Bible Stories
Choose language
Choose Old Testament Story
Choose New Testament Story
ПЕТЫР ВИСЬТАЛÖ ИСУС ЙЫЛЫСЬ
Кор велöдчысьяс тырисны Вежа Лолöн да пондiсны сёрнитны мукöд кывъяс вылын, уна йöз чукöртчис на дiнö. Сэки Петыр сувтiс да гораа шыасис: «Юдей войтыр да Ерусалимын мукöд олысьяс! Кывзöй менö да тöд выланыд босьтöй менсьым висьталöмöс. Та йылысь Иоиль пророк на висьтавлiс:
– Бöръя лунъясö, – висьталö Ен,
– кисьта Ассьым Лолöс быд морт вылö.
Тiян пиянныд да нывъясныд пондасны пророкавны,
зонъясныд кутасны аддзывны Енсянь петкöдчылöмъяс,
а олöмаяс пондасны вöтавны збыльмана вöтъяс.
Сiйö лунъясö кисьта Ассьым Лолöс
Аслам кесйöгъяс да кесйöг аньяс вылö,
найö пондасны пророкавны.
И быдöн, кодi шыасяс Господь нимö, мездмас.
Израиль войтыр, кывзöй! Назаретса Исусöс сувтöдiс тiянлы Ачыс Енмыс. Сiйö петкöдлiс тайöс тiянлы шензьöданаторъясöн да индысьпасъясöн, кодъясöс вöчис тiян пöвстын Исус пыр. Тайöс тi асьныд тöданныд. Тi тувъялiнныд-виинныд Исусöс. Но Енмыс ловзьöдiс Сiйöс да мездiс кулöмыслöн вын улысь, öд кулöмыс эз вермы Сiйöс кутны.
Дзик тайö Исусöс Енмыс ловзьöдiс, и ми ставным тайöс аддзылiм. Енмыс кыпöдiс Сiйöс да пуксьöдiс веськыдладорас. Батьсяньыс Сiйö босьтiс кöсйысьöм Вежа Лолöс да кисьтiс миян вылö, кыдзи тi öнi аддзанныд да кыланныд».
Петырлöн кывъясыс вöрзьöдiсны йöзыслысь сьöлöмсö. Найö шуисны Петырлы да мукöд апостолъяслы: «Вокъяс, мый миянлы вöчнысö?» Петыр шуис налы: «Бергöдчöй мыжъяссьыныд да пыртчöй Исус Кристос нимöн, медым Ен прöститас мыжъяснытö. Сэки Ен сетас тiянлы Вежа Лолöс. Öд тайöс кöсйысьöма тiянлы, тiян ныв-пилы да став ылiсаыслы – дзик быдöнлы, кодöс корас Господь, миян Ен».
Унаöн долыдпырысь сибöдiсны сьöлöманыс Петырлысь кывъяссö да пыртчисны. Сiйö лунö öтувтчис эскысьяс дiнö куим сюрс гöгöр морт.
Апостолъяслöн уджъяс 2:14-47
446 
