Bible Stories
Choose language
Choose Old Testament Story
Choose New Testament Story
ИСУСЛÖН ЛОВЗЬÖМ
Шыпуртаяс вой и лун видзисны Исуслысь дзебанiнсö. Шойччан лун бöрын водз асывнас виччысьтöг муыс ёна вöрзис: Господьлöн андел лэччис енэжсяньыс. Сiйö югъялiс чардби моз, паськöмыс вöлi лым кодь еджыд. Андел вештiс изсö пыранiнсьыс да пуксис сы вылö. Видзысьяс кувмöныс повзисны, найöс дзöрöм босьтiс. На пиысь кодсюрö мунiсны карас да висьталiсны став лоöмтор йывсьыс аркирейяслы. Аркирейяс чукöртчисны пöрысьяскöд, сэсся сёрнитчöм бöраныс сетiсны шыпуртаяслы уна сьöм да шуисны: «Висьталöй, мый войнас тiян узигкостi велöдчысьясыс волöмаöсь да гусялöмаöсь шойсö. Кывсяс кö тайö юралысьöдз, ми сiйöс эскöдам да тiянöс доръям». Шыпуртаяс босьтiсны сьöмсö да вöчисны аркирейяслöн тшöктöм серти.
Шондi петiгöн Магдала Марья, Яковлöн Марья мамыс да Саломия мунiсны Исуслöн дзебанiнö, ас костаныс сёрнитiсны: «Кодi путкыльтас миянлы изсö?» Воиганыс найö аддзисны: изсö вöлi вештöма пыранiнсьыс. Кор аньяс пырисны дзебанiнö, аддзисны еджыд паськöма пукалысь зонмöс да ёна повзисны. Сiйö шуис налы: «Энö полöй. Ме тöда, тi корсянныд тувъявлöм Исусöс. Сiйö танi абу. Сiйö ловзис Аслас шуöм серти. Локтöй, видзöдлöй Господьлысь куйланiнсö. Мунöй öдйöджык да юöртöй велöдчысьясыслы, мый Исус ловзьöма».
Аньяс пырысьтöм-пыр петiсны дзебанiнысь да полiгтыр, но ёна нимкодясьöмöн, котöртiсны юöртны та йылысь Исуслöн велöдчысьяслы.
Матвей 28:1-15, Марк 16:1-7
428 
