«Стяда и шнасть Азорть, Шкаентень, фалу и пефтома пинге! Шнавоза тонь кайги лемце, кона эрь шнамада вяре! Тон ськамот Азорсь! Тон тиить менельть, менелень менельхнень и сембе тяшттнень, модать и семботь, мезе лангсонза, оцюветтнень и семботь, мезе эсост. Тон семботь эреклафнесак, и менелень ушмовийхне сюконякшнихть тейть».
Ломаттне каендасть, мес аеркшнесть Азорть эзда, озондсть: «Шкаеньке, инь оцю Шкайсь, вии и пелькс, сотксонь и пара мялень ванфты! Тяни тяст уле ёмланякс тонь инголет сембе ризнаманьке, конат сатнемазь минь, оцязороньконь и ширязоньконь, озксвятиеньконь и шкаймаряеньконь, аляньконь и марнек ломаньтналцень, Ассириянь оцязорхнень пингста сявомок тянемс. Сембоса, мезе сатнемазь, тон видешисат, сяс мес тон тиендеть видешис коре, а минь муворуфтама. Семботь тянь инкса минь ладятама мархтот соткс, сёрмадсаськ, а вятиеньке, левиеннетне и озксвятиеньке кемокстасазь сонь эсь лапш суркссост».
Путнезь кядьснон тя сотксть алу содаф ломатть и кемокснезь эсь лапш суркссост. Лия ломаттневок макссть кеме вал эрямс тя соткть коряс и пяшкотькшнемс Шкаень сембе кошардомвалхнень и мярьгоматнень.
248 
