Bible Stories
Choose language
Choose Old Testament Story
Choose New Testament Story
МЕЗДЫСЬЛÖН МЕДВОДДЗА ЛОКТÖМ ЙЫЛЫСЬ ВОДЗВЫВ ЮÖРТÖМЪЯС
Тайö небöгыслöн заводитчöмас ми висьталiм, мый Ен вöчис мортöс Ас кодьыс. Енмыс кöсйис, медым мортыс вöлi Сы кодь бур сьöлöма, веськыд да мыжтöм. Но медводдза мортъяс – Адам да Ева – мыжмисны. Сэсся налöн медводдза Каин пиыс виис ассьыс Авель воксö. Регыдöн муыс тырис лёкнас. Та йылысь Ен шуис: «Ставныс кежисны Енсьыс, олöны шогмытöма. Бурсö вöчысьыс абу, весиг öти абу».
Ен бöрйис Израиль войтырöс, медым найö эскисны Сылы да олiсны Сылöн тшöктöмъяс серти. Аслас пророкъяс пыр Ен тшöкыда висьтавлiс Израиль войтырлы, мый мöдöдас налы Мездысьöс.
Сизимсё воöн водзджык Кристослöн чужтöдз на Исай пророк висьтавлiс: «Кага чужис миянлы, пиöс сетöма миянлы. Сiйö лоас ыджыдалысьöн. Сiйöс шуасны Шензяна Велöдысьöн, Вына Енмöн, Пыр олысь Батьöн, Лöньлуныслöн Öксыöн». Исай пророклöн небöгысь ми тöдмалам, мый Мездысь локтас му вылас, медым бергöдны йöзсö Ен дiнö, сетны Ассьыс олöмсö йöзлöн мыжъяс вöсна да мездыны быдöнöс, кодi эскас Сылы. Микей пророк весиг юöртiс, кöнi Мездысь чужас: «Тэ, Виплием-Епрафа, Иуда каръясысь медiчöт. Но тэнад карысь петас Израильлы юралысь».
Исус Кристослöн му вылö локтöмöн пророкъяслöн кывъясыс збыльмисны. Водзö тайö небöгас лоö висьталöма Исуслöн чужöм йылысь, Сылöн олöм да велöдöм йылысь, Сылöн кулöм да ловзьöм йылысь.
Псалом 13:3, Исай 9:6, Микей 5:2
278 
