Bible Stories
Выбрать язык
Choose Old Testament Story
Choose New Testament Story
ИЛИЯ НО ВААЛЛЭН ПРОРОКЪЁСЫЗ
Кузё-Инмар Илиялы таӵе косон сётӥз: Ахав эксэй доры мыноно но куроно вань калыкез, Ваал сульдэрлэсь вань пророкъёссэ Кармил гурезе люканы. Эксэй соосты ваньзэс люкам бере, Илия соослы таӵе кылъёсын вазиськиз: «Кема-а тӥ шонаськыса улоды на? Кузё-Инмар – Инмар ке луэ, соку Со сьӧры мынэ, нош Ваал ке, – Ваал сьӧры ик мынэ». Нокин но солэн пумитаз ӧз вазьы. Соку Илия калыклы шуиз: «Кузё-Инмарлэн пророкъёсыз пӧлысь мон одӥгнам кыли, нош Вааллэн – ньыль сю витьтон пророкъёсыз. Милемлы кык ошпи вае. Вааллэн пророкъёсыз огзэ ошпиез мед быръёзы, шори ӵогыса сое писъёс вылэ мед понозы, но тыл медаз понэ. Мон басьто мукетсэ ошпиез, писъёс вылэ поно, но тыл уг поны. Тӥ вазиське асьтэлэн инмардылы, нош мон вазисько аслам Инмарелы, Кузё-Инмарлы. Со Инмар, Кудӥз тыл лэзёз, Со ик вань Зэм Инмар».
Вааллэн пророкъёсыз ошпиез писъёс вылэ понӥзы но тазьы черекъяны кутскизы: «Э Ваал! Кыл милемыз!» Озьы соос, оло нош, быдэс нунал кесяськизы, но пайдаез ӧз луы. Соку Илия дас кык из кутӥз но курбон сётон инты лэсьтӥз, вандэм ошпиез шори ӵогыса, писъёс вылэ понӥз. Собере со курбон сётон инты вылэ, куинь пол кутскыса, быдэн ньыль ведра ву кисьтыны косӥз, – курбон сётон котыре гудӟем гу вуэн пачылмиз. Собере Илия вӧсяськыны кутскиз: «Кузё-Инмаре, Авраамлэн, Исааклэн, Израильлэн Инмарез! Та нуналэ ваньмыз мед тодозы: Израильын Тон гинэ Инмар луиськод, мон Тынад ляльчиед, ваньзэ Тынад кылыдъя лэсьтӥсько. Кыл ук монэ, Кузё-Инмаре, кыл монэ! Та калык мед тодоз, Тон, Кузё-Инмаре, Инмар луиськод шуыса, соослэсь сюлэмзэс Ас палад берыкты». Кузё-Инмар Ас пророкезлэсь куриськемзэ кылӥз, инмысь васькем тыл пуэз аратӥз, котырысь пу но из, ву гинэ но, ӝуаны кутскизы. Тае адӟыса, вань калык ымныр вылаз уськытскиз но черектӥськиз: «Кузё-Инмар – со Инмар, Кузё-Инмар – со Инмар!» Тазьы Кузё-Инмар возьматӥз: Со гинэ Зэм Инмар, нош Вааллэн пророкъёсыз – со ӧрекчаськисьёс.
3 Эксэйлык 18:18-39
196 
