Выбрать язык
Книги Ветхого Завета
Книги Нового Завета
с русским текстом
1Уцяскавт сеть, конатнень кист ванькс,
ды кить эрить Азоронть коензэ*б коряс.
2Уцяскавт, кить ванстыть Сонзэ мелензэ-валонзо,
кить весе седейсэ вешнить Сонзэ.
3Сынь а теить зыянов тевть,
сынь якить Сонзэ киява.
4Тон, Азоро, максыть миненек Эсеть кармавтоматнень*в
педе-пев сынст топавтомс.
5Вай, бути улевельть кеметь монь эскельксэнь,
ды мон топавтовлинь Тонь аравтовкстнэнь*г!
6Зярдо сельмень икеле весе Тонь кармавтовкстнэ*д,
мон визьксчамас а совавтован.
7Ванькс седейстэ ёвтан Теть сюкпря,
зярдо тонадан Тонь видечинь судтнэнень.
8Карман эрямо Тонь койтнень коряс,
ансяк зярдояк монь илямак кадо.
9Кода од ломанентень а туемс виде килангсто? –
Эрямс Тонь валот коряс.
10Весе седейсэнь мон вешнян Тонь.
Иля максо монень пурдамс Тонь кармавтовкстнэде.
11Тонь икеле пежетень а теемга,
мон кекшия седеезэнь Тонь валот.
12Чанстязят Тон, Азоро!
Тонавтомак монь Эсеть койтненень.
13Мон мельга-мельцек ёвтнян
весе Тонь судтнэнь-аравтовкстнэнь.
14Тонь мелеть-валот киява молезь,
мон кенярдан, кода кенярдыть эрьва кодамо сюпавчинтень.
15Тонь кармавтоматнеде арсян
ды пек ванан Тонь китнень лангс.
16Тонь аравтовкстнэсэ оймавтан эсь прям,
зярдояк а стувтнян Тонь валот.
17Тейть паро Тонь урентень,
ды карман эрямо ды ванстомо Тонь валот.
18Панжить монь сельмень,
ды мон несынь Тонь коенть дивань тевтнень.
19Мон инже те моданть лангсо.
Иля кекше мондень Тонь кармавтовксот.
20Монь оймем ченги-палы, свал учи Тонь виде судтнэнь.
21Тон кардыть визькстэметнень, сюдозтнень,
Тонь кармавтовкстнэнь эйстэ пурдыцятнень.
22Саить лангстон покордамонть ды пеедькшнеманть,
эдь мон эрян Тонь мерематнень коряс.
23Прявттнэ пурнавсть ды эрьва мезть тапарить монь каршо,
ансяк мон, уреть, арсян Тонь аравтовкстнэде.
24Тонь мелеть-валот – монь мельспаром,
[ды Тонь аравтовксот] – монь превс путыцян.
25Монь оймем правтозь.
Вельмевтемак Тонь валот вельде!
26Мон ёвтнинь Теть эсень китнеде, ды Тон маримик монь.
Тонавтомак монь Эсеть койтненень!
27Макст монень чарькодемс, кодамо Тонь кармавтоматнень янось,
ды карман арсеме Тонь дивань тевтнеде.
28Монь оймем солазь солы ризкстэ.
Кемекстамак Тонь валот вельде.
29Айгик монь эйстэ манчемань-кенгелемань кинть
ды казик монень Тонь коеть.
30Мон кочкия видечинь кинть,
Тонь аравтовкстнэ свал икелень.
31Мон кеместэ кирдян мельсэнь Тонь путовкстнэнь, Азоро.
Илямак совавто визьксчамас.
32Мон чиезь туян Тонь кармавтовкстнэнь киява,
эдь Тон панжат монь седеем.
33Невтик монень, Азоро, Тонь аравтовкстнэнь кинть,
ды мон карман свал эзганзо молеме.
34Макст тень превть, ды карман топавтомо Тонь коеть,
карман весе седейсэнь ванстомо сонзэ.
35Ветяк монь Тонь кармавтовкстнэнь янга.
Тенень ули покш мелем.
36Кадык монь седеем кунсолы Тонь мелеть-валот
ды а правты сюпавчис.
37Велявтыть монь сельмень стяконь тевтнеде,
макст тень эрямонь вий Тонь киява молемстэ.
38Топавтык уреть туртов Эсеть валот сень кисэ:
кадык Тондеть пелить.
39Саик монь лангсто покордамонть, конадонть мон пелян.
Тонь судот видеть.
40Мон пек бажан топавтомс Тонь кармавтоматнень.
Макст монень эрямонь вий Тонь видечить вельде.
41Кадык пачкоди монень Тонь седеймарямот, Азоро,
ды сы Тонь пельде идемась Тонь валот коряс.
42Сестэ мон ёвтан каршо вал монь покордыцянтень,
эдь мон кеман-нежедян Тонь валот лангс.
43Мерть монень свал ёвтнемс видечинь валтнэнь,
эдь мон кеман Тонь виде судот лангс.
44Тонь коеть мон карман ванстомо
свал ды пингеде пингес.
45Карман марямо прям олясо,
эдь мон вешнян ды тонавтнян Тонь кармавтовкстнэнь.
46Карман кортамо Тонь мерематнеде инязортнэнь икеле
ды а улян совавтозь визьксчамас.
47Мон мукшнан покш седейвитема Тонь кармавтовкстнэсэ,
конатне пек вечкевсть монень.
48Карман венстнеме кедень Тонь кармавтовкстнэнень,
конатне вечкевсть монень, ды арсеме Тонь аравтовкстнэде.
49Ледстик Эсь валот, конань максык уреть туртов
ды конань лангс мерить тень нежедемс.
50Тонь валось – оймавтома монь кажосонть,
Тонь валось вельмевти монь.
51Визькстэметне пек раксесть-нарьгасть монь лангсо,
ансяк мон эзинь пота Тонь коеть эйстэ.
52Мон ледстнинь Тонь кезэрень судот-аравтовксот, Азоро,
ды теньсэ оймавтынь эсь прям.
53Пек кежейгалян зыяновтнень кувалма,
конат кадыть Тонь коеть.
54Весе Тонь аравтовкстнэ кармасть монень морокс
те моданть лангсо эрямсто.
55Мик ветькак мон ледстнян Тонь леметь, Азоро,
ды ванстан Тонь коеть.
56Те теевсь монь уцяскакс,
эдь мон топавтан Тонь кармавтовкстнэнь.
57Мон меринь: монь уцяскам, Азоро,
топавтомс Тонь коеть.
58Мон ознынь Тонеть весе седейсэнь:
путык тень седеймарямот Эсь алтамот коряс.
59Мон арсинь эсень китнеде
ды велявтынь пильгень Тонь мерематнень пелев.
60Мон капшинь топавтомо Тонь кармавтовкстнэнь
шканть апак таргсе.
61Зыяновтнень терттне тапимизь монь,
ялатеке мон а стувтнян Тонь коенть.
62Пелеветькак стякшнынь Тонь шнамо
видечинь судот кисэ.
63Мон весе сетнень ялга, кие пели Тондеть
ды вансты-топавты Тонь кармавтоматнень.
64Азоро, Тонь седеймарямосот пештязь модалангось.
Тонавтомак Тонь аравтовкстнэнень!
65Азоро, Тон теить паро Эсь уреть туртов валот коряс.
66Совавтомак паро превс ды содамочис.
Мон кеман-нежедян Тонь кармавтовкстнэнь лангс.
67Мон ёмавтовкшныя кинть ды секс пек майсинь,
ней жо ванстан-кунсолан Тонь валот.
68Тон, [Азоро], пароят ды паро теят!
Тонавтомак монь Тонь аравтовкстнэнень.
69Визькстэметне кенгелить лангозон,
ансяк мон весе седейсэнь
топавтан-ванстан Тонь кармавтоматнень.
70Сынст седеест калгодкстомсть-кевензасть,
а вана мон Тонь койстэть муян седеень витема.
71Паро монень, мекс савсь тень майсемс,
истя тонавтозян содамо Тонь аравтовксот.
72Коесь, конань Тон максык,
монь туртов весе сырнеденть ды сиядонть седе питней.
Шнамо
73Тонь кедеть теимизь ды лувс путымизь.
Путомак превс, кадык тонадан Тонь кармавтовкстнэнень.
74Тондеть пелицятне несамизь монь ды кенярдозевить,
мекс мон нежедян Тонь валот лангс.
75Содан, Азоро, Тонь судот видеть,
ды видечинь коряс Тон кардымик.
76Кадык Тонь вечкемась ули монь оймавтомакс,
уреть туртов Тонь алтамот коряс.
77Пачкодезэ монень Тонь седеймарямось, ды мон карман эрямо.
Тонь коесь оймавты седеем.
78Кадык улить совавтозь визьксчамас визькстэметне сень кисэ,
мекс тувталтомо лепштить монь.
Мон ялатеке арсян Тонь кармавтоматнеде.
79Кадык пшкадить монень Тондеть пелицятне
ды Тонь мелеть-валот содыцятне.
80Кадык мон весе седейсэнь топавтан Тонь аравтовкстнэнь,
сестэ а улян совавтозь визьксчамас.
81Монь оймем сизесь Тонь идеманть учозь.
Мон нежедян Тонь валот лангс.
82Монь сельмень сизесть Тонь алтамот учозь.
Мон кортан: зярдо Тон оймавтсамак монь?
83Мон теке кедень кескав,
кона кувать ульнесь толпандя вакссо ды коськсь.
Тонь аравтовкстнэнь ялатеке а стувтнян.
84Зяро кадовсь учомс Тонь уреть туртов?
Зярдо судясыть монь пансицятнень?
85Визькстэметне чувсть тень латко.
Тонь коеть сынь мельс а путыть.
86Весе Тонь кармавтовкстнэ видеть.
Нетне чумовтомо пансить монь. Лездак тень!
87Сынь эль эзимизь машто,
мон ялатеке эзинь кадо Тонь кармавтоматнень.
88Седеймарямот коряс ванстык эрямом,
ды мон карман топавтомо Тонь мелеть-валот.
89Азоро, пингеде пингес кемекстазь
Тонь валот менельсэ.
90Тонь видечись моли буестэ буес.
Тон путык моданть, ды сон ашти таркасонзо.
91Тонь аравтовкстнэнь коряс течис весемесь ашти кеместэ,
92Бути Тонь коесь аволь уле монь оймавтомакс,
сестэ мон куловлинь мелявтомадонть-ризкстэнть.
эдь весемесь важоди Тонеть.
93Пингеде пингес а стувтсынь Тонь кармавтоматнень,
сынст эйсэ Тон вельмевтят монь.
94Мон Тонь, идемак!
Мон бажан теемс Тонь кармавтоматнень коряс.
95Зыяновтне учить, зярдо маштомс монь.
Ансяк мон седе домкасто арсян Тонь путовкстот.
96Мон неинь: весементь ули пезэ.
А вана Тонь кармавтовкстнэ улить свал.
97Кода мон вечкса Тонь коеть!
Чинь-чоп арсян сондензэ.
98Тонь кармавтовксот теи монь душмантнэде седе превеекс.
Сон свал монь марто.
99Мон теевинь весе монь тонавтыцятнеде седе превеекс,
эдь мон арсян Тонь путовкстнэде.
Мон раськень сыретнеде седе содыцян,
эдь топавтан Тонь кармавтоматнень.
101Тонь валот топавтомга
мон туян веёнов эрьва кодамо зыянов кинть эйстэ.
102Мон Тонь судтнэде а туян веёнов,
эдь Тонсь тонавтат монь.
103Кодат тантейкс монень марявить Тонь валот!
Сынь монень медте ламбамот.
104Тонь кармавтоматнесэ мон превс путозян,
секскак а вечкса манчемань вейкеяк кинть.
105Тонь валот валдомгавты монь эрьва эскельксэнть,
сон валдо монь килангсо.
106Мон максынь вал эрямс Тонь виде аравтовкстнэнь коряс
ды топавтса сонзэ.
107Пек лепштязян мон, Азоро.
Вельмевтемак монь Тонь валот коряс.
108Азоро, кадык мелезэть туить монь седейшкавань шнамо валон кода анокс.
Тонавтомак монь Тонь аравтовкстнэнень.
109Кадык мон свал эрян тандавтомасо-пелемасо,
ялатеке Тонь коенть а стувтнян.
110Зыяновтне путсть монь килангс пистенть*е,
мон ялатеке эзинь пота Тонь кармавтоматнеде.
111Тонь мелеть-валот мон саинь эстень
пингеде пингень сюпавчикс.
Сынь витить монь седеем.
112Мон алтыя эсь прям Тонь аравтовкстнэнь топавтомо
эрямом перть, педе-пес.
113А вечкан ломанть, кить полавтнить мелест-арсемаст.
Тонь коенть вана вечкса.
114Тон – монь кекшема таркам ды монь ваксаром.
Тонь валот лангс кеман-нежедян.
115Туеде монь эйстэ, зыянонь теицят!
Карман ванстомо монь Пазонть кармавтовксонзо.
116Кемекстамак монь Эсь валот коряс, ды карман эрямо,
ды а улян совавтозь визьксчамас эсь кемемасон.
117Ульть тень нежекс – ды улян идезь.
Тонь аравтовкстнэнь карман мельсэ кирдеме свал.
118Весень, кить потыть Тонь аравтовкстнэде, Тон правтат,
эдь сынст ёжовгалемась – те манчема.
119Тон нардат масторлангонь весе зыяновтнень кода содонть.
Секскак питнейть монень Тонь мелеть-валот.
120Монь рунгом сорны Тонь икеле пелемадо,
ды Тонь судтнэде мон пелян.
121Мон эринь видестэ ды видечисэ –
илямак максо монь пансицян туртов.
122Мелявтт уреть кисэ,
иляк максо лепштямс сонзэ визькстэметненень.
123Сизесть монь сельмень Тонь идемат
ды Тонь видечинь валот учозь.
124Тейть уреть марто седеймарямот коряс,
тонавтомак монь Тонь аравтовкстнэнень.
125Мон Тонь уреть, путомак монь превс,
ды чарькодьсынь Тонь мелеть-валот.
126Сась шка Азоронтень кундамс тевс:
Тонь коеть колызь.
127А вана мон Тонь кармавтовкстнэнь вечксынь
сырнеде пек, ванькс сырнеде седе пек.
128Весе Тонь кармавтоматнень лован видекс.
Кодамояк манчема а вечкан.
129Тонь мелеть-валот дивань,
секскак мон сынст ванстан.
130Тонь валтнэнь чарькодемась кази валдо,
путы превс асодыцянть.
131Мон кургом панжтнян, стакасто таргсян оймем –
истя пек бажан симемс Тонь кармавтовкстнэнь.
Шнамо
132Варштак лангозон ды нолдык монь чумом,
кода тейнят Тонь леметь вечкицятнень марто.
133Ветяк монь эскельксэнь Тонь валот коряс
ды кодамояк зыянонть иляк нолда улемс монь лангсо азорокс.
134Менстемак монь лепштицян эйстэ,
сестэ мон ванстасынь-топавтсынь Тонь кармавтомат.
135Кадык сияжды Тонь чачот Эсеть уреть туртов.
Тонавтомак монь Тонь аравтовкстнэс.
136Монь сельведень чудить апак лотксе,
мекс а путыть мезекскак Тонь коеть.
137Видечисат Тон, Азоро,
ды видеть Тонь судот.
138Тонь мелеть-валот, конатнень Тон максыть, –
видечи ды алкуксчи.
139Вейке арсема сэвезь сэви эйсэнь:
мекс монь душмантнэ стувтызь Тонь валтнэнь.
140Тонь валот толсо ванськавтозь,
ды Тонь урентень сон вечкеви.
141Кадык мон вишкинян ды покордазян,
ялатеке Тонь кармавтоматнень а стувтнян.
142Тонь видечись – те пингеде пингень видечи,
ды Тонь коесь – алкуксчи.
143Стакачить ды апарот куродымизь монь,
ансяк Тонь кармавтовксот кандыть монень мельспаро.
144Тонь мерематне видеть пингеде пингес.
Макст тень чарькод4ьксчи, ды сестэ мон карман эрямо.
145Весе седейсэнь тердян: Азоро, марямак монь! –
Ды мон карман ванстомо Тонь аравтовксот.
146Энялдан Теть: идемак монь! –
Ды мон карман топавтомо Тонь мерематнень.
147Ашолгадомадо икеле тердян Тонь.
Тонь валот лангс мон нежедян.
148Вень перть монь сельмень панжадот,
мон арсян Тонь валтнэде.
149Марик монь вайгелем, Азоро, Тонь седеймарямот коряс!
Вельмевтемак монь Тонь видечить коряс!
150Маласот зыянов мель марто монь пансицятне,
васолот сынь Тонь койдеть.
151Азоро, маласат Тон.
Весе Тонь кармавтовкстнэ – алкуксчи.
152Пек умок мон карминь содамо, кодат Тонь мерематне:
Тон сынст кемекстыть пингеде пингес.
153Варштак монь майсемам лангс ды идемак монь!
Мон а стувтнян Тонь коенть.
154Стяк монь кисэ монь тевсэнть ды идемак!
Вельмевтемак монь алтамот коряс.
155Зыяновтне васолот идемадонть –
сынь а вешнить Тонь аравтовкстнэнь.
156Азоро, Тонь вечкемат покш.
Вельмевтемак монь Тонь видечить коряс.
157Монь ламо пансицян ды ятон,
ялатеке Тонь мерематнеде веёнов мон а тукшнан.
158Неян потыцятнень ды ацирьгалян:
сынь а ванстыть Тонь валот.
159Вант, кода мон вечксынь Тонь кармавтомат!
Азоро, вельмевтемак монь Эсь седеймарямот коряс!
160Весе Тонь валот – алкуксчи,
ды весе Тонь видечинь аравтовкстнэ пингеде пингес.
161Прявттнэ пансить монь тувталтомо,
ялатеке ансяк Тонь валот икеле монь седеем сорны.
162Мон кенярдан Тонь валозот,
кода се, конанень сась покш сюпавчи.
163Пек а вечкса манчеманть ды нулгодян эйстэнзэ,
а вана Тонь коеть вечкса.
164Чинь перть сисемксть инелгавтан
Тонь видечинь судтнэнь кисэ.
165Покш сэтьмечи пешти Тонь коенть вечкицятнень,
ды мезеяк сынст а пупордявтсынзе.
166Кеман-нежедян, Азоро, тень лангс: Тон идесамак.
Тонь кармавтовкстнэнь топавтан.
167Мон ванстан Тонь мерематнень
ды пек вечксынь сынст.
168Ванстан Тонь кармавтоматнень ды мерематнень –
Тонь икеле монь эрямонь весе китне.
169Пачкодезэ монь тердемам-рангомам Тонеть, Азоро!
Путомак монь превс Эсь валот коряс!
170Пачкодезэ озномам-энялдомам Тонеть!
Идемак монь алтамот коряс!
171Монь кургом а лоткси Тонь шнамот –
Тон тонавтат монь Эсеть аравтовкстнэнень.
172Монь келем моравтсы Тонь валот –
весе Тонь кармавтовкстнэ видеть.
173Кадык Тонь кедеть ули монень лездыцякс,
эдь мон кочкинь Тонь кармавтоматнень.
174Азоро, пек учан – Тон монь идесамак.
Тонь коесь оймавты седеем.
175Мерть тень эрямс ды инелгавтомс Тонь,
ды кадык Тонь виде судот лездыть монень!
176Мон а муян кинть теке ёмазь реве.
Муик Тонь уреть,
эдь мон эзинь стувто Тонь кармавтовкстнэнь!
Шнамо
*а 118 Псалмась максозь евреень алфавитэнь коряс: мельга-мельцек азбукань эрьва буквастонть ушодови кавксо строфань эрьва стихесь. Истя, зяро букватнеде, зняро строфатнедеяк – 22, стихтнеде – 176.
*б 118:1 кой – закон
*в 118:4 кармавтома – повеление
*г 118:5 аравтовкс – устав, постановление
*д 118:6 кармавтовкс – заповедь
*е 118:110 пистень – силок
Глава 118