Выбрать язык
Книги Ветхого Завета
Книги Нового Завета
с русским текстомАллилуя!
1Шнадо Азоронть!
Сон паро. Сонзэ седеймарямозо пингеде пингес.
2Кинень ёвтави Азоронть покш вийдензэ,
кинень пачтявить весе Сонзэ шнамонзо?
3Уцяскавт сетне, кить эрить видечинь коряс
ды эрьва шкасто теить видестэ!
4Ледстямак монь, Азоро, Эсеть раськентень вечкемасот,
илямак стувто моньгак сонзэ идемстэ.
5Кадык монгак неян Тонь кочказтнень паро эрямост,
эрьгелян Тонь раськенть эрьгелемасо,
Тонь ломантнень марто вейсэ
улян мельспаросо эсень уцяскан коряс.
6Минь, кода тетянокак, теинек пежетть,
теинек зыянчи, теинек авидечи.
7Тетянок эзизь чарькоде Египетсэ Тонь дивань тевтнень,
стувтнесть Тонь ламо чанстев теветь
ды стясть Тонь каршо иневедь чиресэ,
Якстере иневеденть чиресэ.
8Азорось жо идинзе сынст Эсензэ лемензэ кисэ,
Эсензэ ине виенть невтеманзо кисэ.
9Сон мерсь кежейстэ Якстере иневедентень –
ды сон коськсь.
Сон ютавтызе раськензэ потмаксканзо
кода коське таркава.
10Сон идинзе сынст яттнэнь эйстэ
ды менстинзе сынст душманонь кедьстэ.
11Ведтне вельтизь сынст душмантнэнь –
вейкеяк эзь кадово.
12Сестэ минек тетянок кемезевсть Сонзэ валтнэнень
ды морасть Сонензэ шнамоморо.
13Ансяк курок сынь стувтызь Сонзэ тевензэ,
эзть карма учомо Сонзэ превс путоманзо.
14Сынь кодаяк эзть пештяво чаво модасо
ды варчавтнесть Пазонть эрицявтомо таркасо.
15Сон топавтызе вешемаст,
ансяк кучсь лангозост правтыця стака орма.
16Чаво модасо аштемстэ сынст сельмест сявадсть Моисей лангс
ды Азоронь иневанькс важонть, Аарон лангс.
17Mодась лазтотсь ды нилизе Дафанонь,
ды вельтинзе Авирононь перька аштицятнень.
18Тол кирвазсь те таркасонть,
те толсонть палсть Пазонь акунсолыцятне.
19Хорив пандонть вакссо минек тетянок валсть ваз
ды сюконясть те кедьтеевксэнтень.
20Сынь полавтызь Пазонть, эсь Инексчинть,
валозь буканть, тикшеде ярсыцянть, лангс.
21Сынь стувтызь Пазонть, эсест Идицянть,
кона тейсь ине тевть Египетсэ,
22дивань тевть Хамонь модасонть,
тандавтыця тевть Якстере иневеденть чиресэ.
23Пазось аноколь маштнемс-чавномс сынст.
Ансяк Моисей, Сонзэ кочказесь,
стясь Сонзэ ды раськенть юткс ды энялдсь Пазонтень
а маштомс [сынст] кежень пачк.
24Сынь мезекскак эзизь путо мельстуиця моданть,
эзть кеме Сонзэ валонтень.
25Сынь музгордсть эсест коцткудотнесэ,
арасель мелест кунсоломс Азоронть.
26Сестэ Сон кепедизе лангозост кедензэ
ды сайсь мель правтомс сынст чаво модасонть,
27ёмавтнемс сынст эйкакштнень-нуцькатнень
лия раськетнень юткова,
сравтнемс сынст лия-лия масторга.
28Сынь кармасть сюконямо Ваалфегорнэнь
ды ярсасть анокстнэде, конат кандозельть оймевтеме пазтнэнень.
29Сынь ацирьгавтсть Пазонть тевсэст,
ды педясь тенст стака орма.
30Сестэ раськенть ютксто стясь Финеес.
Сон тейсь суд – ды ормась потась.*а
31Тень кисэ сон ловозель видечинь ломанекс
буестэ буес, пингеде пингес.
32Меривань ведтнень вакссо
сынь савтызь Пазонть кежензэ,
ды Моисей кирдсь апаро сынст кисэ.
33Сынь пачтизь сонзэ покш ризксэс,
ды ливтясть кургостонзо апаро валтнэ.
34Сынь эзизь маштне сеть раськетнень,
конатнень мерсь маштнемс Азорось.
35Сынь човоргадсть лия раськетнень марто
ды саизь эстест сынст койтнень-кирдатнень.
36Сынь сюконясть кедьсэ теезь сынст пазтнэнень,
мезесь кершинзе сынст.
37Сынь макснесть эсест цёраст ды тейтерест
аноксокс идемевстненень.
38Сынь валсть чумовтомо верь, эсест цёраст ды тейтерест верь,
конатнень макснесть аноксокс Ханаанонь кедьсэ теезь пазтнэнень.
Ды симдизь моданть верьсэ.
39Сынь пацькизь эсь пряст нулгодькс тевсэ,
ваясть ускурямос-усксевемас*б.
40Азоронть кежензэ кирвазсть Эсензэ раськенть лангс,
ды седеезэ кельмесь Эсензэ ломантнень эйстэ.
41Сон максынзе сынст лия раськетнень кедьс,
ды сынст авечкицятне теевсть тенст азорокс.
42Душмантнэ лепштясть сынст,
ды сынь мендявсть кедест ало.
43Ламоксть Азорось идесь сынст.
Ансяк сынь ацирьгавтсть [Сонзэ] акунсоломасо
ды седеяк ваясть пежетьс.
44Ялатеке Сон несь сынст майсемаст,
зярдо марясь рангомаст.
45Сон ледстизе мартост ладязь Эсензэ вейсэньлувонзо
ды невтизе сыненст Эсензэ покш седеймарямонзо.
46Сон сыремтсь седеймарямо сетнесэ,
кить саизь сынст полонс.
47Идемизь минек, Азоро, минек Пазонок!
Велявтомизь минек лия раськетнень кедьстэ!
Сестэ минь одов карматано шнамо Тонь иневанькс лементь
ды марямо мельспаро Тонь инексчить кувалма.
Шнамо
*а 105:30 Вант: Ловомат 25:7,8
*б 105:39 ускурямс – улемс авидекс мирде эли ни икеле; тесэ, кода Ташто Вейсэньлувонь ламо лия таркатневаяк, чарькодеви истяяк: улемс авидекс Пазонтень.
Глава 105