Bible Stories
Choose Language
Choose Old Testament Story
Choose New Testament Story
ТОНАФНИХНЕНЬ ЛАНГС ИНЯРУ ВАЙМОПОЖФТЬ ВАЛГОМАЦ
Вайшуфта пандста, коста Исус кеподсь менели, тонафниенза мрдасть Ерусалиму, сувасть вярце кудбяльксс. Тоса синь марса апак лотксек озондсть, ётксостольхть Мария – Исусть тядяц и нинге мзярошка ава. Иудань вастс кочказь кемгафтувоце апостолкс – Матвеень.
Сась Ведьгемоньшинь илась, кона ётафневсь очижида меле ведьгемонце шиня и лувондовсь нумань шумордама шикс. Сембе кемгафтува апостолхне тага пуромсть марс. Апак учт менельса кайгозевсь увф, сон вии варма лацоль и пяшкодезе марнек кудботмоть, коса синь ащесть. Сяльде эвондасть явожкшни кяльхть, толонь кодямот, и мадсть тифтень-тифтень эрьть лангс. Эстокиге сембе пяшкодсть Иняру Ваймопожфса и ушедсть корхтама лия кяльса, конатнень синь тянемс ашезь сода.
Ся пингть Ерусалимса ульсть Шкайс кемай иудейхть, конат эрясть лия масторга и састь сей илань ётафтома. Мзярда синь кулезь увфть, пуромсть ся вастти, коста сон марявсь, и кармасть абонкшнема, сяс мес эрьсь кулезе, кода апостолхне корхтасть синь шачема кяльсост. Дивандазь синь ушедсть кизефнема фкяфкянь: «Кали ня корхтайхне аф Галилеянь эряйхть? Кода ина ёткстонк эрьсь кульсы эсь шачема кяль-валонц?... Синь корхтайхть кяльсонк Шкаень пяк оцю тефнень колга!»
Ламотне таколдозь кизефнесть: «Мезе тяфтамсь?» Лиятне пеедезь корхтасть: «Синь симсть ламбама винада...»
ТЕФНЕ 1:12-26; 2:1-13
444 
