Bible Stories
Choose Language
Choose Old Testament Story
Choose New Testament Story
ИСУС ЦЁРАНЯСЬ НАЗАРЕТСА
Иосиф, Мария и ёмла Исуссь эрясть Египетса Ирод оцязорть куломозонза. Мзярда Ирод кулось, Азорть ангелоц тага эвондась Иосифонь онозонза, мярьгсь: «Стяк, сявить иднять мархта тядянц и архт Израилень мастору, кулость идень ваймоть вешендиенза».
Иосиф тись ангелть мярьгоманц коряс, мрдась Израили. Иудеяв пельсь молеманц, кулезе, тоса оцязорондась Иродонь цёрац Архелай. Эста тейнза онцтонза мярькфоль молемс иднять мархта Назарет ошу, коса сядонголе эрясь Мария.
Минь прокс аф лама содатама Назаретса Исусонь эряфонц колга. Иосиф аляц покодсь узерьса шапикс, Исус лездсь тейнза тя тевса, сонцьке арась узерьса шапикс. Евангелияса пяк кржа сёрматф Исусонь идькспингонц и одкспингонц колга. Аньцек сявок, мезть лувсаськ, корхтай тейнек ламонь колга: «Иднясь кассь-кеподсь, кемокснесь ваймоц, пяшкотькшнесь смузьда, Шкаень паромяльське ульсь лангсонза». И нинге: «Исус кассь, кизонзон мархта кассь смузьшицка, кельгомаське, конань сон сатозе Шкайть и ломаттнень эзда».
Тяса эряви лятфтамс, Исус кулхцондозень мода лангонь тядянзон-алянзон. Евангелияса тянь колга луфтама: «Кулхцондозень синь». Сембе шабатненди эряви ваномс тядяснон-аляснон мяльснон. Тянь ёрасы сонць Шкайсь. Шкаень кемонь кошардомвалхнень эзда фкаса корхтави: «Лувить аляцень, тядяцень, эста тонценьге саттанза пароши и кувалгодыхть эрямань шитне тя модать лангса, конань Азорсь, Шкайце макссы тейть».
МАТВ. 2:19-23; ЛИСЕМА 20:12; ЛУКА 2:40, 50-52
306 
