Bible Stories
Choose Language
Choose Old Testament Story
Choose New Testament Story
ПЯТАНЬ И ИОАННОНЬ ПЯКСТАМАСНА
Шаморть пчкафтомада и Пятань тонафтома валдонза меле ветешка тёжянь ломань кармасть кемама Исус Кристосонди. Аньцек озксвятихне и оцюнятне пейхть порьсть Пятань и Иоаннонь лангс корхтамаснон инкса, и мярьгсть синь пякстамдост. Омбоце шиня Ерусалимса кочкавсть оцюнятне, пряатятне, койти тонафтыхне, озксвятиень оцюнятне. Синь тертьфтезь апостолхнень, ладязь кучкати и кизефтезь шаморть пчкафтоманц колга: «Кодама вийса али кинь лемса тиесть тянь?»
Эста Пята пяшкодсь Иняру Ваймопожфта и кармась корхтама тейст: «Ломаньтналонь оцюнят, Израилень прят! Кда тячи вешихть эздонк кирдемс вал шаморти паронь тиеманкса, кода сон пчкафтф, эста содасть и улеза содаф Израилень марнек ломаньтналти: тя тиф Назаретонь Исус Кристосонь лемса, конань тинь вачкодесть крёзти и конань Шкайсь вельмофтезе кулофста. Тя сон стяфтозе инголент шаморть шумбраста. Исус – кевсь, конань тинь кудонь путомста ёрдасть, аньцек сон арась кудужень кирди кевкс. Киньге лиянь эса аш идема, сяс мес аш лия лем менельть ала, кона улель максф ломаттненди, конань вельде минь идеволеме пря».
Вятихне мярьгсть апостолхненди аф ламос лисемс и ушедсть эсь ётковаст латцемонза: «Мезе тиемс ня ломаттнень мархта? Вдь Ерусалимса сембонди содаф, синь тисть афкуксонь ацерма, миндейнек тя аф сёпови. Аньцек аф максома сяда тов срафтомс тя кулять, мярьктяма – аф кунцелезь Исусонь лемонц фкявок ломань ингольде».
Апостолхнень меки серьгядемстост синь казямста мярьгсть тейст аф корхтамс и аф тонафтомс Исусонь лемса. Аньцек Пята и Иоанн каршезост пшкядсть: «Арьседовака, кали виде ули Шкайть инголе – кулхцондомс тинь сяда пяк Шкайть коряс? Тейнек аш кода аф корхнемс сянь колга, мезе няеме и кулеме». Эста озксвятиень оцюнятне сяда казямста эвфнезь-шукшезь апостолхнень, но ломаньтналда пелезь, нолдазь синь. Ашесть му туфтал муворгофтомс, сяс мес сембе шнасть Шкайть эса тятевть инкса.
ТЕФНЕ 4:1-21
450 
