Мынэсьтым косонъёсме быдэсъяд ке,
соку тон Мынам коркасьтым (храмысь) ужъёсын кивалтыса улод,
азбаръёсме чакласа-учкыса улод.
Та сылӥсьёс вискытӥ ветлыны тыныд луонлык сёто.
8Кылзы ук, Иисус, быдӟым иерей,
тон но, тынад азяд пукись матысьёсыд но,
уго соос сӥё-дано воргоронъёс:
тани, Мон Аслэсьтым ляльчиме, Пушъетэз, вайисько.
9Тани со из, кудзэ Мон Иисус азе понӥсько;
та одӥг из вылын сизьым синъёсыз;
тани, Мон со вылэ вандыса пусъёссэ гожто, –
шуэ Саваоф Кузё-Инмар, –
одӥг нунал куспын та музъемлэсь сьӧлыксэ ӵошкато.
10Со нуналэ, – шуэ Саваоф Кузё-Инмар, –
ог-огдэс виноград улэ, смоквапу улэ ӧтёды».
Глава 3
